Azaya 47

1<<Cheŋ tɛŋ, kali paasuku po, Babilon Liewa nipok Kaliaka kali tɛŋka abe fi kan ta naam zukpaglika Kaldiya demma liema po. Ba a kan ŋman wi fu ayen fi baasa yaase fi ta ka a toa. 2Pai niri a num zom. Yeeri fi garuk nyaara nyaaraŋa. Zak fi mankutaŋa ŋmai, kan su nuesa, abe fi gaam buboalisaŋa a taam. 3Ba le nya fi chaboalaŋa, ate fi chivieŋa a kan ligi. Mi ale nye a tuni. M kan basi waai ya. 4Ti Da Tuesirɔwa, Naawen Dii Ale A Dɛ Tugurik Tɔŋdɔma Niŋ La ale wa yuenni, Waai ale Welema a bo Izirali la.

5Kali tɛŋ chim, cheŋ legi po, Kaldiya dem liewa, ba kan ŋman wi fu ayen naata nipok naaba. 6Mi sui a jam a puuri ale m nuruma ate m kaasi m nitalimu. Ate m pai ba a nyo fi nisa po alege fi an sak jiirim ale ba. Baai ale poom kpaŋ la fi pai ka niiga diok kuui ale dobra la a vi ba zuk. 7Fi weeni kama ayen, <M le kasim a chim ka nipok naab taam wuu.> Alege fi an poli wieŋa de, yaase fi poli ayen ka boa ale ku nye.

8<<Yɔgyɔgla de, wom de, fi waai ate nidoa boari a sebi fu la, fi bo ka fi sukka jigini ale a weeni fidek ayen, <Ka mi, ate waai a karo a gum mi po. M kan chim pukɔgi yaase m jɔk bisa.> 9Bade meena ale jam fi zuk dai yeŋ po. Bisa jɔkka ale pukɔgini. Fi le fi sampoporinni ale fi tinaŋsa meena po, daanika de ale jam fi zuk ate ku paari fu. 10Fi ta ka sebchakka ale fi gaasaŋa ale weeni ayen, <Waai a kan nya mu.> Fi yammu ale yam wie miŋka a ta fu cheŋ a bɛ kama ase fi ale a weeni fidek ayen, <Ka mi ate waai karo a gum mi po.> 11Kaasuŋ ale jam fi zuk, ate fi kan seba tiim jigi ya. Biem ale lo fi zuk ate fi kan baga a vari fidek a basi. Kaasuŋ ale jam fi zuk ate fi kan baga a nye biem duisi basika. Ninam buui ate fi zɛ ku nɔi po la ale jam fi zuk a diiri fu.

12<<Kasim a ta fi tinaŋsaŋa ale fi sampoporinni a nye, dii ate fi nye a nyini fi bi fiisa po la. Da dii dai ku ale nye a magsi a te fu, da dii dai fi ale nye ate yɔgsum a yik nuruba. 13Sinsak ŋaai meena ate fi tuesi la a nye kama ate fi jiak. Basi ate baai ale seba chiŋmarisa wie a jam niŋ, baai ale a porisi chiik po meena la. Basi ate ba vari fu a ta nyini dii ale cheen fi zuk la. 14Wensie nyiŋ ba a nye ase ka kinkaa la. Bolimu chogsi a dɛ ba. Ba an baga a vari badek a nyini bolim ŋiaka pagrimu po. Bolim kaala a ka dela a toliŋ waai nyiŋŋa. Bolim a ka dela ate waai a kali bu tɛŋ ŋa. 15Dii meena ate ba baga a nye a te fu la ale la. Ŋade ate fi a tom ale gerim a nyini fi bi fiisa po. Ba meena a nye bɛ kama. Ba waai an baga vari fu a basi.

Currently Selected:

Azaya 47: BWU

Highlight

Compare

Copy