Azaya 41

1<<Tɛŋ sii ate nyiam a gilim si la a nye chim mi niŋ. Basi ate tɛŋ kpieŋsaŋa a ŋman nya pagrim paalik. Basi ate ba jam niŋ a biisi. Basi ate ti tu chaab buusa boka jigini.

2<<Ka wana ale choa waai ale nyini konni po la, a wi wa wayɔrisima po wa tuima zuwa? Wa pai tɛŋ kpieŋsa a te wa ale te ate nalima a siak a te wa. Wa pai wa gebik woŋka a nye ate ba chim buntuem ale pai wa tommu a fuk ba a basi ase vɔtta la. 3Wa a vi ba kama alege jaab an nye wa. Wa va ka suik kuui ate wa an diem va ku a nya ya. 4Ka wana ale nye nna la ale ta ku a ga taamu ale a wi gaŋ sii ale nyini piilimka la? Mi Naawen ale piilimka, ka mi ale kpeglimka mɛ.>>

5Tɛŋ sii ate nyiam a gilim si la, a nya kama ale yɔgsa. Tɛŋka meena nyiŋsa a gɔk kama. Ate ba paari chaab a jam niŋ. 6Wanyi meena a maari wa choa ale a weeni wa suok ayen, <<Bi pagra.>> 7Peesirɔwa a te choabiika nyiŋbiiri, ate waai ale pai kuk doaguri a salisi la a te waai ale a nak kutuk la nyiŋbiiri. Wa a weeni waai ale a tom kuta chaab la ayen, <<Ku nala kama.>> Wa a nak bɔglukku ale peema a feri tɛŋ ayen ku kan lɔ tɛŋŋa.

8<<Alege fi, Izirali, m tomteerɔ Jekob, waai ate m lueri fu la, a nyini Abrayam mi doawa ŋaaŋbisaŋa po la, 9Mi pai fu kama a ta nyini tɛŋka kpeglimka, a nyini ka gugottaŋa ale yalima la po, mi wi fu kama. Mi weeni kama ayen fi ka m tomteerɔ mi lueri fu kama mi an zɛri fu. 10Dila kan yɔgsa, ale mi bo ale fu kama. Kan jɔk nyiŋbiiri, diila mi ale fi Wen. M le te pagrim abe m maari fu. M le pai m wayɔrisima juga nisaŋa a yik fu.

11<<Baai meena ale ta chaab ale fu la chivie ale yik ba. Baai ale kaa siak a te fu la kan ta kiri ya abe ba kpi. 12Fi dan poom a gisi fi dachaasaŋa, fi a kan nya ba. Baai ale a nye kpaliŋ ale fu la meena a kan bola a ta kiri ya. 13Dii nyiŋla mi ka Naawen, fi Wen dii ale yik fi juga nisaŋa ale a weeni fu ayen, kan yɔgsa. M le maari fu. 14Kan yɔgsa, Jekob ale Izirali tɛŋ kaai ale pɔsima la, diila mi dek ale maari ni,>> Naawen ale a weeni dila, fi Da Tuesirɔwa, Waai ale Welema a bo Izirali la.

15<<Nya, m le nye fu ŋanta fɔbika laarik ale nɔi paali dii ale a de la ale nyina nna yegayega. Fi le ŋɔriŋ pinaŋa abe guutaŋa a chim vɔtta. 16Fi ale yali ti, ate viok ale pai ti, ate va pagrik ale ji ti a ta cheŋ. Alege fi ale de masim Naawen niŋ abe fi nya zula Waai ale Welema a bo Izirali po la.

17<<Ŋanjaksa ale baai ale a silim la a gisi ka nyiam, alege bu karo. Ba giŋgeluŋtaŋa a kɔ kama ale nyanyuila. Alege mi Naawen ale tulisi ba. Mi Izirali Wenni a kan zɛri ba. 18M le nye ate bela a bo gu tii ate jaab a karo la zuk, abe benaŋsa a bo vaasaŋa po. M le labri gɔnni ate di chim bela, ate tɛŋ kosikka a chim benaŋsa. 19M le pai nyunyoŋ ale siik ale puuta tiisa ale kpaam tiisa a basi gɔnni po. M le te ate dapeelita tiisa ale kinkaŋ peruk ale damɔnta tiisa a gum chaab a bo tɛŋ koroku po. 20Ate dila a basi ate nuru a baga nya abe ba seba, abe ba poli, abe ba miŋ ayen ka Naawen nisa ale nye nnawa, ayen ka Waai ale Welema Izirali po la ale nye dila.

21Naawen a weeni kama ayen, <<Jam weeni fi ale ta wari diila.>> Jekob Naawa ayen, <<Ta fi nanpaŋŋa a jam.>> 22<<Ta fi bɔgtaŋa a jam ate ti weeni ti dii ale za ku nye la. Weeni ti wakpagsaŋa ale jam ka diila, ate ti poli a nya ate ti nya ŋa ale za ŋa nye diila. Yaase weeni sak ti wie ŋaai ale za ŋa nye la. 23Weeni chum po wie ate ti miŋ ayen ni ka wena. Ni nye wari, ku dan poom ka biem yaase nalim ate ti jɔk nyiŋbiiri ate yɔgsum a sueri ti. 24Alege ni ka ŋankayaata ate ni tuimaŋa a ka kiriya. Waai ale a lueri ni la a ta ka kisuk.

25<<M choa ka waai ate wa nyini konni po a cheena. Wa nyini ka wenbinni ale a pusi juijui la, wa ka waai ale a wi mi yuenni. Wa a tabi kpaga nna se ba ka tanta ate ba bu la ase mɛɛrɔ ale a tabi yak diila. 26Ka wana ale weeni kude a nyini piilimka ate tama ale ti seba, yaase ti ŋaan seba ate ti ale weeni ayen, <Wa ta wensie?> Waai an weeni nya kude, waai abe poom ŋaan weeni ku, nuru waai an wom wie a nyini fi jigi ya. 27Mi ale waai ale dɛ niŋ a weeni Zayon ayen, <Nya, ba ale nna.> M tom ka nuru ale wapaala a te Jerusalem. 28Mi gisi kama alege nuru ka. Nuru a ka ba po ayen wa sak ba. M dan bek ba wari nuru karo ale tulisi. 29Nya, ba meena ka venta nyam. Ba tuimaŋa a jam chim ka kinla. Ba ŋanmɛɛntaŋa daa jaaboa alege ka viok ale butimka.

Currently Selected:

Azaya 41: BWU

Highlight

Compare

Copy