Azaya 39

1Dila po Babilon naawa Baladan nidoabinni Merodak Baladan a jam ŋmarisi ka gbaŋ ale tiirim a tom te Azekaya, dii nyiŋla wa jam wom wa yuammu ale wa nyiŋyɔgsa nyaka kama. 2Azekaya yaa jam tuesi nuruma ale sak ba jaabuuri meena ale bo wa ŋanta duenika jigini la, ŋa jam ka kpana ale ligmɔniŋ ale ŋan baai ate ba pai a nyo jenta po la ale kpa naliŋ ale wa tugurik kɔlimaŋa ale jaab meena ate fi le nya wa jigi la. Jaab ka wa naab yenni po ale naamu meena po ate Azekaya an pai sak ba.

3Ate Wen biisiteerɔwa Azaya yaa cheŋ naab Azekaya jigi a bek wa ayen, <<Nuruma a jam weeni ayen ka boa, ba abe nyini ka bɛ?>> Azekaya yaa tulisi ayen, <<Ba nyini ka Babilon, tɛŋ kaai ale yalima.>> 4Wen biisiteerɔwa yaa bek wa ayen, <<Ba abe nya ka boa fi naab yenni po?>> Azekaya yaa tulisi ayen, <<Ba nya ka jaabuuri meena ale bo m naab yenni po la. Jaab an tali ya ate mi an pai a sak ba a nyini m jigi ya.>>

5Ate Azaya yaa weeni Azekaya ayen, <<Wom Naawen Dii Ale A Dɛ Tugurik Tɔŋdɔma Niŋ La wanni. 6Ku cheena ate jaabuuri meena ale bo fi naab yenni po la ale jaabuuri meena ate fi koma a yaali dueni a jam paari jinla de la, ba ale ji a ta cheŋ Babilon. Jaab a kan tali, ka Naawen ale a weeni. 7Ate fi ŋaaŋsa gela, fidek nyiŋka ale fidek ziimu baai ate ba za ba biak a te fu la, ba le ta ba a cheŋ, abe ba jɛ ba ate ba bo Babilon naawa yenni.>>

8Azekaya yaa tulisi ayen, <<Naawen wanni ate fi biisi la a nala kama.>> Diila wa poli kama ayen, <<Mi boka daaŋa po suiyɔgni ale likka ale boro.>>

Currently Selected:

Azaya 39: BWU

Highlight

Compare

Copy