Ezekiel 7

1Naawen yaa weeni mi ayen, 2<<Saalɔ biiga, Nyɔnɔwa Naawen a weeni Izirali demma ayen: Izirali tɛŋka ale kpegli. Ni tɛŋka meena a za ka kaasi kama, 3a magsi ba tuimbaataŋa. Mi sui kasim a puuri kama. 4M be kan sak jiirimmoa. M le waali ni, ni wabaataŋa ate ni tom la nyiŋ ate ni seba ayen ka Mi ale Naawen.

5Nyɔnɔwa Naawen ale biisi diila ale nna, <<Wari kan boro a magsi chaab ale kaasuŋ kuui ale cheena la. 6Ku be dan jam, ni nyuvooŋa a nueri ya. 7Nama Izirali demma ale nya kaasuŋ. Ku kan beni ni nyiŋsa ale kasim a gɔk guutaŋa zuk ni kan nya suipeentiga. 8M le sak m suipuurumu abe m namsi ni biem buui ate ni tom la nyiŋ. Ni le nya dii ale magsi ni nya la. 9Ni biemu a zuak ka nna yega m kan ta jiirim ale ni. Ate ni yaa seba ayen ka mi Naawen ale namsi ni.

10<<Kaasuŋ a moata. Gaasa ale kayerinni a bo jigi meena, 11ate nyeka tuem nyam a nya badek. Ni waai kan nyini kaasuŋku po a nyini ate jaab meena ni ta ate ba chim; ŋanmaŋsaŋa la a kaasi. 12Ku cheena ate waai meena ale tu kaasuŋ. Ŋanta diak ale kpegli, 13ate baai ale pai ŋanta a da la a kan ŋma nya ba, dii nyiŋla ni meena ale nam magsi ni wabaataŋa. M be an tagri m popolaŋa. 14Ba peeri damuniŋka ate jaab meena gomsi magsi. Ate waai a kan cheŋ kpaliŋka, dii nyiŋla m sui ale a puuri ale nuruma.

15<<Gebi kpieŋka a bo ka peelim ate nyiŋtuila ale kɔm a bo popo. Gebika ale ko baai ale bo peelim la. Kɔm ale nyiŋtuila ale ko baai ale bo tɛŋka po la. 16Baai ale ba chim ŋanvuta la ale bo guutaŋa zuima a kum ase nangbaŋsa la badek wabaataŋa nyiŋ. 17Ni nisima ale kasim a gɔk ate ni duna mɛ a kpi. 18Ni le jo garuk zaksisa a sak ni niniŋŋa alege yɔgsum ale yik ni. Ba niniŋŋa ale sak ba chivieŋa abe zuimaŋa abe zuimaŋa meena a che. 19Nuruma ale yuk ba kpanaŋa ale ba ligmɔniŋka a basi suitaŋa niŋ. Kpanaŋa ale ligmɔniŋka a kan vari ba a basi Naawen suipuurumu po. Bala a kan da ŋandiinta a chak ba, dii ŋan bala ale basi ate ba tom biemu. 20Ba ta ka kanjanta ale ba kpanaŋa a yaa pai ba a nye bɔgta, ŋan baai ate mi kisi la. M le basi ate ni ŋantaŋa a kan ta kiri. 21M le pai ba ate nicham ase kpaliŋ po ate ba vari la, abe m pai te tɛŋka po nuru baata ate ba kan te zula. 22Ba le wɛ jo m yenni po a nye ti di kan magsi puusa alege mi le cheem a nya jigi yoŋ ate ku nye.

23<<Gomsi choarima a magsi, diila butimka ale bo ni tɛŋka meena po. Koka ale gaasa ale bo jigi meena Izirali tɛŋka po. 24M le weeni tɛŋ sii nyeka ale tua la ate si jam tuesi ni yeeŋa. Ba le basi ate ni kanjantaŋa a kpegli. Kanjauŋ tii ate ni ta ale ni tugurik tɔŋdɔba pagrisaŋa la. Ba le basi ate ni kan baga a nye wari ni puusika dɔkku po. 25Ku le daani ni ate ni gisi a yaali suiyɔgni alege suiyɔgni a kan boro. 26Wakaasima ale kasim a vi chaab ate ni kasim a wom biem nyiini. Nuruma ale saalim biisiteerɔba ayen ba tuesi biik jigi a te ba. Kaabteerɔwa ale basi m sinsaŋŋa sakka, ate niŋdeerɔ baai ale ta yam la a kan ŋman sak nuruba. 27Ni naawa ale wa ŋaaŋviirɔma ale jɔk yiila a kum. Yɔgsum ale yik ni ate ni nisima a gɔk. M le namsi ni, ni wabaataŋa nyiŋ abe m nye ni ase nama mɛ ale nye ni chaab diila. Ate ni seba ayen, Mi ale Naawen.>>

Currently Selected:

Ezekiel 7: BWU

Highlight

Copy

Compare