Azaya 46

1Bel wenni a kpi ka duna, ate Nebo wenni a koori tɛŋ. Ba bɔgtaŋa a chim ka jibta a te duŋsa. Ŋanmɛɛntaŋa ate ba ji la a chim ka daanika ale jibta a te baai ale jiak la. 2Ba gum ka chaab a koori ale kpi duna. Ba an baga a vari badek a nyini jimmu po. Badek ale cheŋ yɔntidi po.

3<<Wom mi, Jekob yeri ya, Izirali yeri dem baai ale tali la, fi waai ate m ta fu a nyini diipo ate ba yik fi puuk la ale pai fu a nyini diipo ate ba biak fu la. 4A poom ta jam paari fi kpaŋsa po ale fi zupiila taka. Mi ale la, mi ale waai ale wa maari fu. Mi ale nye fu ate m le pai fu. M le maari fu abe m vari fu a basi.

5<<Fi ale pai mi a magsi chaab ale ka wana yaase fi chiini mi a gum chaab ale wana? Fi ale pai mi a nye ase ka wana la ate ti baga a magsi chaaba? 6Ba gela a kpiiri ka ligmɔniŋ a nyini ba boorisaŋa po ale magsi kpana ŋanmagsinta zuk. Ba pai ka choabiik ate wa pai ŋa a nye wen, ate ba a koori tɛŋ ale a puusi di. 7Ba a zak a vi ba ŋmankpalaŋa zuk a ji di. Ba pai di a zaani ka di jigini, ate di za dula. Di ale za juijui la, di an baga a cheŋŋi. Waai a dan poom kum a wi di, di kan tulisi. Di an baga a vari wa a basi a nyini wa daanika po.

8<<Teeri kude, pai nyo fi popola po, pai nyo fi suinum po, nama baai ale kaa siak a te wie la. 9Teeri wie kpagsaŋa, ŋaai ale jam boro dipodipo la. Mi ale Wen. Waai a karo a gum mi po. Mi ale Wen. Waai a karo a nye ase mi la. 10Mi basi kama ate ba seba kpeglimka a nyini piilimka po, a nyini ŋiaka dii ale za di jam la, mi weeni kama ayen, mi ale poli diila ale zaani, abe dii meena ale a peenti m sui la m le nye.

11M wi ka duiŋ konni po ate ka cheena. A nyini tɛŋ kaai ale yalima la ate m wi nuru ayen wa nye dii ate m ta m popola po la. Mi ale weeni diila, ate m za m ta jam. Mi ale zɔk diila ate m le nye. 12Wom mi, fi waai turi ale kpari ale ta suinum pagrik la, fi waai ale yalima ale wayɔrisima la. 13M ta m wayɔrisimaŋa a moata kama ku an yalima, ate m varibasika a kan beni. M le te Zayon varibasika, abe m te Izirali m nalimu.

Currently Selected:

Azaya 46: BWU

Highlight

Compare

Copy