Ezekiel 9

1Ku ŋaaŋnyiŋ, mi yaa wom le Naawen nɔi ayen, <<Nuru baai ate m lueri ayen ba kaasi tɛŋka la ni jam Jerusalem. Ni ta ni kpaliŋ ŋantaŋa jam.>> 2Mi nya nidoaba bayuebi a va Naawen Yenni nɔi dii ale bo wiiluk geŋ la a jo. Waai meena ta ka kpaliŋ ŋa pagrik wa nisa po. Nuru ale saari bayopɔi a jo garuk ate ku a nyaksi a bo ale ba a ta ŋanta ayen wa ŋmarisi. Nuruma yaa jo Wen Yenni po a zaani kuŋkuŋku tɛŋ.

3Izirali Wen zulaŋa ale wa nalimu ale nyaksika yaa basi javukku ale ta kiŋkaŋŋa ate ba mɛ zaani Wen Yenni po la ale torisi cheŋ nansuiŋka jigini. Naawen yaa weeni waai garukku ale a nyaksi la ayen, 4<<Cheŋ Jerusalem tɛŋka po, baai meena ate waba tii a nye dela a sum a daani ba la, daani ba deeŋa nyiŋ.>> 5-6Wa yaa cheem mbala bayuebiwa jigi a weeni ba ayen, <<Ni va wa a ga ko baai meena ale kan ta daanika ba deeŋa nyiŋla. Ni kan sak jiirimmoa. Ni bi kan ŋman te ba. Ni ko nidoaba ale nipooba, nyam ale ba bisa.>> Ni piilim dela m Yenni tɛŋ abe nuruma deri ko niŋdeerɔma ale za dula la.

7Wa yaa weeni ayen, <<Pai kpiema a vi chaab dueni yenni dabaasaŋa po ate di daŋm. Ni te ni nina muni.>> Ba yaa basi dula ale piilim a ko Jerusalem demma. 8Mi jam ka m dek m nyiini, mi yaa koori tɛŋ a kaari a weeni, <<Nyɔnɔ Naawen yaa! Ka boa ate fi a nye naa? Ka fi sui ale a puuri nna yegayega ale Jerusalem demma ate fi a yaali ayen waai meena kpi?>>

9Wa yaa tulisi ayen, <<Izirali ale Juda demma a tom ka wabaata nna yegayega. Nuru koorisa ale sueri ba tɛŋka. Jerusalem dek a sueri ale gaasa. Ba a poli ayen, <Naawen zɛri ba kama.> Ba a poli ayen, <Naawen kan nya ba ale a nye diila.> 10Dila nyiŋ m kan ŋman te ba m be kan vɔŋ te ba. M le namsi ba ba le nye diila nyiŋ.>>

11Nuru waai ale jo garuk kuui ale a nyaksi la yaa ŋman jam weeni ayen, m nye fi le weeni ayen, <<M nye diila kama.>>

Currently Selected:

Ezekiel 9: BWU

Highlight

Copy

Compare