Ezekiel 47

1Nuruwa a ta mi a ŋman jam Naawen yenni nansuiŋku ate mi nya a nyini tuoku tɛŋka a nyini a cheŋ kori geŋka, yenni a tuk ka kori geŋ. Nyiamu a nyini ka yeseok geŋka a siŋ a jam, kuŋkuŋku yeseok geŋ ale la. 2Wa yaa ta mi va wiiluk geŋka tuoku a nyini, a ta mi gilim peelimmu a ga paari peelim tuoku ale tuk kori la, ate nyiam a chali a nyini yeseok geŋka.

3Nuru ale a cheŋ kori geŋ ale ja magsim wa nisa po la, wa yaa magsi anamagib tusa ŋata (3,000) a yaa ta mi va nyiam po ate bu a paari karisa. 4Wa ŋman magsi anamagib tusa ŋata (3,000) ale ta mi va nyiamu po ate bu a paari duna. Wa pilim magsi anamagib tusa ŋata (3,000) ale ta mi va nyiamu po ate bu a paari chiak. 5Wa ŋman magsi anamagib tusa ŋata (3,000), alege yɔgyɔgla de yaa ka beli ate mi an baga a taamu, diila nyiamu yaa jueli kama a limisa yega a magsi puŋka, beli dii ate nuru an baga a taamu. 6Wa bek mi ayen, <<Saalɔ biiga, fi nya kude? Wa yaa ŋman ta mi a cheŋ kunkɔŋni. 7Mi ale paari du la, mi yaa nya ti boari benni kabta buyewa. 8Wa yaa weeni mi ayen, <<Nyiamu de a chali a cheŋ ka kori geŋka a taam a siŋ Araba po, juijui ate bu a jo Yesa Nyakpiemu po la. Bu dan nyini meena a jo Yesa Nyakpiemu po, bu le chim nya naliŋ. 9Ŋanvuta kuŋkuŋ ale bo bu po juijui meena ate bu chali a cheŋ la. Juma ale piisi dii nyiŋla nyiamu de a chali a cheŋ dula kama a basi ate yesaŋa nyiamu a chim nya naliŋ. Dila nyiŋ juijui ate nyiamu a chali a cheŋ la jaab meena ale boro. 10Jum yigrisa ale zaani bu nɔi, a zaani En Gedi a ga paari En Eglaim jiga ale boro a danni ŋmaasa. Juma tɔgatɔga ale boro ase Nyakpiemu juma la. 11Alege ŋala ale kab tii ale yɔk la nyaataŋa a kan nala, ti le chim ka yesa a dua. 12Yɔna tiisa tɔgatɔga ale zaani beni kabta buyewa. Si vaataŋa a kan wiiri, yaase si yɔn kpeeri. Chiik meena si le yɔni, dii nyiŋla nya buui ale nyini Naawen boka jigini a chali a cheŋ si jigi la. Si yɔnaŋa ale chim ŋandiinta abe si vaataŋa a tebi.

13Nyɔnɔwa Naawen la ale biisi diila ale nna. <<Bana ŋaai ate fi le mobi ase nitalim a te Izirali yezuima pi ale ŋayewa la ale nna, ale tɛŋsa siye a magsi Josefi. 14Mobi a soa se chaab la a te ba. Dii nyiŋla mi zak ka nisa wen a pɛ ayen m le pa tɛŋka de a te ni kokpieŋsaŋa. Tɛŋka de ale chim ni nitalim.

15Tɛŋka banni ale magsi di chim diila ale nna. <<A nyini wiiluk geŋka di va dila nyini Nyakpiemu a sali va Yetlon manpanni a gaam Yamat a ga paari Zedad, 16ale Berota ale Sibraim kaai ale dua Damasikus ale Yamat suŋsuŋ la, a cheŋ ga a paari Yazer Yattikon, kaai ale nye bain ale Yauran la. 17Banni ale nyini ka nyakpiemu a cheŋ paari Yazar Enan, a va Damasikus banni wiiluk geŋ, ate Yamat banni a bo wiiluk geŋ. Di de ale di chim wiiluk geŋ bain.

18Kori geŋka banni ale va ka Yauran ale Damasikus suŋsuŋ a sali va Jodan, Gilead ale Izirali tɛŋka suŋsuŋ, a tuak kori geŋka nyakpiemu a ta ga paari Tamara. Di de ale di chim kori geŋ bain.

19Yeseok geŋka banni ale va ka Tamara a ta ga a paari Meriba Kades nyaataŋa, a yaa sali va Ejipiti Buboalika wa a ga paari Nyakpiemu. Di de ale di chim yeseok geŋ bain.

20Yeniŋ geŋka, ka Nyakpiemu ale bu bain a ga paari kauk kuui ate Lebo Yamat a bo bu gauŋ nyiŋ. Di de ale di chim yeniŋ geŋ bain.

21Ni pa tɛŋka de a chari chaab a va Izirali yezuimaŋa. 22Ni gebi te nidek ase nitalim la abe ni te nichamma ale bo ni suŋsuŋ a ta bisa la. Ni poli ba mɛ wie ase Izirali tɛŋ bisa la. Ni gum ba Izirali yezuimaŋa pa a chari ba ase nitalim la. 23Ye zuk kuui dek ate nichaanɔ a boro la ni te wa ase wa nitalim la. Nyɔnɔwa Naawen ale weeni.

Currently Selected:

Ezekiel 47: BWU

Highlight

Copy

Compare