Azaya 35
35
1Gɔnni ale tɛŋ kosikka ale nya suipeentik. Gɔnni ale de masim abe di busum. Ase puuta la, 2ti ale na pusi a nala. Ti ale dɛ masim nna yegayega abe ti a nye masim nuemka. Lebanon zulaŋa ale cheŋ ka jigi, ate Karmel ale Saaron nalimu ale cheŋ si jigi. Ba ale nya Naawen zulaŋa ale ti Wenni nalimu.
3Te ni sii ale wobsa la pagrim ale duna ŋaai ale a te suik la a kan baga a choa. 4Weeni baai kpaziita ale a nak la ayen, <<Ba pagra, ba kan yɔgsa. Ni Wenni ale jam, wa cheen kama ayen wa namsi ni dachaasaŋa ba ale pai biem buui meena a nye ni la nyiŋ. Wa ale jam a vari ni a basi.>>
5Ate yeeba nina ale lagri, ate tukpara nyam ale wom. 6Ate gbaniŋ ale yɔk a zi ase kab la, ate waai ale kan baga a biisi la ale nye masim nuemka. Nyiam ale nyini gɔnni po ate beli naŋsa ale bo tɛŋ kosikka po. 7Tɛŋ kaai ale a dɛ bolim la a chim beli, ate tɛŋ kaai ale kɔ la, ale buli nyiam. Juijui ate gɔi baasa a duak la, wuuta ale wobi ale bimbena ale chim dula jigini.
8Ate suik duok ale bo dula. Ba ale wi ku ayen Weleŋsa Suik. Nuru daŋtisa a kan va ku zuwa. Ku ale boro a magsi ka baai ale a va Suiku la nyiini. Baai ale ta gaasa ale chim betta la a kan va ku po. 9Gbeŋli a kan bo dula, yaase duŋ biok a cheŋ du. Si a kan bo dula. Alege ka baai ale nya da tuesika la ale za ba cheŋ va dula, 10ate Naawen nuru baai wa da tuesi la a ŋman pilim jam. Ba ale cheŋ ga jo Zayon ale yiila lennika. Taam wuu masim ale chim naam zutɔk a bo ba zuima. Suipeentik ale paari ba, ate niniga ale chivie ale nyini ba jigi.
Currently Selected:
Azaya 35: BWU
Highlight
Share
Compare
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
