Azaya 21

1Wen wa dii ale magsi chaab ale Gɔnni ale moata Nyakpiemu la. Ase va pagrisa ale fuk va yeseoku geŋsa la, fɛ juerɔ ale nyini gɔnni po a jam, a nyini kpazinagsuk tɛŋ a jam.

2Kaasuŋ wie ate Naawen a pai sak mi. Bumbobrɔwa a bobri, varidɔwa mɛ a vari. Iilam demma a siti, Miidi demma a jam gilimka. Mi ale ta ŋuuni kaai meena ate ba nye la a jam kpeglimka jigi.

3Kude a basi kama ate m nyiŋka meena a chali a dom, nyiŋdomma ale paari mu ase nipok puuk ale a dom la. Mi ale wom diila a nye kama ate mi a ja. Dii ate m nya la a basi kama ate m butim. 4Mi suinum po m nye be kama, yɔgsum a basi kama ate m nyiŋ a gɔk, junɔinni ate mi a yiili la, a chim ka jabuui ate mi a kisa la.

5Ba gomsi ŋandiinta jazaanim, pai jaab a pati du, ba yaa dɛ ale nyu, nama kpaŋŋa ni yiti, ni nyo kpaam ŋanchɔgsintaŋa po. 6Nyɔnɔwa ale weeni mi diila ale nna, <<Te ate nuru a za nansuiŋku a nya abe wa weeni wa ale nya diila. 7Diipo meena wa dan nya torokoba ale wusuma beŋsa bon duerɔba, yaase laalaakomi duerɔba, wa abe kpesi wadek, a kpesi wadek a paari.>>

8Ate waai ale a nya la a na ayen, <<M nyɔnɔ, dai meena mi za a limisi gboŋku zuk kama, yok meena mi za ka dula. 9Nya nuru ale nna a bo toroko po a cheena ale wusuma beŋsa. Ate wa tulisika a ŋman te ayen, <<Babilon a lo ya, ka lo ya. Wa bɔgtaŋa ate ba mɛ a zaani la a lo paari ka tɛŋ munamuna.>>

10M nuruma, ba a fɔbi ni ase ka zaa la, alege mi ale weeni ni dii ate mi a wom a nyini Naawen Dii Ale A Dɛ Tugurik Tɔŋdɔma Niŋ La, Izirali Wenni jigi la.

11Naawen wa dii ale magsi chaab ale Duma la ale nna. A waai ale wi mi a nyini Seir ayen, <<Limisidɔ, yokku a tali soa ka sɛ? Limisidɔ, yokku a tali soa ka sɛ?>> 12Limisidɔwa yaa tulisi ayen, <<Saluik a cheena, alege yok mɛ a cheena. Fi abe daa a bek be bek abe fi ŋman jam.>>

13Naawen wa dii ale magsi chaab ale Arabia la ale nna. Nama Dedan nyiemdɔma ale ga bo Arabia tiisaŋa po la, 14ni ta nyiam a jam te baai ate nyanyuila a ta ba la. Nama baai ale bo Tema tɛŋka la, ni ta ŋandiinta a jam te baai ale a chali ba be la. 15Ba chali a be ka gebika, gebik kaai ate ba dari yeeri la, ale tom buui ale gbeeri la, a nyini kpaliŋka po.

16Nyɔnɔwa ale weeni mi diila ale nna, <<Bein yeŋ po, ase tuimtomdɔ ale a nye nɔiyeŋ ale tuini diila, Kedar ŋan baai ate ba pai a nye kpaliŋsa la ale kpeglim. 17Tɔŋdɔ baai ale vuuk la, Kedar tugurik tɔŋdɔma ale fiisa.>> Ka Naawen Dii Ale ka Izirali Wenni la ale biisi.

Currently Selected:

Azaya 21: BWU

Highlight

Copy