Azaya 38

1Va ŋala po ate Azekaya a jam a yuak a moata kum. Ate Amoz nidoabinni Azaya Wen biisiteerɔwa yaa cheŋ wa jigi a weeni wa ayen, <<Naawen ale a weeni diila ale nna ayen, Gomsi fi yenni a magsi, dii nyiŋla, fi za fi kpi kama. Fi kan nya nyiŋyɔgsa.>>

2Azekaya yaa cheem wa nina a tuk siaka nyiŋ ale puusi a te Naawen ayen, 3<<Naawen yaa, teeri mi ale cheŋ fi niŋ ale wensie a soa diila ale m le pai m suinum meena a te fu a soa diila ale nye dii ale nala fi nina po a soa diila.>> Azekaya a jam kum kama nna tuotuowa.

4Ate Naawen wanni a jam Azaya jigi ayen, 5<<Cheŋ ga weeni Azekaya ayen, <Dii ate Naawen, fi kowa Deevid Wenni a weeni la ale nna: Mi wom fi puusaŋa ale nya fi ninyaataŋa kama. M le pai bena pi ale ŋanu a gum fi nyuvunni po a te fu. 6Ate m le vari fi ale tɛŋka a nyini Assiria naawa nisa po a basi. M le maari tɛŋka de.

7<< <Naawen daanaŋa ale nna a te fu ayen wa ale nye dii ate wa puulim la. 8Mi ale nye ate wenbinni yisuŋku a ŋmani ŋaaŋ a siŋ naŋtuok nɔi Ayazi tiilaŋa zuk.> >> Dila kantueŋka yaa ŋmani ŋaaŋ a siŋ naŋtuok nɔi pi.

9Juda naawa Azekaya ale ŋmarisi dii wa yuammu ale wa nyiŋyɔgsaŋa ŋaaŋnyiŋ la ale nna: 10Mi weeni kama ayen, <<Diipo ate nyuvuri a nye tuilum la m magsi m cheŋ ka kum nansuiŋta, abe m jɔk m bena ŋaai ale tali la?>> 11Mi weeni kama ayen, <<Mi a kan ŋman nya Naawen, Naawen dii ale bo ŋanvuta tɛŋka po la. Mi a kan nya nurubisa yaase baai ale bo tɛŋka de meena po la. 12Ba dari m yenni a lɔnsi ka tɛŋ ase naapeerik viuk la, ate ba pai a ta nyini m jigi. Ba vili m nyuvunni ase ka yɔgdɔ ale a yɔk gatta diila wa an pai mu a su ja waai ale a yɔk gattaŋa la po. Kantueŋ ale yok fi ta mu a cheŋ ka m nuerika jigi. 13Mi limisi kama ale chichiiba a ga paari varivientidi, alege ase gbeŋli la wa wɛ m kobaŋa meena kama. Kantueŋ ale yok fi ta mu cheŋ ka nuerika jigi. 14M kaari kama ase nuim la, a kum ase kumsa nangbaŋ la. M ninaŋa a jiak kama ase mi ale zak a nya wenŋmazuk la. M bo ka daanika po. M Nyɔnɔ, jam maari mu.>>

15Alege m le weeni ka boan wari ya? Wa biisi ale mu, wala dek ale nye kude. M le zaab ka m dek a cheŋ m benaŋa meena po dii nyiŋla nyiŋdommaŋa de ale bo m chiika po la nyiŋ. 16Nyɔnɔwa, ŋantaŋa de nyiŋ ate nuruba a boro. M chiika abe a nya nyuvuri a nyini ŋa po kama mɛ. Fi ŋman te mi nyiŋyɔgsa kama ate m boro. 17Chekki, nyiŋdom ŋaai meena ate m nam la, ku nye a maari ka mi dek. Fi yaalika po, fi ta mi a nyini kaasuŋ vɔrumu po. Fi pai m wabaataŋa meena a basi ka fi ŋaaŋ. 18Diila boosuku an baga a pak fu, ate kum an baga a lenni fi pimpaukku. Baai ale a cheŋ vɔrumu po la a ka yiila ale fi wensieŋa. 19Ka baai ale vua la, bala ale a pak fu ase mi ale boro a nye dii jinla danni la. Koba a weeni ba bisa fi wensieŋa wie kama.

20Naawen ale vari mu a basi ate ti pai kpanuŋ a lenni yiila ti boka po meena Naawen yenni po.

21Azaya a jam weeni kama ayen, <<Kuri moota a fak japagni, ate wa ale nya nyiŋyɔgsa.>> 22Azekaya a jam bek kama ayen, <<Ka boa ale ku chim daana ayen mi ale cheŋ Naawen yenni?>>

Currently Selected:

Azaya 38: BWU

Highlight

Compare

Copy