Ezekiel 48

1Yezuimaŋa ale nna ale ba yueŋa a tom chaab. Wiilukku niŋ nyiŋ Dan ale soa kauk kunyi. Ku le va ka Yetlon manpanni a ga Lebo Yamat, Yazar Enan ale Damasikus wiiluk geŋka ale pa te Yamat la, ale chim ka banni gela a nyini kori geŋka a ga paari yeniŋ geŋka.

2Asɛ ale soa kauk kunyi. Ka le nye bain ale Dan ale soa kauk kuui la a zaani kori geŋ a ga paari yeniŋ geŋ.

3Nafitali ale soa kauk kunyi. Ka le nye bain ale Asɛ ale soa kauk kuui la a zaani kori geŋka a ga paari yeniŋ geŋ.

4Manasa ale soa kauk kunyi. Ka le nye bain ale Nafitali ale soa kauk kuui la a zaani kori geŋka a ga paari yeniŋ geŋ.

5Ɛfraim ale soa kauk kunyi. Ka le nye bain ale Manasa ale soa kauk kuui la a zaani kori geŋka a ga paari yeniŋ geŋ.

6Aruben ale soa kauk kunyi. Ka le nye bain ale Ɛfraim ale soa kauk kuui la a zaani kori geŋka a ga paari yeniŋ geŋ.

7Juda ale soa kauk kunyi. Ka le nye bain ale Aruben ale soa kauk kuui la a zaani kori geŋka a ga paari yeniŋ geŋ.

8Kauk kuui ale nye bain ale Juda la zaani kori geŋka a ga paari yeniŋ geŋ ka kauk kuui ate ni pa a te ase tiirim maŋ la. Ku labsimu ale chim ka anamagib tusa pisiyopɔi ale ŋanu (75,000) ate ku woglimmu a zaani kori geŋka a ga paari yeniŋ geŋ a soa se yezuimaŋa kabtaŋa la. Mi boka jigini ale bo ka suŋsuŋka po.

9Tiirim maarika jigini ate ni pa a te Naawen la woglimmu a chim anamagib tusa pisiyopɔi ale ŋanu (75,000), labsimu anamagib tusa pisita (30,000). 10Kaabteerɔma tuilum jigini ale nna. Ku woglimmu a chim anamagib tusa pisiyopɔi ale ŋanu (70,000) wiilukku geŋ, labsimu a chim anamagib tusa pisita (30,000) yeniŋka geŋ, anamagib tusa pisita (30,000) labsim konni geŋ abe anamagib tusa pisiyopɔi ale ŋanu (70,000) woglim yeseoku geŋka. Suŋsuŋka Naawen boka jigini ale la. 11Kude kaabteerɔma, Zadok dɔkdemma ate mi gaari te mi dek la ale soa. Ba jam ta siaka kama a tom a te mi alege an cheŋ a bɛ ya ase Livaima ale jam nye diila, diipo ate Izirali demma a cheŋ a bɛ la. 12Ka tiirim maŋ tuilum tɛŋka po, tuilum jigi a nye bain ale Livaima ale soa kauk kuui la.

13A maŋ kaabteerɔma banni, Livaima soa ka gebi teka jigi ate woglimmu a chim anamagib tusa pisiyopɔi ale ŋanu (75,000), labsimu anamagib tusa pisita (30,000). Ku meena gum chaab woglimmu ka anamagib tusa pisiyopɔi ale ŋanu (75,000), labsimu anamagib tusa pisita (30,000). 14Ku a fɛ ate ba kan pa da yaase ba pa a tagri jaaboa. Ka tɛŋ maŋ jigi ale nna, ku a fɛ ate ka kan taam jo waai nisa po, dii nyiŋla ka ta tuilum kama a te Naawen.

15Tɛŋ kaai ale tali la, labsimu ka anamagib tusa pi ale ŋanu (15,000), woglimmu anamagib tusa pisiyopɔi ale ŋanu (75,000). Dula a magsi tɛŋka wa yona nyeka, yie sɛka ale duŋsa dɛka jiga. Tɛŋka dek ale bo ka ka suŋsuŋ. 16Ka be ta magsika de. Wiiluk geŋka a chim anamagib tusa pi ale ŋata ale kobsinu (13,500) yeseok geŋka a chim anamagib tusa pi ale ŋata ale kobsinu (13,500), kori geŋka a chim anamagib tusa pi ale ŋata ale kobsinu (13,500), yeniŋ geŋka a chim anamagib tusa pi ale ŋata ale kobsinu (13,500). 17Tɛŋka duŋsa dɛka jigini wiiluk geŋka ale chim ka anamagib kobsiyopɔi ale pisinu, yeseok geŋka ale chim ka anamagib kobsiyopɔi ale pisinu, kori geŋka ale chim ka anamagib kobsiyopɔi ale pisinu, yeseok geŋka a chim anamagib kobsiyopɔi ale pisinu. 18Tɛŋ kaai ale tali la, a nye bain ale tuilum jigini ka woglim nyiŋla, a chim anamagib tusa pisita (30,000) kori geŋ, anamagib tusa pisita (30,000) yeniŋ geŋ. Ka dan nye ŋandiinta ka tɛŋka tuimtomdisaŋa ale soa. 19Tuimtomdisaŋa ale nyini tɛŋka po a kpa ka la a nyini ka Izirali yezuimaŋa meena. 20Kauk kula meena ale soa se ka chaab la a nye ŋmɔgluk. Kauk meena a chim anamagib tusa pisiyopɔi ale ŋanu (75,000). Ase tiirim maŋ la gaari tuilum jigini tɛŋka ŋantaŋa.

21Juijui ale tali a nyini tuilum jigini ale tɛŋka ŋantaŋa po la ka nabiika ale soa. Ka le dari kama kori geŋka a nyini tuilum jigini anamagib tusa pisiyopɔi ale ŋanu (75,000) a ga paari kori banni, ale yeniŋ geŋ a nyini anamagib tusa pisiyopɔi ale ŋanu (75,000) a ga paari yeniŋ banni. Jiŋŋa de buyewa ale dari siŋ ase yezuimaŋa kabtaŋa woglimmu la ka nabiika ale soa. Tuilum jigini ale mi jigini ale bo ka suŋsuŋ. 22Dila Livaima soaka jigini ale tɛŋka soaka jigini ale dua ka suŋsuŋ, dula nabiika abe le soa. Juijui ate nabiika a soa la ale dua ka Juda ale Benjamin suŋsuŋ a nye bain ale ba.

23Alege yezuima niŋ ŋala Benjamin ale soa kauk kunyi. Ka le dari nyini kori geŋka a ga paari yeniŋ geŋka.

24Simeyon ale soa kauk kunyi. Ka le nye bain ale Benjamin a zaani kori geŋka a ga paari yeniŋ geŋ.

25Isaka ale soa kauk kunyi. Ku le nye bain ale Simeyon a zaani kori geŋka a ga paari yeniŋ geŋ.

26Zebulun ale soa kauk kunyi. Ku le nye bain ale Isaka a zaani kori geŋka a ga paari yeniŋ geŋ.

27Gad ale soa kauk kunyi. Ku le nye bain ale Zebulun a zaani kori geŋka a ga paari yeniŋ geŋ.

28Gad ale soa kauk kuui la ale dari ka dila yeseok geŋ a zaani Tamara a ga paari Meriba Kades nyaataŋa, a sali va Ejipiti Buboalika a ga paari Nyakpiemu.

29Tɛŋka ale nna ate fi le gebi ase nitalim la a te Izirali yezuimaŋa, kabtaŋa de abe le ba soaka jigi. Nyɔnɔwa Naawen ale weeni.

30Tɛŋka nansuiŋtaŋa ale nna. A piilim wiilukku geŋ ate woglimmu a chim anamagib tusa pi ale ŋata ale kobsinu (13,500), 31ba pa Izirali yezuimaŋa yue a te tɛŋka nansuiŋtaŋa. Nansuiŋta titawa ale bo wiilukku geŋ la a chim Aruben nansuiŋ, Juda nansuiŋ, ale Livai nansuiŋ.

32Konni geŋ, ate woglimmu a chim anamagib tusa pi ale ŋata ale kobsinu (13,500), nansuiŋta tita ale bo dula. Josefi nansuiŋ, Benjamin nansuiŋ, ale Dan nansuiŋ.

33Yeseoku geŋ, ate woglimmu a chim anamagib tusa pi ale ŋata ale kobsinu (13,500), anasuiŋta tita ale bo dula. Simeyon nansuiŋ, Isaka nansuiŋ, ale Zebulun nansuiŋ.

34Yeniŋ geŋ, ate woglimmu a chim anamagib tusa pi ale ŋata ale kobsinu (13,500), nansuiŋta tita ale bo dula. Gad nansuiŋ, Asɛ nansuiŋ, ale Nafitali nansuiŋ.

35Magsi kaai ale a gilim ku meena la, ka anamagib tusa pisinu ale ŋanaansi (54,000). Ate tɛŋka yuenni a zaani dila po a cheŋ ale chim ka <Naawen a bo dula.>

Currently Selected:

Ezekiel 48: BWU

Highlight

Copy

Compare