Azaya 29

1Ku ale toa a te Ariel, tɛŋ kaai ate Deevid a kali ka po la. Ben meena ni kasim a nye ni kaabka kama. Ale a de ni tiŋŋa. 2Dila meena mi ale basi ate ba gilim Ariel tɛŋka. Wa le kum, abe wa nye ase juka kuŋkuŋ la a te mi. 3Mi ale gilim fi nuruma a ta chaab ale ba, abe m gilim ni ale yie woŋta abe m dueni bimbima a ta chaab ale ni. 4Fi ale siŋ tɛŋ, fi ale biisi a nyini ka tɛŋka. Fi ale waasi fi biika a nyini ka tɛŋka. Fi lueluku ale nye ase ka kɔk lueluk la a nyini tɛŋka zuk. Fi lueluku ale waasi a nyini ka tɛŋka.

5Alege fi dacha boanni ale nye ase ka viok ale a ji nyuŋ diila. Viok ale ji gaasa nuruma a basi ase ka vɔtta la. Ku ale kpabi kama, a diiri ba. 6Naawen Dii Ale A Dɛ Tugurik Tɔŋdɔma Niŋ La ale jam ale ka nanpansa ale tɛŋ choaka ale nuemka nna yegayega ale viok pagrik ale bolim ŋiak kaai ale a dɛ ŋanta. 7Ate tɛŋsaŋa meena dachaasaŋa ale kpaliŋ ale Ariel ale siti ka ale ka yie pagrisaŋa ale gilim ka la ale nye ase ka gɔdaasima ale pa sakka yok po la. 8Ba ale nye ase ka kom nuru ale goa a daasim ayen wa boro a de la, alege wa yiti ate kom a diem ta wa la. Ba ale nye ase ka nuru ate nyanyuila a ta wa la, ate wa goa daasim ayen wa boro a nyu nyiam la, alege ate wa yiti a wobsa ate nyanyuila ta wa la. Ku be le nye ka dila ale tɛŋsa nuru boanni ale a kpaliŋ ale Zayon Guuk la.

9Ni baŋ nidek ate ku cha ni, abe ni yi ate ni kaa nya. Ni buk, alege ku a kan chim daam nyuka. Ni a ja alege ku kan chim daam nyuka. 10Naawen a nye kama ate goom a jam ni jigi. Wa a lik wa biisiteerɔma nina kama. Wa ŋman lik wa biisiteerɔma zuimaŋa.

11Fi jigi pa sakka de meena ka kinla alege ka wie nyiini a lik bo gbaŋka po. Ate fi dan weeni waai ale baga a karim ayen, <<Wa karim kude, >> Wa ale tulisi ayen, <<Mi an baga. Ba lik ka kama.>> 12Yaase fi dan pai te waai ale kan baga a karim la, ayen <<Wa karim kude.>> Wa ale tulisi ayen, <<Mi zɛ karimka.>>

13Nyɔnɔwa a weeni kama ayen, <<Nuruma de a jam a moata mi ale ka ba noaŋa ale a zuli mi ale ba nɔngbanvaataŋa, alege ba suiniimaŋa a yalima ale mi kama. Ka nuruba ale sak ba wie ate ba pai wa ŋala nyiini a puusi mi. 14Dila nyiŋla, mi ale ŋman cha nuruma de ale wakinkagla. Yam nyam yam ale be, sebrɔba sebika ale muriŋ bɛ.>> 15Ku ale toa a te baai ale a siŋ liuŋ po nna niŋniŋa a suk Naawen a nye ba wie la, ale baai ale a nye ba wie legi po ale a poli ayen, <<Ka wana ale nya ti? Ka wana ale seba?>> 16Ni yik ka wie a tulim a basi tɛŋ, nna se mɛɛrɔwa ale tulim chim yak diila. Jaab ale weeni waai ale nye wa la ayen <<Wa an nye mi?>> Samɔniŋka ale baga a weeni mɛɛrɔwa ayen, <<Wa zɛ jaaboa?>>

17Ku a kan beni, ate Lebanon labri a chim tɛŋ poosukwa, ate tɛŋ poosuku a nye ase gɔi la? 18Dai dila danni, baai tue ale ka a wom la ale wom gbaŋka wieŋa ate legi po yeoba nina ale nya. 19Baai ale yik badek la ale ŋman nya masim Naawen nyiŋ. Ate baai ale a silim ŋanta la ale de masim Waai ale Welema a bo Izirali la nyiŋ. 20Baai nyeka ale toa la ale bɛ ate baai ale nye nuruba a la la ale muriŋ bɛ, ate baai meena ale pai nina a nya biem la ba ale gebi ba a lɔnsi tɛŋ. 21Baai ale a velim a te nuruba, ale baai ale pai nuru baai ale kan seba wari nɔi po a nyo wari po la, ale baai ale pai venta wie a nye ate baai ale kan seba wari nɔi po a kan nya wensie buusa la, Naawen ale kaasi ba.

22Dila nyiŋla, Naawen dii ale vari Abrayam a basi la, ale a weeni dii a te Jekob dɔkdemma la ale nna: <<Chivie a kan ŋman yik Jekob, chivie a kan ŋman bo ba nina po. 23Ba dan nya mi nisimaŋa tuima ba bisaŋa po, ba ale ta mi yuenni ale weleŋsa. Ba ale siak Jekob Weleŋsa Nyɔnɔwa weleŋsaŋa, abe ba zaani a pai zula a te Izirali Wenni. 24Baai tue ale kpari la ale miŋ biik kiri. Ate baai ale a fɔbili la ale siak sinsaga.>>

Currently Selected:

Azaya 29: BWU

Highlight

Copy