Azaya 36

1Bena pi ale ŋanaansiwa po ate Azekaya a dɛ wa naamu la, ate Sennacherib ale ka Assiria naab la, a jam siti Juda tɛŋ kpieŋ sii meena ale ta parisa ate si pagra la a yik ba. 2Assiria naawa yaa tom wa tugurik tɔŋdɔma kpagni ale tugurik tommu ate ba nyini Lachis a cheŋ Naab Azekaya jigi Jerusalem po. Ase tugurik tɔŋdɔma kpagni ale jam zaani Ŋmazuk Benni la, suik kuui ate ba va a cheŋ Sugridɔwa Talimu la, 3ate Eliakim, Yilkia nidoabinni waai ale a nya naawa yenni tuimaŋa zuk la ale Sebna waai ale ka gbaŋ ŋmarisidoawa la ale Joa, Asaf nidoabinni teeridɔwa a yaa cheŋ wa jigi.

4Tugurik tɔŋdɔma kpagni a yaa weeni ba ayen, <<Weeni Azekaya ayen, <Naab kpioŋku, Assiria naawa ale a weeni diila la ale nna. Nama dek a tin pai ni sebchakka a basi ka boan jaab zuwa? 5Fi a weeni kama ayen fi ta zɔga ale tugurik tɔŋdɔba ate ba pagra, alege fi a weeni ka wie koruta. Fi pai fi sebchakka a basi ka wana zuwa, a zɛri mi nɔi ya? 6Be nya, fi pai fi sebchakka a basi ka Ejipiti zuk, wa ka bimbena dachek kaai ate fi dan sali ka, ka wɛ a lu fu a kɔni fu la. Baai meena ale pai ba sebchakka a basi Faaro Ejipiti naawa zuk la a nye ase ka dila la. 7Ate fi dan weeni mu ayen, <<Ti pai ti sebchakka a basi ka Naawen dii ale ka ti Wen la zuk.>> Daa wa kaabka pimpitimaŋa ale kuŋkuŋtaŋa ate Azekaya a jam yeeri la, a weeni Juda ale Jerusalem ayen, <<Ni magsi kama ayen ni puusi kuŋkuŋku de niŋ la?>>

8<< <Jam yɔgyɔgla de, biisi ale m kpagni Assiria naawa a magsi. M le te fu wusuma tusa ŋaye (2,000) ase fi nin baga a nya duerɔba ate ba a dɔ ŋa. 9Fi sebchakka ate fi ta ale Ejipiti a yaali wusuma torokoba ale wusum duerɔba la, fi ale nye ka sɛ a baga a poom zaani ale mi kpagni waai ale pɔsima ba po la? 10A ŋman gum du, mi jam a siti tɛŋka de a kaasi ka alege an wom wari a nyini Naawen jigi ya? Naawen dek ale weeni mi ayen m gɔk santiri a jueli tɛŋka de zuk a kaasi ka.> >>

11Ate Eliakim ale Sebna ale Joa a yaa weeni tugurik tɔŋdɔma niŋdeerɔwa ayen, <<Ti a saalim fu ayen biisi Araam biika ale fi tomteerɔma, ti le toalim a wom ka la. Kan biisi Yiburu ate nuru baai ale bo siaka zuk la a wom.>>

12Alege kpagni a tulisi ayen, <<Ka fi ale fi kpagni nyiŋ ate m kpagni a tom mu ayen m jam weeni wieŋa de, alege daa nuru baai ale kala siaka zuk la, ate ba a nye ase nama ate ba za ba dɛ badek daŋta abe ba nyu badek sinsam la?>>

13Ate kpagni yaa yiti zaani a weeni ale Yiburu biika ate ku nyini peelim ayen, <<Ni wom naab kpioŋku, Assiria naawa ale ta dii ayen wa weeni la. 14Naawa ale a weeni diila ale nna ayen, Ni kan te Azekaya a paasi ni. Wa an baga a vari ni a nyini mi nisa po a basi. 15Kan basi ate Azekaya a basi ate ni ta sebchakka ale Naawen ase wa le weeni ayen, <Naawen ale sum a vari ti a basi. Tɛŋka de a kan bo Assiria naawa nisa po.>#36:15 2 Nalima 18:30

16<<Assiria naawa ale weeni diila ale nna ayen, Ni kan wom Azekaya. Ni nye suiyɔgni ale mi abe ni nyini a jam mi jigi. Ate waai meena ale dɛ a nyini wadek talim po ale wadek kinkaŋ yona, abe wa nyu nyiam a nyini wadek vili po, 17ate m ga jam a ta ni a cheŋ tɛŋ kaai ale a nye ase fidek tɛŋ la, tɛŋ kaai ale ta ŋandiinta ale da paalik, tɛŋ kaai ale ta boroborok ale kaduksa la.

18<<Kan wom Azekaya dii nyiŋla wa a paasi ni kama ase wa ale weeni ayen, <Naawen ale vari ti a basi.> Tɛŋ wen a diem boro a baga a vari di nuruba a nyini Assiria naawa nisa po a nya? 19Yamat ale Arpad wenaŋa a bo ka bɛ? Sefarvaim wenaŋa a bo ka bɛ? Ba baga vari Samaria a nyini mi nisa po? 20Tɛŋsaŋa de meena wenaŋa dina ale baga a vari di nuruba a nyini mi jigi ya? Naawen abe le nye ka sɛ a baga a vari Jerusalem a nyini mi nisa po?>>

21Alege nuruma a jam nye ka chim an weeni wari a tulisi ya, dii nyiŋla naawa a jam weeni kama ayen, <<Kan tulisi wa wari ya.>>

22Ate Eliakim ale ka Yilkia nidoabili la, waai ale a nya naab yenni tuimaŋa zuk la ale Sebna waai ale ka gbaŋ ŋmarisidoa la ale Joa, Asaf nidoabinni, waai ale ka teeridɔ la, a jam cheŋ Azekaya jigi ale ba garuk cheerinta ale weeni Assiria naawa kpagni ale weeni ba diila.

Currently Selected:

Azaya 36: BWU

Highlight

Compare

Copy