Azaya 19

1Naawen wa dii ale magsi chaab ale Ejipiti la ale nna: Nya, Naawen a do ka chiŋmari a cheena Ejipiti demma po. Ejipiti bɔgtaŋa kpaziita a nak wa niŋ, ate Ejipiti demma a ŋiak.

2<<M le siti Ejipiti dem nyiini a basi chaab zuk, ate waai ale wa suok ale kpaliŋ chaab, ate baai yie ale moata chaab ale ta chaab, ate tɛŋ kpieŋsa ale ta chaab, ate nalima mɛ ale ta chaab. 3Ejipiti demma ale jɔk nyiŋbiiri, mi ale basi ate ba le ta popola ŋaai meena la, ale chim kinla. Ba le ga kpesi nyini bɔgta ale kpilima ale sampoporisa ale chichirik wiirisa jigi. 4M le pai Ejipiti demma a nyo ka kpagi dii nyeka ale toa la nisima po, ate naab waai nyeka ale toa la ate wa a nya ba zuk.>> Ka Nyɔnɔwa, Naawen Dii Ale A Dɛ Tugurik Tɔŋdɔma Niŋ La ale weeni.

5Benni nyaataŋa ale kpeeri, ate benni tɛŋka ale toliŋ a ko. 6Nyiam vuutaŋa ale kasim a nyuŋ kama ate Ejipiti beli naŋsaŋa ale si abe ŋa kpeeri. Bimbenaŋa ale wobini ale kpi, 7wuuk tii mɛ ale bo Nile benni nɔi la ale laŋ meena ate ba bori Nile benni nɔi la ale kpi, ate viok a fuk ŋa a basi ate ŋa a kan ŋman boro. 8Jum yigrisa ale kum a ŋusi, baai meena ale a lusi gɔtisa Nile benni po la, baai ale a yuk ŋmaasa la ale buk be, 9baai ale pai gungunta a tom tuima la ale jɔk yiila, baai mɛ ale a yɔk garuk naliŋsa la ale jɔk yiila, 10baai ale a tom gatta tuima la sue a kan peenti, baai mɛ ale a tuesi tutuna la sue ale kaasi.

11Zoan kpaŋŋa daa ŋanta alege ka betta. Faaro yam sagrɔma a kan te yam sinsaga. Fi ale nye ka sɛ a weeni Faaro ayen, <<Mi ka yam nuruma po wanyi, ale dipo nalimaŋa ŋaaŋviirɔ?>>

12Fi yam nuruma a bo ka be yɔgyɔgla? Basi ate ba sak fu abe ba basi ate fi miŋ dii ate Naawen Dii Ale A Dɛ Tugurik Tɔŋdɔma Niŋ La ale zɔk dii a ta chaab ale Ejipiti la. 13Zoan tɛŋka kpaŋŋa a chim ka betta, ate ba a paasi Memfis tɛŋka niŋdeerɔma. Ka nuruma gugottaŋa tintanaŋa a ta Ejipiti nuruma a cheŋ bɛ kama. 14Naawen a pai ka nimbigilugsuk chiik a te ba. Ba nye ate Ejipiti demma a ja ba wie meena nyeka po ase danyuirik ale a ja wa chichiita po diila. 15Ejipiti demma an baga badek wari a nye, zuk yaase jiuk, yaase kpinkparuk yaase binbein.

16Da dila danni, Ejipiti demma ale nye ase ka nipooba la. Ba nyiŋsa ale gɔk ate ba kpaziita nak ase Naawen Dii Ale A Dɛ Tugurik Tɔŋdɔma Niŋ La a nin zak wa nisa a ta chaab ale ba. 17Ate Juda tɛŋka ale ta yɔgsum a jam Ejipiti demma zuk. Tɛŋ sii meena ale a wom Juda wari la yɔgsum ale yik ba, Naawen Dii Ale A Dɛ Tugurik Tɔŋdɔma Niŋ La ale zɔk dii a ta chaab ale ba la nyiŋ.

18Dai dila danni tɛŋ kpieŋsa Ejipiti po ale biisi Keenan biika abe ba pɛ siak te Naawen Dii Ale A Dɛ Tugurik Tɔŋdɔma Niŋ La. Ba ale wi tɛŋsaŋa kanyi ayen Kaasuŋ Tɛŋ.

19Dai dila danni, Naawen ale ta ka kaabka kuŋkuŋ Ejipiti tɛŋka suŋsuŋ. Ale ŋan mɛɛnta a te Naawen tɛŋka banni. 20Ku ale chim ka daana ale seerɔ a te Naawen Dii Ale A Dɛ Tugurik Tɔŋdɔma Niŋ La Ejipiti tɛŋka po. Ba dan kum a te Naawen baai ale a namsi ba la niŋ, wa le tom varibasidɔ ale maarɔ ba jigi ate wa vari ba a basi. 21Ate Naawen ale basi ate Ejipiti demma a miŋ wa, ate dai dila danni ba ale siak a te Naawen. Ba ale puusi wa ale kaabsa ale ŋandiinta tiirita. Ba ale puulim a te Naawen, abe ba ta pumpuulimaŋa. 22Naawen ale namsi Ejipiti ale nyiŋtuila abe wa ŋman tebi ba. Ba le ŋmani Naawen jigi ate wa tulisi ba funfɔblaŋa abe wa tebi ba.

23Dai dila danni, suik duok ale nyini Ejipiti a cheŋ Assiria. Assiria demma ale cheŋ Ejipiti ate Ejipiti demma ale cheŋ Assiria. Ba ale gum chaab a puusi Naawen. 24Dai dila danni, Izirali ale saari buta a gum chaab ale Ejipiti ale Assiria a chim niauŋ tɛŋka zuk. 25Naawen Dii Ale A Dɛ Tugurik Tɔŋdɔma Niŋ La ale niak ba abe wa a weeni ayen, <<Niauŋ a bo Ejipiti demma mi nuruma jigi, niauŋ a bo Assiria demma mi nisima tuimaŋa jigi ale Izirali demma mi nitalimu jigi.>>

Currently Selected:

Azaya 19: BWU

Highlight

Copy