Galatia 2

1Mi ale jam liŋ cheŋ Jerusalem bena pi ale ŋanaansi ale taam la, mi jam pilim ŋman cheŋ Jerusalem kama. M jam va ka Banabas ale Titus a cheŋ. 2Naawen dek ale jam weeni sak mu ayen m cheŋ dula. Tama ale Yeezu ŋaaŋviirɔma ale jam bo dula la, kpaŋŋa nyiini ale jam tu chaab ate mi weeni sak ba m le sak baai ale kan daa Juuba la Wen wamaŋsaŋa. M jam kan yaali ayen ba poli ayen tuim ŋaai ate m jam a tom a te Wen la ka tuim kayaata. 3Titus waai ale jam maa va mi la, a jam ka Girik denɔ, alege ba an fɛ wa ayen wa gebi wa yɔni ate ku sak ayen wa sum ka Juu. 4Nuruba ba gela baai ale jam a weeni ayen ba ka Yeezu ŋaaŋviirɔba la, a jam a yaali kama ayen wa gebi wa yɔni, alege ba jam a velim kama ayen ba ka Yeezu ŋaaŋviirɔba. Ba jam suk kama a maa jo tama po ayen ba nya ti le ti nye dii a ta nɔiyeŋ ale Yeezu ate ti chim bunyi la. Ba jam a yaali kama ayen ba nye ate tama chim ase yɔm la. 5Alege tama ale jam a yaali ayen ti nye ate Wen wamaŋsaŋa wensieŋa a boro a te ni la, ti an jam bola siak a te ba ale fiik fiik mɛ la.

6Alege baai ale jam a poli ayen ba ka kpaga la, ba an jam nya wari dii dek chekki ale ka venta a bo Wen wamaŋsaŋa ate mi jam sak la po. Ba an weeni wari dii ale ka di tɔga a chim wapaali la a sak mi. Ba ka kpaga yaa ba daa kpaga mi an nya wari dii ale ka di tɔga wanni de po la. Dii nyiŋla, Wen an va daa nuru peelim nyeka a bo wa buusa. 7Alege kpaŋŋa de nya kama ale Wen pai tuini de a te mi ayen mi a sak nuru baai ale kan daa Juuba la wa wamaŋsaŋa, ase wa ale basi ate Piita a sak Juuma wamaŋsaŋa de la. 8Dii nyiŋla, Wen jam pai wa pagrimu a te mi kama ayen m chim wa tuimtomdɔ a sak nuru baai ale kan daa Juuba la ase wa ale basi ate Piita mɛ a sak baai ale ka Juuba la. 9Jeemsi ale Sifas ale Jɔɔn baai ate mi jam a poli ayen bala ale kpaŋŋa la, a jam miŋ kama ayen ka Wen ale pai tuini de a te mi. Dila nyiŋ, ba yaa jam diak Banabas ale mi nisima ayen ku sak ayen ti meena a tom ka tuin yeŋka. Ti meena yaa jam siak ayen Banabas ale mi a maa chaab boro ale nuru baai ale kan daa Juuba la a tom ti tuimaŋa abe ba mɛ bo ale Juuma a tom ale ba mɛ. 10Ba yaa jam weeni wari dii ate mi potim a yaali ayen m nye la, ayen ti a teeri ŋanjaksaŋa ale maa boro ale ba Jerusalem tɛŋka la.

11Daa maga ale taam la, ate Sifas yaa jam Antiok. Dula jigini, mi jam toariŋ wa kama wa Kirisita bisa chaama niŋ dii nyiŋla, wa sum jam kaasi kama. Wa jam nye ka dii ale kan nala la nuruma niŋ. 12Piita deri poom jam dɛ ŋandiintaŋa kama ale baai ale kan daa Juuba la alege ate nuru baai ale jam bo ale Jeemsi la, a yaa jam a paari. Nuruma ale jam a paari la, Piita yaa deri basi dɛka ale nuruma dii nyiŋla, wa jam a chali ka yɔgsum ale baai ale jam maa siak ayen baai ale kan daa Juuba la a gebi ba yoaŋa la. 13Kirisita bisaŋa baai ale jam ka Juuba la, bala mɛ yaa deri maa pai badek a gum chaab ale Sifas a nye sakpaŋzula. Banabas a jam maa va ba sakpaŋzulaŋa nyiŋ nye bɛ. 14Mi ale nya ale ba kan va Naawen wamaŋsaŋa ale a sak ti wensie ŋaai la, mi yaa weeni Sifas ba meena niŋ ayen, <<Fi Sifas, ka Juu alege fi boka ale fi nyeka a nye ase ka baai ale kan daa Juuba la. Ka boa ale soa ate fi a yaali ayen fi fɛ nuru baai ale kan daa Juuba la? Ka boa mɛ abe ale soa ate fi pii nyiŋ a nye ayen fi fɛ baai ale kan daa Juuba la ayen ba basi ate ba nyeka a nye ase baai ale ka Juuba la nyeka?>>

15Wensie, tama dek potim ka Juuba. Ti daa baai ale kan daa Juuba ate ba a wi ba ayen wabanyeerisa la. 16Alege tama seba kama ayen ka siaka nyiini ale Kirisita ale basi ate nuru a chim wayɔrisima nyɔnɔ Naawen jigi. Ku daa ayen ka fi ale a nye tama Moosis Sinsaŋŋa ale a weeni diila nyiini. Tama mɛ abe sum siak kama a te Kirisita ayen ku basi ate ti chim wayɔrisima nyam Naawen jigi ti siaka nyiŋ. Ku daa ayen ti a nye a va ka Sinsaŋŋa ale a weeni diila, dii nyiŋla, waai karo a chim wayɔrisima nyɔnɔ Wen jigi Sinsaŋŋa vaka nyiini nyiŋŋa. 17Ku be dan ka wensie ayen tama baai ale a gisi suik kuui ale ku basi ate ti chim wayɔrisima nyam Wen jigi ase tama ale Kirisita a nin ka bunyi la, ti diem a nya tidek ase ka wabanyeerisa ase baai ale kan daa Juuba ale ka diila. Nya kude be a sak kama ayen ka Kirisita ale soa ate tama a tom wabaata? Aaya, suik karo ate Kirisita nye dila. 18Ase mi a dan weeni ayen sinsaŋŋa a kan basi ate ti a chim wayɔrisima nyama, ka boa ale soa ate mi ŋman a va Sinsaŋŋa. Mi a dan nye dila mi a nye a kaasi ka Sinsaŋŋa. 19Sinsak ŋala dekdega abe ale ŋman basi ate mi seba ayen mi kpi kama dii nyiŋla, m le kan va ŋa ale a weeni diila nyiŋ. Dila nyiŋ abe ale soa ate mi ŋman ka siaka ale ŋa. Dila abe basi kama ate m boro a te Wen. Diipo ate nuruba yik Kirisita kpi jabarimu nyiŋla, ku a nye a ase ba jam maa kpi mi mɛ kama ate ti yaa maa chaab kpi la. 20Dila abe ale soa ate mi dek an ŋman vua m dek nyiŋla. Nyuvuri dii ate mi ta tɛŋzuk de yɔgyɔgla la, ka Kirisita vummu ale bo m po. M vua kama dii nyiŋla, m ta siaka ale Wen Nidoabinni waai ale ta yaalika ale mi a yaa jɔk wa nyuvunni mi nyiŋla kama. 21M zɛri kama ayen mi kan ŋman a weeni ayen mi kan yaali Wen ŋmanteka. Alege waai a dan poli ayen ka sinsaŋŋa nyiŋ ale soa ate wa chim wayɔrisima nyɔnɔ, dila a sak kama ayen Kirisita kpi ka kinla nyiŋ.

Currently Selected:

Galatia 2: BWU

Highlight

Copy

Compare