Azaya 45

1<<Dii ate Naawen a weeni waai ate wa bobi la ale nna, Sairus waai ate m yik wa juga nisa a ta la, ayen wa nya pagrim tɛŋ kpieŋsa zuk abe wa vari kpaliŋsa kɔlima a nyini nalima jigi, abe wa lak tuata wa niŋ ate nansuiŋtaŋa kan ligi. 2M le de fi niŋ a cheŋ abe m nye ate guutaŋa a palinti a magsi chaab. M le wɛ nansuiŋ kuta mɔntaŋa abe m gebi kuta chibsaŋa a taam. 3M le te fu legi nitalimu ale paaruŋ kuui ale suk jigi ŋaai la ate fi ale miŋ ayen Mi ale Naawen, Izirali Wen dii ale pai fi yuenni a wi fu.

4Jekob m tomteerɔwa nyiŋ, Izirali waai ate m lueri la, fi zɛ mi alege dila meena zuk, mi pai ka fi yuenni a wi fu ale pai zula a basi fi zuk. 5Mi ale Naawen, waai a ŋman karo. Wen a ŋman ka jigi ya a gum mi po. Fi a miŋ mi alege dila meena zuk, m le nye ate fi pagra, 6a ta nyini wenbinni pusika a ta ga a paari di siŋka jigi, nuruba ale seba ayen waai karo a gum mi po. Mi ale Naawen, waai a ŋman karo. 7Mi ale nye bolim ale nye legi, mi ale ta paaruŋ a jam ale nye kaasuŋ. Mi, Naawen ale nye ŋantaŋa de meena.

8<<Fi wenŋmazukku ale bo ŋmai la, ni wayɔrisima a basi tɛŋ. Basi ate chiŋmaaŋa a ni a basi tɛŋ. Basi ate tɛŋ zuk de a lagri, basi ate varibasika a tɔŋ jueli ŋmai, basi ate wayɔrisima a chim ale ku. Mi, Naawen ale nye ku.

9<<Ku ale toa a te waai ale ta chaab ale wa Nyeerɔwa la, fi ka samɔniŋ ale maa bo ale samɔnsa ate ba pai tanta a nye. Yak ale baga a weeni mɛɛrɔwa ayen, ka boan nyiŋ ate fi a nye mu nna? Dii ate fi nye la ale weeni ayen, Wa ka nisa? 10Ku ale toa a te waai ale a weeni wa ko ayen, Ka boa ate fi biagi? Yaase wa weeni wa ma ayen, <Ka boa ate fi biagi?

11<<Naawen ale weeni diila ale nna, Waai ale Welema Izirali po la, ate wa chim wa Nyeerɔ la. A ta va ŋan baai ale za ŋa jam la, fi a bek mi wie a ta va m bisaŋa nyiŋŋa, yaase fi dak mi wie a ta magsi chaab ale m nisima tuima? 12Ka mi ale waai ale nye tɛŋzuk de ale nye nurubiik a basi ka zuk la. M nisaŋa ale teeri wenŋmazukku. Mi ale nye ate chiŋmarisaŋa a bo wenzukku. 13M le zak Sairus a zaani ŋmai m wayɔrisimaŋa po. M le nye ate wa suitaŋa meena a yoarisi. Wa ale ŋman sɛ m tɛŋ kpieŋka, abe m nuru baai ale basi ba tɛŋka la wa ale vari ba a basi, alege ba kan tuni jaaboa yaase ba tuesi jaaboa, ka Naawen Dii Ale A Dɛ Tugurik Tɔŋdɔma Niŋ La ale weeni.>>

14Naawen ale weeni diila ale nna: <<Ejipiti nyuentaŋa ale Kus geruŋku ŋantaŋa ale Siiba demma baai ale wɔŋa la, ba le jam fi jigi ate fi soa ba. Ba le jiak a vi fi ŋaaŋ ale chɔrima. Ba ale koori tɛŋ fi niŋ, abe ba saalim fu ayen, <Wensie Wen a bo ale fu kama ate waai a karo. Wen di choa a ŋman karo.>>

15Wensie fi ka Wen dii ale a suk wadek, Wen ale Izirali Varibasidɔ. 16Bɔgluk nyeerisa meena chivie ale nyatika ale yik ba. Ba ale gum chaab a cheŋ ale chivie. 17Alege Naawen ale vari Izirali a basi ale taam wuu varibasika. Fi a kan nya chivie yaase nyatika bena ŋaai ale cheen la a ta ga a paari diipo meena.

18Kude nyiŋ ate Naawen a weeni ayen, Wa waai ale nye wenzukku la, wa ka Wen, wa ale gomsi ale nye tɛŋzuk de, wa ale nye ka. Wa an nye ayen ku boro koruwa, alege wa nye kama ayen ba bo ka po. Wa a weeni kama ayen, Mi ale Naawen ate waai a karo. 19Mi an zaani tɛŋka legi po a suk biisi ya. Mi an weeni Jekob ŋaaŋbisaŋa ayen, ba a gisi mi kinla. Mi Naawen, a biisi ka wensie. Mi a weeni ka dii ale chim wensie la.

20<<Ni tigsi jigi yeŋ a jam. Ni tigsi, nama baai ale nyini tɛŋ kpieŋsaŋa po a chali lati la. Baai ale kan seba wari nɔi po la ale baai ale ji bɔgta ate ba pai daata a nye la, ale a puusi a te wen ŋaai ale kan baga a vari a basi la. 21Weeni dii ale magsi di nye la, pai te. Basi ate ba jam jigi yeŋ a pai yam a sak chaab. Ka wana ale dɛ niŋ a weeni kude dipo la, ka wana ale weeni ku a nyini niŋniŋ ŋa? Ku jam daa mi, Naawen. Wen a karo a gum mi po, wayɔrisima Wen ale Varibasidɔ, waai a ŋman karo alege ka mi nyiini.

22<<Viriŋ a jam mi jigi ate fi nya varibasika, nama baai meena ale bo tɛŋzuk de jigi meena la. Diila mi ka Wen, ate waai a ŋman ka. 23Mi pɛ ka m dek nyiŋ, m nɔnni a weeni kama a bo wensie meena po, ate m kan nyini m le weeni diila ŋaaŋ a nyini. Duna meena ale kpi tɛŋ mi niŋ. Mi nyiŋ nɔi meena ale pak Naawen. 24Ba ale weeni m wari ayen, <<Naawen nyiini jigi ate wayɔrisima ale pagrim a boro.>> Baai meena ale a nye kpaliŋ ale wa la ale jam wa jigi ate chivie a yik ba. 25Alege Naawen jigi ate Izirali ŋaaŋbisaŋa ale nya wayɔrisima ale masim dɛka.

Currently Selected:

Azaya 45: BWU

Highlight

Compare

Copy