Azaya 48

1<<Jekob yenni a wom kude, fi waai ate ba a wi fu ayen Izirali ate fi nyini Juda dɔkdemma po la, fi a nye pɛka Naawen yuenni nyiŋ ale a wi Izirali Wenni, alege ku daa wensie yaase wayɔrisima po. 2Nama baai ale a wi nidek ayen tuilum tɛŋ nuruba ale pai ni yiila meena a basi Izirali Wenni zuk la. Wa yuenni ale Naawen Dii Ale A Dɛ Tugurik Tɔŋdɔma Niŋ La.

3Mi liŋ a weeni wakpagsaŋa kama dipo, m nɔnni ale mooli ŋa ale nye ate waai meena a seba ŋa, ate mi deri nye ate ŋa sum a jam boro. 4Dila nyiŋ mi seba fi tukpanni ale soa diila kama. Fi ŋinni ka kutuk, ate fi dinni a chim kutuk mɔnuŋ. 5Dila nyiŋ ate m weeni fu ŋade dipo alege ate ŋa jam nye la, mi mooli ŋa wie a sak fu kama, ate fi kan baga a weeni ayen, <M bɔgtaŋa ale nye ŋa. M daata bɔglukku ale m kutuk wenni ale te ate ŋa boro.

6Fi wom ŋade wie kama. Nya ŋa meena. Fi a kan siak a te ŋa? <<A nyini yɔgyɔgla de a cheŋ, m le weeni fu ŋan paala wie, ŋan susuga ŋaai ate fi zɛ ŋa. 7Ba nye ŋa ka yɔgyɔgla de, alege daa dipo. Daa jinla ate fi wom ŋa wie. Dila nyiŋ fi an baga a weeni ayen, Mm, mi seba ŋa kama. 8Fi an wom ya yaase fi poom miŋ di kiri ya. A nyini dipo fi tueŋa an lagri ya. M seba fi bobrika nɔi po kama. Ba jam a wi fu ka a zɛri wie a nyini fi biam po.

9<<M dek yuenni nyiŋ ate m beni m suipuurumu. M pimpaukku nyiŋ ate m yik ku a basi ŋaaŋ a nyini fi jigi. Ayen m kan gebi fu a basi.

10<<Nya, m soti fu kama, ku be daa se kpana la. M chamsi fu nya kama a nyini ninam bolim po. 11Mi dek nyiŋ, mi dek nyiŋ ate mi a nye kude. Mi tin nye ka sɛ a kaasi m dek yuenni? M kan pai m zulaŋa a te waai ya.

12<<Jekob, wom mi, Izirali waai ate m wi la. Ka mi ale la. Mi ale dɛ niŋ mi abe le ŋman wari ŋaaŋ. 13Mi dek nisa ale dueni tɛŋzuk de nyubini, ate m juga nisaŋa a nye ate wenzukku a lagri cheŋ. Ase mi ale wi ŋa la, ŋa meena a jam zaani ka jigi yeŋ.

14<<Ni jam jigi yeŋ, ni meena a jam wom. Ka bɔgtaŋa kuna ale dɛ niŋ a weeni wieŋa de? Naawen ale lueri doa waai la ale ta wa ale a yaali diila a ga nye Babilon. Wa nisaŋa ale ta chaab ale Kaldiya demma. 15Mi, poom ka m dek ale biisi, mm, mi wi wa kama. M le ta wa a jam, ate wa ale za wa nye diila ale nye magsi.

16<<Cheŋ paari mi a wom nya kude. <<A nyini piilimka moolika mi an biisi suk ya. Diipo ate ku nye la ale mi boro kama. <<Ate yɔgyɔgla de Nyɔnɔwa Naawen a pai wa chiika a tom mi.

17Nye kude ate Naawen fi Da Tuesirɔwa, Waai ale Welema Izirali po la a weeni ayen, <<Mi ale Naawen fi Wenni, Dii ale a sak fu dii ale nala la ale a dak fu suik kuui po ale magsi ayen fi va la. 18Fi dan jam wom ka m sinsaŋŋa, fi suiyɔgni ate le jam nye ase ka benaŋ la, ate fi wayɔrisimaŋa a nye ase nyakpiemu nya miisaŋa la. 19Fi ŋaaŋbisaŋa ate le nye ase ka tintainbusuŋ la, ate fi bisaŋa a kan ta chiina ase ŋanbie la. Ba yuenni ate kan bɛ diipo diipo yaase ba kaasi a ta nyini mi niŋŋa.>>

20Basi Babilon, yiri nyini Kaldiya demma jigi. Mooli nya kude ale masim nuemka abe fi weeni ku. Te ku cheŋ paari tɛŋka kpeglimka. Weeni ayen, <<Naawen a da tuesi wa tomteerɔwa Jekob kama.>> 21Nyanyuila an jam a yik ba diipo ate wa jam de ba niŋ gɔnni po la. Wa jam nye kama ate nyiam a nyini piuŋku po a te ba. Wa kabri piuŋku kama ate nyiam a na nyini du. 22<<Naawen a weeni kama ayen, <<Suiyɔgni a karo a te gaasa nyama.>>

Currently Selected:

Azaya 48: BWU

Highlight

Compare

Copy