Ezekiel 6

1Naawen yaa weeni mi ayen, 2<<Naawen wanni yaa jam mi jigi ayen, Saalɔ biiga, pai fi nina a tuk Izirali guutaŋa nyiŋ, a weeni 3ti ayen, <Izirali guuta, ni wom Nyɔnɔwa Naawen wanni. Mi Nyɔnɔwa Naawen a weeni Izirali guutaŋa ale pinaŋa ale buboalisaŋa ale vaasaŋa ayen, m dek ale a m ta gebik a jam ni po a kaasi ni kaabka jiŋŋa. 4Kuŋkuŋ meena m le kaasi abe bɔgtaŋa niŋ m ko nuru baai ale a kaab ti la. 5Kpieba ale koba ale dua gilim bɔgtaŋa ale kuŋkuŋtaŋa. 6Tɛŋ meena ale bo Izirali po la ale kaasi abe m nya ayen tangbana ale bɔgta ale kuŋkuŋta meena a kaasi. Izirali ale nye jabuui meena la ale kaasi dua jaab zuk. 7Tɛŋka meena po ni nuruma ale kpi. Ate ni ale seba ayen ka mi Naawen ale nye wieŋa de.

8<<M le basi ate nuruma gela a jo ninammu dɛ po, ate mi le choa ba gela ate ba saŋ jo tɛŋsaŋa po. 9Dula ba le chim ligrɔba. Ate ba dan poli mi wie, ba le teeri ba le nye mi chivie ba le zɛri mu a kaab bɔgta la Ba le kisi badek ba le nye waba tii la. 10Ate ba seba ayen ka Mi ale Naawen. Ate ba seba ayen m dan kaam ba, ba wom ale ninmuna.

11<< <Nyɔnɔwa Naawen ale biisi diila ale nna, Ezekiel nak nichaala ale zak naŋ a tabi tɛŋ abe fi a kum Izirali demma ale tom biem tuima la nyiŋ. Ba le kpi kpaliŋ po, kɔm mɛ ale ko ba, nyiŋtuila mɛ ale ko ba. 12Waai a dan yalima wa le kpi ale nyiŋtuila. Waai abe dan moata wa le kpi kpaliŋ po. Waai abe dan nyini wieŋa de po kom ale ko wa. M sui le puuri ale ba chekki. 13Ba nuruma ale kpi dua gilim ba bɔgtaŋa ale guuta zuima ale tiisa tɛŋ ale kab tii meena ate ba ju ŋan masisa a te ba bɔgtaŋa la ate ni seba ayen ka Mi ale Naawen. 14M le pai m pagrimu nye ate tɛŋka a doa koruk a nyini gɔnni po a ga paari Dibla juijui meena ate ba boro la. Ate ba yaa seba ayen ka Mi ale Naawen.> >>

Currently Selected:

Ezekiel 6: BWU

Highlight

Copy

Compare