Galatia 4

1Ni basi ate m ŋman tɔk wanni de a sak ni. Ku a nye se ka biik ale ka soa ka ko ŋanta ase ka kowa a nin kpi la. Biika ale ka biik diipo la, nuruba a nye wa ase wa ka yɔma la. Alege, ka wala dek le wa jam soa wa kowa ŋantaŋa meena. 2Diipo ate biika diem ka biik la, wa kowa ale a nya ka zuk, a tom wa wie a te wa, ate ku ga paari diipo ate wa kowa a yaali la. 3Ku be ka dila tama mɛ jigi. Ti jam ka chichirik pagri sii ale soa tɛŋka a nya la yɔm, alege ate ti jam pagra ale Yeezu Kirisita. 4Alege dai dii danni ate Wen dek dak ate di jam la, wa yaa tom wa Nidoabili yeŋka ayen wa jam tɛŋzuk de. Nipok ale jam biak wa. Wa be va Sinsak ŋaai meena ate Wen jam pai te Juuma la kama nalimnyiini. 5Wa jam a nye dila kama dii nyiŋla, wa jam a yaali kama ayen wa da tuesi baai meena ate Sinsaŋŋa soa la a basi. Wa dan nye dila, ti meena yaa le chim Wen bisa. 6Dii ale a sak ayen ni ka wa bisa la ale, Wen basi kama ate wa Biika Chiika jo ti suiniima po. Chiika de abe ale basi ate ti wanyi wanyi kaari a wi Wen ayen, <<M dek koa!>> 7Dila nyiŋla, fi ŋman daa yɔma, fi ka Wen biik. Fi be ale ka wa biik la, Wen le pai jaabuuri meena ate wa tara ayen wa pai te wa nidoabinni la a te fu kama.

8Diipo ate ni diem jam zɛ Wen la, ni jam ka bɔgluk tii ale kan ta pagrim ase wen la yɔm. 9Alege yɔgyɔgla de ate ni seba Wen la, yaase ni basi ate m weeni ku nna ayen, Wen ale toliŋ weeni ayen wa seba ayen ni ka wa bisa la, be ka boa ale ŋman soa ate nama ŋman a va chichirik sii ale soa tɛŋka a nya la? Si be ka pagrimoa. Ni dan ŋman nye dila, ni le ŋman chim ka si yɔm. 10Be ka boa ale soa mɛ ate ni potim a zuli daaŋa gela, yaase chiisa gela, yaase wenkarisa ale yuei yaase bena gela? 11Nyaŋa de ate ni a nye la basi kama ate yɔgsum ta mu ale ni. Nya kude a sak kama ayen wie ŋaai meena ate mi a nye ayen ku maari ni la ka kinla nyiŋ yaa boa?

12M suata, mi a saalim ni kama ayen, ni a nye ase mi la, ase mi ale a nye ase nama diila. Ni an nye mu wari a kaasi ya. 13Ni baga a teeri diipo ate m liŋ jam sak ni Wen wieŋa la? Dii nyiŋ ate m jam a goa ale ni la ale dipo m jam ka nyiŋyɔgsa. 14Alege m baga a weeni kama ayen, m nyiŋtuilaŋa jam daani ni kama alege, ni jam tagri mi zuk kama a nya ninam m tuemu nyiŋ. Ni an jam zɛri mu yaase ni pai mu chim nuru kayiokwa. Alege ni tuesi mu kama nalimnyiini ase ni tuesi ka Wen maarɔ la. Wensie, ni tuesi mi nna ase ni tuesi ka Yeezu Kirisita dek la. 15Ni sue jam peenti ka nna yegayega mi nyiŋ. Alege ka boa ale ŋman nye? Mi dek a baga a weeni kama ayen ku dan poom siak a nye kama ni ti yeeri ni ninaŋa a te mu kama. 16Mi ale weeni ni wensieŋa la, ku basi kama ate mi yaa chim ni dachiaga? 17Nuru bala chaab ale a sak ni la a nye ni jigi ase ba a yaali ni kama la, alege popola ŋaai ate ba ta magsi chaab ale ni la, ka popola baata. Dii meena ate ba a yaali ayen ba nye la ale, ba poori mi ale nama tɔgatɔga, ate ku basi ate mi ta ba popola nalimnyiini ase ba ale ta nama popola nalimnyiini diila. 18Ku nala kama ate nuruba ta chaab popola nalimnyiini ase ba popolaŋa a nin ka popola maŋsa. Nya kude ate mi a weeni nna abe sum ka wensie diipo meena wuu. Mi dek poom a yaali kama ale nin muna ni ale ta mi popola diipo meena la, ase m boro ale ni yaa m karo ale ni. 19M dek bisa, ku a nye mi jigi ase ka nipok ale boro a biak diila. Mi kasim a nam ka dila te ku paari diipo ate m nya ale ni ta nye kaai choa ate Kirisita ta la. 20M dan baga kama ate m boro ale ni ate m seba m le nye ni diila. M bola zɛ m le m weeni ni ka diila.

21Nama baai ale a weeni ayen Sinsaŋŋa ale soa nama la, ni basi ate m bek ni ayen, nama an diem wom Sinsak ŋala ale a weeni ni diila? Ni goori wom ŋa ale a weeni diila ayen, 22Ba ŋmarisi Wen Gbaŋka po ayen, Abrayam jam ta ka nidoabilisa baye. Wa jam biak wanyiwa ale ka wa powa Saara yɔma wa. A biak wanyi wa mɛ ale Saara. Wala jam daa yɔma. Nipok yɔmawa yue jam ale Aga.#4:22 Piilimka 16-21 23Aga jam biak wa biika kama alege ku an jam va daa Wen ale puulim ale Abrayam diila. Saara jam biak wa biika a ta va ka Wen ale jam puulim dii ale Abrayam la. 24Wanni de abe a sak ti ka wakpienni dii ale ka wensie. Di kiri ale, nipooma de Aga ale Saara a ta ka nɔiyeŋsa buye ate Wen jam nye. Nipok yɔmawa Aga tagri ka nɔiyeŋ kaai ate Naawen jam nye ale Moosis Sinai guuku zuk la. Ni teeri ayen nipowa de bisaŋa meena ka yɔm.#4:24 Nyinika 19-24 25Ase Aga ale tagri nɔiyeŋka dɛ ate Naawen nye Sinai Guuku zuk ate ku bo Arabia tɛŋka la, jinla danni wa yaa be ŋman tagri ka Jerusalem tɛŋka ale bo tɛŋzuk de la. Dii nyiŋla, tɛŋzuk de Jerusalemwa ale ka bisaŋa chim ka yɔm. 26Alege Jerusalem waai ale bo wenŋmazuk la, a daa yɔma. Wa ka ti ma. 27Dii nyiŋla, ku ŋmarisi ayen, <<Nipowa, fi waai ale kan maa biak la, basi ate fi poi peenti. Fi waai ale kan maa biak biik nam nya la, kaari ale popeentik ate ku jueli wen, dii nyiŋla, nipok waai ate wa chorɔwa jam zɛri la, wala le nya bisa nna yegayega a gaam nipok waai ale boro ale wa chorɔwa la.>> (Azaya 54:1)

28Yɔgyɔgla de, m suata, ku ka Wen ale sum puulim dii dipo ale Abrayam la ale basi ate nama sum chim Naawen bisa. Pumpuulimaŋa de mɛ abe ale basi ate Saara biak Aizik te Abrayam. 29Dila powa, Aga ale jam biak wa biika alege ka jam daa Wen pumpuulima biik la, biika jam a namsi bi kinkala waai ate ka mawa va Wen Chiika pagrimu nyiŋ yaa biak ka la kama. Ku be din diem ka dila ale jinla me. 30Ase ba ale ŋmarisi Wen Gbaŋka po ayen, <<Yiak nipok yɔmawa de ale wa nidoabinni ate ba nyini. Dii nyiŋla, nipok yɔmawa biika a kan nya ka kowa jaab jaaboa. Ka nipok waai ale kan daa yɔma la nidoabinni le ka nya ŋanta.>> (Piilimka 21:10) 31Dila nyiŋ, m suata, nya kude a sak kama ayen, ti daa nipok yɔmawa bisa. Ti ka nipok waai ale kan daa yɔma la bisa.

Currently Selected:

Galatia 4: BWU

Highlight

Copy

Compare