Ezekiel 5

1Wa yaa weeni mi ayen, <<Saalɔ biiga yaali pomagi a che fi teeŋka ale fu zukku. 2Pa bunyi a vi peeli dii ate fi daani Jerusalem tɛŋka a dueni di zuk la a ju ka sitika ŋaaŋnyiŋ. Ŋman pai bunyi a gebi yarinti a gilim tɛŋka. A pai bunyi a yuk yarinti basi vioku po. Mi le za ayen m vi ba ale gebika diila ale la. 3Pa zuisaŋa maga a bobi fi garukku nɔnni nyiŋ. 4Abe fi ŋman pai maa a yuk basi bolim po ate bu dɛ. A zaani dula bolim ale dɛ paari Izirali nuruma meena.

5<<Mi Nyɔnɔwa Naawen a basi ate Jerusalem a chim tɛŋ dek tɛŋsaŋa meena po ate tɛŋ yonsa a mariŋ ka. 6Alege Jerusalem a zɛri mi buusaŋa kama ale nyeka tuem ale zɛri m ŋmarisika a gaam tɛŋ sii ale gilim ka la, diila ba zɛri mi buusaŋa ale an va m ŋmarisika. 7Dila nyiŋ weeni Jerusalem demma ayen, Mi Nyɔnɔwa Naawen ale biisi diila ale nna. Ni zɛri kama ayen ni kan va m ŋmarisika yaase ni va m buusaŋa, yaase ni va tɛŋ sii ale gilim ni la buusaŋa. Ni tue poom kpari gaam ba kama.>>

8Nyɔnɔwa Naawen ale biisi diila ale nna, <<Yɔgyɔgla de tɛŋ sila ale nya mi ale tulim ta cha ale ni abe m namsi ni diila. 9Ni ninammu ale gaam dii meena ate mi jam nye yaase m nin diem za m nye. 10Nyam ale yik ba bisa a ŋɔbi ate bisa mɛ a yik ba nyam a ŋɔbi. M le namsi ni abe baai ale a tali la m basi ate ba waaŋ jigi meena. 11Nyɔnɔwa Naawen ale biisi diila ale nna, <<Ni basi kama ate m Yenni a daŋm ale ni bɔgta ale biem buui ate ni a nye la. Ku de nyiŋ, mi Nyɔnɔwa Naawen le gebi ni basi. M kan ta jiirim ale ni, m kan bola sak jiirim ale ni. 12Ni po buta ale kpi ale nyiŋtuila ale kom tɛŋka po. Ni po gela ba le ko ni ale gebik peelim. Ni po gela m le vi ni ate ale gebik ate ni chali waaŋ jigi meena.

13<<M le nye ba ka dila ate m suinni yaa yɔk. Dila ba yaa le seba ayen ka Mi, Naawen ale biisi. M dan sak m suipuurumu ale ba, ku ŋaaŋnyiŋ ba le seba ku le daani mu a soa diila. 14<<Waai ale va suik a taam la ale la ni dii meena ale kaasi la. Satɛŋsa 15ale lɛ ni abe ba nye ni a la, alege ku le cha ba ale m ni nye dii ale m suipuurumu la. Ka Mi, Naawen ale biisi. 16M le kaasi ni kpanni ŋantaŋa ate ni viiri kpi ate kaasuŋ a paari ni. 17Kɔm ale gɔi duŋsa ale ko ni bisaŋa. Mi le namsi ni ale tueta ate ni dachaasaŋa mɛ ko ni ale ba gebisaŋa. Ka Mi, Naawen ale biisi.>>

Currently Selected:

Ezekiel 5: BWU

Highlight

Copy

Compare