Ezekiel 4

1<<Yɔgyɔgla de, saalɔ biiga yaali peeli a pai dueni fi niŋ a yaa daani Jerusalem tɛŋka a dueni di zuk. 2A yaa nye ate tugurik tɔŋdɔba a gilim ka. Mɛ kpaliŋ ŋanta magsi kpaliŋ ale tɛŋka abe fi dueni tanta a ga jueli paari tɛŋka parisaŋa ŋmani. Nye tugurik tɔŋdɔma boka jigsa a gilim tɛŋka abe fi yaali da dobra a magsi parisaŋa nak lɔnsika. 3Nye kutuk paglaka zak zaani fi ale tɛŋka suŋsuŋ. Cheem fi nina a tuk tɛŋka nyiŋ ase fi a yaali fi sitika la a ya sitika. Kude ka wamagsini a te Izirali. 4Fi dan nye dila yaa duak gala gauŋ nyiŋ a pai Izirali nye kaasika a basi fidek zuk. Ba nye kaasika ale bo fi zuk a paari ka da ŋaai ate fi dua fi gala gauŋka nyiŋla. 5M te fu ka da a magsi chaab ale bena dii ate nuruma a nye kaasi la. Dila nyiŋ fi le ta Izirali biemu fi zuk a paari ka da kobsita ale pineok.

6<<Fi dan nueri da kobsita ale pineoku de, ŋman labri dua fi juga gauŋku nyiŋ. Fi le pai Juda nye kaasika a basi fi zuk. M te fu ka da pisinaansi, dai yeŋ a magsi chaab ale bein meena ate ba tom ba biemu la. 7Abe fi yaa a nya Jerusalem geŋ kaai ate ba siti ka la ale fi nikottaŋa mooli a weeni Jerusalem ba biemu. 8M le pai miisa a bobi ni ate ni kan baga a chiemu de ale de ate da ŋaai fi siti Jerusalem la ga nueri. 9Pa wiiti ale barli ale tue ale suma ale za a nyo taasi yeŋ po a pai nye boroborok fidek. Fi le ŋɔbi ku kama da kobsita ale pineoku ate fi dua gauŋ yeoŋku nyiŋla. 10Dai yeŋ meena fi ŋɔbi boroboroku maga, 11abe fi nyu nyiam beerik kpieŋ nɔi buye. Abe fi a nyu dapo dapo. 12Pa nurubiik bin kosa a cheeni bolimu a yaa se boroboroku ate waai meena nya.>>

13Naawen yaa weeni ayen, <<M dan choa Izirali demma ate ba waaŋ tɛŋsaŋa meena, ba mɛ ale dɛ ŋandiin tii ale kan nala ase tii ate fi a dɛ la.>> 14Mi yaa weeni ayen, <<Nyɔnɔwa Naawen ayen kan te mi nye dila. Mi le yiti m buli mi an diem dɛ ŋandiin daŋtisa nya ya. Mi an diem ŋɔbi jabuui ale kpi wa dega yaase gɔi duŋ a yik wa. Lam buui ale kan nala la an diem jo mi nɔi ya.>> 15Wa yaa weeni mi ayen, <<Kan pai nurubiik bin kosa alege pai nanbeoŋ kosa a se fi boroboroku. 16Saalɔ biiga, Jerusalem demma ale viiri. Ba ŋandiintaŋa kan soa dii ya ate ba kpaziita a nak ate ba jɔk yiila. 17Ku le nye nya dii nyiŋla ŋandiinta nyaka ale toa. Ku le cha nuruma dii meena ale a nye la ate ba buk nna kuligi ba biemu nyiŋ.>>

Currently Selected:

Ezekiel 4: BWU

Highlight

Copy

Compare