Ezekiel 8

1Bena ŋayuebiwa po, chiisa siyuebiwa daa ŋanuwa danni, ase me ale jam kala m yenni po ate Izirali nisɔmma a jam kala mi niŋ la, Nyɔnɔwa Naawen nisaŋa yaa jam mi zuk dula. 2Mi yaa nya jaab ase nurubiik la. Jaamu de chaasa a ta siŋ wa naŋsa a nye ase ka bolim la, alege wa chaasa a ta jueli wa zuk a nye ase kutuk ale a nyaksi la. 3Wa yaa teeri jaab ase nisa la a yik mi a ta jueli wenzuk a ji mi ta cheŋ Jerusalem. Chiika yaa ta mi cheŋ Wen yenni tuok kuui ale bo wiiluk geŋka a jo dabiaka po la ate mi yaa nya bɔgluk. Ku basi ate Wenni sui a puuri nna yegayega. 4Ate mi yaa nya Izirali Wenni zulaŋa ale wa nalimu ase mi ale poom liŋ jam nya Chebar benni jigini la.

5Naawen yaa weeni mi ayen, <<Saalɔ biiga, nya wiiluk geŋka.>> Mi le nya la, nyuri dɛka bɔgluk ale za moata tuoku. 6Wa yaa ŋman weeni ayen, <<Saalɔ biiga, fi nya Izirali demma tuimbaataŋa? Ba wabaataŋa nye kama ate mi yie weleŋka an magsi puusa jigi ya. Alege fi le nya wabaata gaam di.>>

7Dii ale pai saŋ la, wa ŋman ta mi cheŋ dabiaka tuoku nɔi ate mi nya vɔrup siaka nyiŋ. 8Wa yaa weeni ayen nye ate vɔrumu a zuak. Mi le nye la, mi yaa nya le ka tuok nɔi. 9Wa yaa weeni mi ayen, jo a nya wa gbenti sii ate nuruma a nye la. 10Ponni po mi yaa nya duŋ sii ale vuuri a cheŋ la ale duŋ daŋtisa ale bɔgta siaka nyiŋ ate Izirali a kaab la. 11Izirali niŋdeerɔba pisiyopɔi ale za dula ate Safan biika Jaazania maa boro. Ba wanyi meena yaa ta ŋan baai ate ba ju ŋan baai nyum ale masa la. Ate ba nyummu a sueri dɔkku meena.

12Naawen yaa weeni ayen, <<Saalɔ biiga, fi nya wa gbenti sii ate Izirali niŋdeerɔma suk a nye la? Ba diinaŋa a sueri ale ka bɔgta. Ate ba a weeni ayen mi kan nya ba, dii nyiŋla ba a poli ayen mi poom zɛri Izirali kama. 13Alege m le sak ni wari ate ku bie gaam dila.

14Wa ŋman ta mi cheŋ nɔi dii ale bo wiiluk geŋka la ate mi nya nipooba a kum a te bɔgluk ate ba a wi ayen Tammuz. 15Naawen yaa bek mi ayen, <<Saalɔ biiga, fi baga a siak ni pooma de ale a nye diila? Alege m le sak fu wa dii ale ŋmasi bie.>>

16Wa ŋman ta mi cheŋ jo Naawen Yenni dabiaka ponni po ate mi nya nidoaba pisiye ale banu za moata. Ba pai ka ba ŋaaŋsa a te Naawen. Penni a yaa tuk wenbinni ale a pusi la nyiŋ a koori.

17Wa yaa weeni ayen, <<Saalɔ biiga, Juda demma ale a nye diila a bie ka nna yegayega. Alege basi mɛ ate gaasa ale nyeka tuem waaŋ Izirali tɛŋka meena. Ku basi kama ate m sui a puuri nna yegayega. Ba lɛ mu kama a nye mu chivie. 18M suinni ale a puuri la, m le namsi ba. M kan sak jiirimmoa. Ba bi dan kum te mu m kan maari ba.>>

Currently Selected:

Ezekiel 8: BWU

Highlight

Copy

Compare