Galatia 3

1Nama Galatia demma ka betta. Ka wana ale pai wa pagrim a te nama ayen ni basi Wen suiku vaka? Tama an nyini peelim a sak ni Yeezu Kirisita ale kpi wa jabarimu nyiŋ diila? Nama be an jam siak kama ayen ti wieŋa ka wensie? 2Mi a yaali ayen m bek ni ka wayeŋ dekki. Wen ale jam pai wa Chiika a te ni la, ni jam baga va Moosis Sinsaŋŋa a nueri nalimnyiini, yaase ni jam wom wa wamaŋsaŋa alege ta siaka ale ŋa? 3Ni bola ka betta. Ni liŋ va ka Wen Chiika pagrimu, alege yɔgyɔgla ni a yaali kama ayen ni pai nidek pagrim a ga nueri. 4Wakperikaliik tanjaŋa nna yegayega ale nye ni jigi. Nama dek abe a poli ayen ŋa nye ka kayiok nyiŋŋa? Ni kan basi ate ŋa chim wakayaata a te ni. 5Naawen ale jam pai wa Chiika tom wakperikaliisa a te ni la, wa jam nye dila ayen ka ku sak ayen ka ni ale a va Moosis Sinsaŋŋa nalimnyiini la nyiŋŋa? Aaya, ku ka ni ale wom wa wamaŋsaŋa ale ta siaka ale ŋa la nyiŋ.

6Ni poli Abrayam wari, <<Wa jam ta siaka ale Naawen kama ate wa a wi wa ayen wayɔrisima nyɔnɔ.>> (Piilimka 15:6) 7Dila nyiŋ, ku a fɛ kama ayen ni miŋ chak baai ale ta siaka ale Naawen la, bala ale sum ka Abrayam ŋaaŋbisa. 8Ba jam ŋmarisi Wen Gbaŋka po ayen, chum diipo ku le jam chim ka nuruba siaka ale wa nyiŋ ale ku basi ate Naawen nya baai ale kan daa Juuba la ayen ba ka wayɔrisima nyam. Gbaŋka de po ba ŋman pilim ŋmarisi ayen Naawen jam weeni Abrayam ayen, <<Ka fi nyiŋ ate m le niak nurubiik meena ale bo tɛŋzuk de la.>> (Piilimka 12:3) 9Dila nyiŋla, ase Abrayam ale jam ta siaka dii a nya niaka la, suik kula po mɛ, Wen a niak waai meena ale ta siaka ale wa la kama ase Abrayam la.

10Alege nuru baai meena ale a va Moosis Sinsaŋŋa nyiini ate wa pai te Juuma la ale ge a poli ayen ŋa le ŋa basi ate ba chim wayɔrisima nyam Wen niŋ la, Wen kikaasa a cheena ba zuk kama. Dii nyiŋla, ku ŋmarisi ayen, <<Waai meena ale kan a nye sinsaŋŋa ale a weeni dii meena la, Wen kikaasaŋa a cheena bala zuk kama.>> (Teerika 27:26) 11Alege yɔgyɔgla de ti yaa seba kama ayen nuru karo a kasim va sinsaŋŋa a chim wayɔrisima nyɔnɔ Wen jigi dii nyiŋla, ku ŋmarisi ayen, <<Wayɔrisima nyɔnɔwa a vuuk kama wa siaka nyiŋ.>> (Yabakkuk 2:4) 12Alege wanni ale ka diila, sinsaŋŋa ka wari a nye ale waai a nin ta siaka ale Wen. Alege ku goanti a nye ase ka ba ale ŋmarisi Wen Gbaŋka po dii ayen, <<Waai ale a va sinsaŋŋa ale weeni diila, ale vuuk kama ŋa nyiŋ.>> (Kaabka 18:5) 13Kirisita a da tuesi ti sinsaŋŋa kikaasa po a basi kama a yaa chim kikaasa a te tama, diila ku ŋmarisi ayen, <<Kikaasa a bo waai meena zuk ate ba yik a kpi tiib nyiŋla.>> (Teerika 21:23) 14Yeezu Kirisita be nye dila kama ayen baai ale kan daa Juuba la a maa nya niak kaai ate Naawen puulim ayen wa le nye te Abrayam la ayen ti siaka nyiŋ ti le nya Wen Chiika ate Wen puulim ayen wa le te la.

15M suata ni basi ate m pai tɛŋzuk de wari a magsi nyaku ate ni miŋ ku kiri chak. Ase nuruba baye a nin nye nɔiyeŋ a magsi chaab ale wari, nuru karo ale baga kaasi ba nɔiyeŋka de nyeka a yaase wa pai wari di choa a gum nɔiyeŋka de nyeka po. Dii nyiŋla, ba ale maa chaab a nye diila ba nye nueri kama. 16Suik kula po, ku be ka dila ale Wen ale jam nye nɔiyeŋ kaai ale Abrayam la. Dila po wa Wen jam nye ka pumpuulima ale Abrayam ale wa ŋaaŋbisaŋa. Wen Gbaŋka be kan weeni a sak ti kama ayen Wen nye puulimka de a magsi chaab ale ka ŋaaŋbiik boari ya. Ku ka ŋaaŋbiyeŋ. Bi yeŋka de abe ale Kirisita.#3:16 Piilimka 12:7 17Mi ale a weeni diila kiri ale nna ayen, dila powa ate Wen jam nye nɔiyeŋka de ale ka Abrayam. Bena kobsinaansi ale pisita ale jam taam alege ate Wen yaa te Juuma wa sinsaŋŋa. Sinsaŋŋa de abe ŋman ka pagrim a baga a kaasi nɔiyeŋka de ate Wen nye ale Abrayam la. 18Ku daam dan ka Sinsaŋŋa nyiŋ ale soa ate Wen te Abrayam tiirim bula, ku yaa be te sak kama ayen ŋman daa wa ale puulim la nyiŋ ale soa ate wa nye dila a te wa. Alege ku ale ka diila tama seba chak kama ayen, ku ka Wen pumpuulimaŋa ate wa jam puulim ale Abrayam la nyiŋ ale soa ate Wen lak poi te wa tiirimu.

19Ku be dan ka dila, Sinsaŋŋa kiri abe le boa? Sinsaŋŋa a gumdu kama ayen ŋa sak wakaasima ale ka diila, abe ŋa boro a ta ga paari diipo ate Abrayam ŋaaŋbiika ale jam la. Be ka ŋaaŋbiik kala ate Wen nye pumpuulimaŋa a te la. Wen jam pai sinsaŋŋa a nyo ka wa maarɔma nisima po ayen nuru a yaa be chim Wen ale nurubiik sanyigmoa. 20Alege ku an poom magsi ayen sanyigmoa bo ti suŋsuŋŋa dii nyiŋla, yigma a bo ka nuruba baye suŋsuŋ alege ka nuru yeŋ ale boro, Wen ka wanyi dekki. 21Nya kude abe a sak kama ayen Moosis Sinsaŋŋa an va ale Wen ale puulim dii ale Abrayam la? Aaya, ku daa di. Ase sinsaŋŋa a daam dan boro a baga a te nurubiik nyuvuri, ŋa te baga a nye kama mɛ ate nurubiik a chim wayɔrisima nyɔnɔ Wen jigi ase ba ale a zuli sinsaŋŋa. Alege sinsaŋŋa ŋala chaab karo. 22Alege Wen Gbaŋka weeni sak ti kama ayen waai meena tɛŋzuk de a kasim a yaali ka biem tuima tomka. Nya kude yaa be a sak kama ayen, ku ka siaka ale a basi ate ti a nya tiirim buui ate Wen pai a te ti la, baai mɛ abe ale ta siaka ale Yeezu Kirisita la ale ta bu.

23Diipo ate suiku an diem jam lak ayen nuruba ta siaka ale Yeezu la, ku jam a nye ase Moosis Sinsaŋŋa a liŋ jam yik ti kama a lik ase ligrɔba la ate ku ŋaaŋnyiŋ Wen yaa jam lak suiku ate ti yaa ta siaka ale Yeezu Kirisita. 24Dila nyiŋla, Sinsaŋŋa ale jam soa ti a ga paari diipo ate Yeezu jam la, ayen siaka ale wa ale ku basi ate tama yaa chim wayɔrisima nyam Wen jigi. 25Yɔgyɔgla ate ti ta siaka ale Yeezu Kirisita la, sinsaŋŋa an ŋman soa ti.

26Ku a fɛ ayen ni teeri ayen, nama meena baai ale chim bunyi ale Yeezu Kirisita la, ni ka Wen nidoabilisaŋa ni ale ta siaka la nyiŋ. 27Yɔgyɔgla de ate nama tuesi soka la, nama ale Yeezu Kirisita ka bunyi. Dila nyiŋ, ni yaa be a nye ase Yeezu Kirisita ale ka diila. 28Dila nyiŋla, fi ka Juu yoo, fi daa Juu yoo, ni daa tɔgatɔga. Fi ka yɔma yoo fi daa yɔma yoo, ni daa tɔgatɔga. Fi ka nidoa yoo, fi ka nipok yoo, ni meena ka bunyi. Dii nyiŋla, nama meena ka bunyi ale Yeezu Kirisita. 29Yeezu Kirisita abe dan soa ni, ni be ka Abrayam ŋaaŋbisa. Ni be le nya Wen ale puulim ayen wa te Abrayam jabuui la kama.

Currently Selected:

Galatia 3: BWU

Highlight

Copy

Compare