Azaya 22

1Naawen wa dii ale magsi chaab ale pa sakka viaka la ale nna: Ka boa ale a daani ni yɔgyɔgla de, ate ni meena a jueli gbirima zuima, 2tɛŋ kaai ate daanika a sueri ka la, tɛŋ kpieŋ kaai ate nuemka ale masim dɛka a sueri ka la? Ni nuruma daa gebik ate ba pai ko ba yaase ba kpi kpaliŋ po. 3Ni niŋdeerɔma meena maa chaab a yiti chali kama. Ba dachaasaŋa a yik ba kama ale an pai tom a tɔŋ ya. Nama baai ale a chali alege ate ni dachaasaŋa a bo niŋ la, ba a yik ni meena a lik kama. 4Dila nyiŋ mi yaa weeni ayen, <<Ni basi mi abe ni cheŋ. Basi mu ate m kum ale sui kaasuŋ. Ni kan yɔk m sui m nuruma kaasuŋku nyiŋŋa.>>

5Nyɔnɔwa, Naawen Dii Ale A Dɛ Tugurik Tɔŋdɔma Niŋ La a ta ka nuemka ale tabika kpazinagsuk dai pa sakka viaka po, parisa chub lɔnsika ale guuta kum teka dai. 6Iilam demma a pai ba peema pakka ale ba toroko duerɔma ale wusuma. Kir demma a gomsi ba kpaliŋ ŋanchɔgsintaŋa a magsi. 7Viak kaai ate ni lueri la, a sueri ale ka wusuma torokoba, ate wusum duerisa a za tɛŋ kpieŋka nansuiŋtaŋa. 8Ba yeeri baai ale a maari Juda la pagrimu kama. Ate dai dila danni ba a nya kpaliŋ kɔlima Tiisa Naam Yenni po. 9Fi nya kama ayen Deevid Tɛŋka parisaŋa a ta ka muulisa nna yegayega. Fi nyo nyiam Beli dii ale bo Tɛŋ la po. 10Fi chiini Jerusalem yeeŋa kama a yaa nak ŋa gela a lɔnsi ayen fi nye ate parika a pagra. 11Fi se ka nyiam nyoka jigi parisa siyewa suŋsuŋ a magsi Beli Kpakka nyiamu, alege fi an gisi a nya Waai ale nye dila la, yaase fi niŋ a bo Waai ale poli di wie dipo la.

12Ka Nyɔnɔwa, Naawen Dii Ale A Dɛ Tugurik Tɔŋdɔma Niŋ La ale wi fu dai dila ayen fi kum abe fi kaari, abe fi dari fi zuisaŋa a vɔssi abe fi jo boorisa garuk. 13Alege ni nya, suipeentik ale masim dɛka ale boro, niiga tɔgrika ale piisa koka, lanta ŋɔbika ale daam nyuka, <<Ni weeni kama ayen basi ate ti de abe ti a nyu ale chum ti baga a kpi kama.>>

14Ka Naawen Dii Ale A Dɛ Tugurik Tɔŋdɔma Niŋ La ale pai wanni de a sak mi ate m wom ayen, <<Kan daa ni kummu danni biemu de a kan nya duisi basika ka Nyɔnɔwa, Naawen Dii Ale A Dɛ Tugurik Tɔŋdɔma Niŋ La ale weeni.

15Nyɔnɔwa, Naawen Dii Ale A Dɛ Tugurik Tɔŋdɔma Niŋ La ale weeni ayen, <<Cheŋ ga weeni Sebna nyaarɔwa ale a nya naab yenni zuk la ayen. 16Ka boa ate fi bo dela a nye, ka wana ale te fi suik ayen fi keri boosuk a te fidek dela, a keri fi boosuku ŋmazukku dela ale a keri fi vuusumu jigini piuŋku po?

17<<Be seba, Naawen a za wa yik fu kama giŋgiŋ yuk fu a basi, Fi nuru kpioŋku. 18Wa ale kpamsi fu kama nna ŋmapi ase gbeli la a yuk fu basi tɛŋ kpieŋ po. Ate fi ale kpi dula ate fi wusuma toroko naliŋsaŋa ale wari du. Fi ka chivie a te fi kpagni yenni. 19Mi ale yeeri fi kpaŋtaŋa po, ate fi jɔk kpaŋtaŋa.

20<<Dai dila danni mi ale wi m tomteerɔwa, Eliakim ale ka Yilkia nidoabili la. 21M le pai ka fi naam garukku a jo wa, abe m pai fi garuk panni bobi wa, a yaa pai fi pagrimu a te wa. Wa ale chim ka baai ale bo Jerusalem ale Juda yenni la koa. 22M le pai ka Deevid yenni saafiika a vi wa ŋmankpala. Ate wa ale a lak jabuui la, waai an baga a kpari, ate wa ale a kpari jabuui la waai an baga a lagi. 23M le feri wa ase kpaasiri ate ba nak a feri diila, Wa ale ta zula a jam wa kowa yenni po. 24Wa dɔkdemma zulaŋa meena ale bo ka wa jigi, wa bisa ale wa ŋaaŋbisa meena ale wa yenni ŋantomta meena.

25Naawen Dii Ale A Dɛ Tugurik Tɔŋdɔma Niŋ La ale weeni ayen, <<Kpaasini ale feri tɛŋ kaai la ale baliŋ, ate kpaasini a voori, ate ŋan baai meena ale yik di nyiŋla a gebi lo.>> Ka Naawen ale biisi.

Currently Selected:

Azaya 22: BWU

Highlight

Copy