Ezekiel 10

1Mi yaa nya gigiluk ale bo ŋan baai ale ta kiŋkaŋŋa ŋanaansiwa la zuk. Dula bi ka naamu kalika jigini a nyaksi. 2Naawen yaa weeni waai ale jo garuk kuui ale a nyaksi la ayen, <<Cheŋ va wiilima ale za ŋan baai ale ta kiŋkaŋŋa la suŋsuŋ a ga pai bolim kaala ŋaai ate wa baga a ji la. Abe fi yaa pai yarinti Jerusalem tɛŋka meena.>> Ate mi ya kpesi a nya wa le va wiilima po.>> 3Ŋan baai ale ta kiŋkaŋŋa la a za ka Wen yenni yeseok geŋka alege ate nuruwa a cheŋ ba suŋsuŋ. Chiŋmari yaa lik ponni po dabiaka ate 4Naawen zulaŋa ale wa nalimu nyaksika yaa va ŋan baai ale ta kiŋkaŋŋa la zuk a ga wari nansuiŋku nɔi. Naawen zulaŋa a kasim lik yenni meena ate dabiaka po mɛ a nyaksi. 5Ŋantaŋa kiŋkaŋŋa nuemka a nye ase ka Wen Dii Ale A Niak La lueluk la ate fi dan za peelim dabiaka po fi wom.

6Wa yaa weeni nuru waai ale jo garuk kuui ale a nyaksi la ayen, <<Pai bolim a nyini wiilima po, a nyini ŋanvutaŋa po, ate wa yaa ga za wiilima gauŋ. 7Baai ale ta kiŋkaŋŋa la wanyi yaa laari nisa pai kaala bolim po a te wa. Nuruwa yaa tuesi kaalaŋa a cheŋ. 8Mi ŋman nya ale ŋan baai banaansiwa ale ta kiŋkaŋŋa la wanyi meena ta ka ŋanta nna ase nurubiik nisima la ba kiŋkaŋŋa po. 9Mi yaa nya wiiliba banaansiwa a moata ŋan baai ale ta kiŋkaŋŋa la. Wiilima de kasim a nyaksi kama ase tintain salima la. 10Wiili meena a neensi ka ku choa ale ŋman ta wiili ku choa ate ku bari bo ku suŋsuŋ. 11Ate ba baga a va jigi meena ale kan cheemu. Ŋan baai ale ta kiŋkaŋŋa la a daa cheŋ, wiilima mɛ a va ka chaab a cheŋ. 12Mi ŋman nya ayen wiilima ale ŋan baai ale ta kiŋkaŋŋa la nyiŋsaŋa ale ba ŋaaŋsaŋa ale ba nisimaŋa ale ba kiŋkaŋŋa ka nina nyiini. 13Mi yaa wom lueluk a wi ayen, wiili baai ale a gilim la. 14Ŋan baai ale ta kiŋkaŋŋa la wanyi meena a ta ka nimbidaasa sinaansi. Wanyi nina a nye ase lalik la, wanyi mɛ nina a nye ase nurubiik la, wanyi nina a nye ase gbeŋli la, nwala ninaŋa a nye ase jiiruk la.

15Ŋan baai ale ta kiŋkaŋŋa la ka baai ate mi liŋ nya Chebar Benni nɔi la. 16Wiilima a cheŋ ka juijui meena ate ŋantaŋa a cheŋ la, ale a zaani juijui ate ŋantaŋa a zaani la. 17Ŋantaŋa a dan poom yiti wiilima sali va ba kama, dii nyiŋla ŋantaŋa chiika a bo ale ba kama.

18Mi yaa nya ale Naawen zulaŋa ale wa nyaksika nyini nansuiŋku jigini a ga bo ŋan baai ale ta kiŋkaŋŋa la zuk. 19Ba yaa lak ba kiŋkaŋŋa a yiti wen ate wiilima mɛ sali va. Ba yaa ga zaani Naawen yenni kori geŋ. Ate Izirali Wen zulaŋa ale nalimu a bo ba zuk.

20Ate mi yaa seba a chak ayen ŋan baai dek ate mi nya Chebar Benni nɔi ate Izirali Wenni zulaŋa a bo ba zuk la ale la. 21Ba ta ka kiŋkaŋŋa ŋanaansi ate nisima a bo ŋa tɛŋ. 22Wanyi meena a ta nimbidaasa sinaansi ase baai ale jam moata Chebar Benni la. Ba wanyi meena a cheŋ ka yorr ale kan cheemu.

Currently Selected:

Ezekiel 10: BWU

Highlight

Copy

Compare