Azaya 37

1Naab Azekaya ale ga wom kude la, wa yaa cheeri wa gattaŋa ale pai boorisa garuk a jo a cheŋ Naawen yenni po. 2Wa jam tom ka Eliakim waai ale a nya naab yenni tuima zuk la ale Sebna gbaŋ ŋmarisidoawa ale kaabteerɔ baai ale a dɛ niŋ la, ate ba meena a jo boorisa gatta ate ba cheŋ Amoz nidoabinni Azaya Wen biisiteerɔwa jigi. 3Ba yaa weeni wa ayen, <<Azekaya ale a weeni diila ale nna ayen, danni de ka daanika ale toariŋka ale chivie dai, ase ba nyiem ale boro a biak bisa dii ate ku paari diipo ate pagrim a karo a ŋusi a biak ba diila. 4Naawen fi Wenni a baga a wom wie ŋaai ate tugurik tɔŋdɔma niŋdeerɔwa kpagni Assiria Naawa a tom wa ayen wa jam nye Naawen vukku a la, ate Naawen ale toariŋ tugurik tɔŋdɔma niŋdeerɔwa ale wie ŋaai ate Naawen dii ale ka fi Wenni a wom la. Dila nyiŋ puusi a te baai ale vua a tali boro la.>>

5Naab Azekaya kpaŋŋa ale jam Azaya jigi la, 6Azaya yaa weeni ba ayen, <<Ni weeni Azekaya ayen, <Naawen ale weeni diila ale nna ayen, Kan yɔgsa ale Assiria naawa wieŋa ate fi a wom ate wa biisi a kaasi mi la. 7A wom de. M za m pai ka chiik a nyo wa po ate wa dan wom wari, wa ale ŋmani a cheŋ wadek tɛŋka, ate m le basi ate ba che wa ale gebik a lɔnsi.> >>

8Tugurik tɔŋdɔma kpagni ale jam wom ayen Assiria naawa a basi Lachis la, wa jam yeeri ka wadek a nya naawa a boro a kpaliŋ ale Libna.

9Yɔgyɔgla de Sennacherib a jam tuesi ka wari ayen Tiraka, Kus denɔwa Ejipiti naawa ale wa boro a gɔk santiri ayen wa kpaliŋ ale wa. Ase wa ale jam wom la, wa yaa tom nuruba ba cheŋ Azekaya jigi ale wanni de ayen, 10<<Weeni Juda naab Azekaya ayen, <Kan te ate Wen dii ate fi pai fi sebchakka a basi wa zuk la a paasi fu ase wa le a weeni fu ayen, <<Jerusalem a kan bo Assiria naawa nisa po.>> 11Fi sum wom Assiria nalimaŋa ale nye tɛŋsaŋa meena diila kama, a kaasi ba meena fi abe le nya varibasika? 12Mi kokpieŋsaŋa ale jam kaasi tɛŋ sii la wenaŋa a jam vari ba a basi ya, ase Gozan wenaŋa ale Yaran ale Arezef ale Eden nuru baai ale jam bo Tel Assar po la? 13Yamat naawa ale Arpad naawa ale Sefarvaim tɛŋka naawa ale Yena naawa yaase Ivva naawa a bo ka bɛ?> >>

14Azekaya yaa tuesi gbaŋka a nyini nuruma jigi a karim ka, a yaa cheŋ Naawen yenni a yaa lak ka a dueni Naawen niŋ. 15Azekaya yaa puusi te Naawen ayen, 16<<Naawen yaa, fi Waai Ale A Dɛ Tugurik Tɔŋdɔma Niŋ La, Izirali Wenni ate fi kala fi naam zukpaglika zuk a bo ŋanvutaŋa suŋsuŋ la, ka fi nyiini ale Wen naata meena zuk. Fi le nye wenŋmazukku ale tɛŋzuk de.#37:16 Yiila 99:1 17Naawen yaa, be lak tue a wom. Naawen yaa, be lak nina a nya. Wom wie ŋaai meena ate Sennacherib a tom te a lɛ Wen dii ale vua la.

18<<Naawen yaa, ku ka wensie ayen Assiria nalimaŋa a sum kaasi nuruma de meena kama ale ba tɛŋsaŋa. 19Ba yuk ba wenaŋa a basi ka bolim po ale kaasi ŋa, dii nyiŋla ŋa daa wena alege ka daata ale tana ate nurubiik a pai nisa a nye. 20Yɔgyɔgla de, Naawen ti Wen yaa, vari ti a nyini wa nisa po a basi, ate naataŋa meena ale bo tɛŋka zuk de la ale miŋ ayen ka fi nyiini, Naawen yaa, fi ale Wen.>>

21Dila Amoz nidoabinni Azaya yaa tom weeni Azekaya ayen, <<Naawen, Izirali Wenni ale a weeni ayen: Fi ale puusi a te mi a ta va chaab ale Sennacherib Assiria naawa la nyiŋ, 22Naawen ale biisi dii a basi wa zuk la ale nna: <<Zayon liewa ale kan seba nidoa la a zɛri fu kama ale nye fu a la. Fi ale yiti a cheŋ la, Jerusalem Liewa a girinti ka zuk. 23Ka wana ate fi a lɛ ale biisi wa a kaasi? Ka wana ate fi lak fi lueluk a basi wa zuwa ale pai fi kanjanta ninaŋa a basi wa nyiŋŋa? Ka Waai Ale Welema wadek wa nyiini a bo Izirali la. 24Fi tom ka fi tomteerɔma ate lieta a paari Nyɔnɔwa. Ate fi weeni ayen, <<M pai m torokoma a jueli guutaŋa zuk, Lebanon guutaŋa zukparuk. M che nyunyoŋtaŋa ale wɔŋa la a lɔnsi ale damɔnta tiisa ate ba lueri la. M paari ka kab tii ale kan cheŋ a paari la ale ka gɔi naliŋka. 25Mi tu vila ale nyu nyiam dula. M pai m naŋtaataŋa a nye ate Ejipiti beli naŋsaŋa a kpeeri.>>

26<< <Fi an wom ya? Ka mi ale nye dila dipo. Mi ale gomsi ŋiaka, ate yɔgyɔgla de m sum nye ate fi labri tɛŋ sii ale jam pagra la ate si chim tana a dua nna puula puula. 27Pagrim a kpeeri ba nuruma jigi, ba jɔk ka nyiŋbiiri ate ba jo chivie po. Ba a nye ase ka talim po ŋanborinta ale wuuta ale nyini a bo dɔk piluŋ zuk dii ate ŋa dan chim kantueŋ a nak ŋa a kɔ diila.

28<<M sebi fi ale bo juijui la kama ale sebi fi jamka ale fi chelim po ale fi sui ale a puuri ale mi diila. 29Fi suinni ale a puuri ale mi la nyiŋ ate m wom fi kanjanta wieŋa la nyiŋ, m le pai m gɔtika a su fi nyueŋa po, abe m pai m noabaŋka a su fi nɔnni po, abe m nye ate fi ale va suik kuui la, fi a ŋman va ku a ŋman jam.

30<<Azekaya kude ale ku chim daana ate fi nya: Benni de fi ale dɛ ŋan kayaata, ate ben dii ale a saari ŋaye la fi le dɛ a nyini ŋan baai ale nyini ŋan kayaataŋa po la. Alege ben dii ale a saari ŋata la, bori a che, be vuk tiisa a dɛ si yɔnaŋa. 31Juda yenni dem baai ale tali la ale feri tɛŋ naŋsa a yɔni yɔna ŋmazuk. 32Dila a nyini Jerusalem po nuruba ale tali, ate Zayon Guuku zuk nuru baai ale vuuk la ale boro, Naawen Dii Ale A Dɛ Tugurik Tɔŋdɔma Niŋ La ale a yaali diila ale za ku basi ate kude a nye.

33<<Dila nyiŋ Naawen ale weeni dii a magsi chaab ale Assiria naawa la ale nna ayen, Wa kan jo tɛŋka de po yaase wa tɔŋ pein dela. Wa kan cheŋ ka niŋ ale jaligimmoa, yaase wa baga a sɛ pimpitima a gilim ka. 34Naawen ale weeni ayen wa ale va suik kuui a jam la, wa le ŋman va ka ku dek a ŋman cheŋ. Wa a kan jo tɛŋka de po. 35M dek ale m tomteerɔwa Deevid nyiŋ, m le maari tɛŋka de abe m vari ka a basi.>>

36Naawen maarɔwa a cheŋ nyini kama a ko nuruba tusa kook ale pinaanuŋ ale banu (185,000) Assiria tigsuŋku jigini. Vanni ale veenti ate nuruma a yiti saluiku la, ba nya ka kpieba ale dua jigi meena. 37Ate Assiria naawa Sennacherib a waaŋ tigsuŋku ale yeeri wadek a nyini du ale ŋman cheŋ Niineve a ga bo dula a jam te ate naakuuni a waaŋ chaab ate wa jam pai kpaliŋka nyeka a basi ale ŋman cheŋ Niineve a ga bo dula.

38Dai yeŋ, ase wa ale jam bo wa wenni Nisrok yenni po a puusi la, ate wa nidoabilisaŋa Adrammelek ale Sarezer a jam pai gebik woŋ a che wa lɔnsi ale chali a ga suk Ararat tɛŋka po. Ate wa nidoabinni Esayaddon a tagri wa a chim naab.

Currently Selected:

Azaya 37: BWU

Highlight

Compare

Copy