Ezekiel 46

1Nyɔnɔwa Naawen ale biisi diila ale nna. Ponni po dabiaka nansuiŋka ale a tuk kori geŋ la, lik ku tuima daa ŋayuebiwa meena, alege Vuusumu Danni ale Chi Paalika Danni ku lagri. 2Nabiika a va peelimmu a jo a va vataamka vuuku ale bo nansuiŋku po a zaani nansuiŋku nɔi. Kaabteerɔma a kaabi wa juka tiirimu ale wa suiyɔgni tiiritaŋa. Wa puusi nansuiŋku dek nɔi abe wa nyini, alege tuoku a kan ligi a ga a paari junɔi. 3Vuusumu Daaŋa ale Chi Paalisaŋa Daaŋa tɛŋka demma a puusi Naawen niŋ nansuiŋku va joka jigini. 4Juka tiirimu ate nabiika a ta jam a te Naawen Vuusum Danni la ka padabilisa siyuebi ale padiak, si meena kan ta jomi ya. 5Ŋandiinta tiirimu ale a te ale padiaka a chim ka taasi kpien nɔi, ate ŋandiinta tiirim buui ale a te ale pabisaŋa a chim dii meena ate wa a yaali la. Kpaam kolini ale a magsi taasi kpien meena a maara boro. 6Chi Paalika tigini danni wa a te ka lalik paalik, pabisa siyuebi ale padiak, ba waai a kan ta jomi ya. 7Wa te ŋandiinta tiirim taasi kpienni ale lalik, taasi kpienni ale padiak, wa te dii ate wa a yaali la ale pabisaŋa. Wa maa te kpaam kolini a magsi taasi kpienni meena. 8Nabiika a daa jo, wa va nansuiŋku vataamka vuuku a ŋman va dula dek a nyini.

9Tɛŋka nuruma a dan jam Naawen niŋ tiŋŋa daaŋa, waai ale va wiiluk geŋka nansuiŋku a jo wa puusi la a va yeseoku nansuiŋku a nyini, waai abe le va yeseoku nansuiŋku a jo la a va wiilukku nansuiŋku a nyini waai a kan va nansuiŋ kuui ate wa va jo la a nyini, alege waai meena a va m kula a nyini. 10Nabiika a maa bo ba po, a va jo ase ba le a jo abe wa va nyini ase ba le a nyini.

11Tiŋŋa ale tiga ŋaai ate wa lueri la daaŋa, ŋandiinta tiirimu a chim taasi kpien nɔi ale lalik, taasi kpien nɔi ale padiak ale dii meena ate wa a yaali la ale pabisaŋa, ale kpaam kolini a magsi taasi kpien meena. 12Nabiika a dan pa wadek yaalika tiirimu a te Naawen, juka tiirim yaase suiyɔgni tiirita, nansuiŋ kuui ale tuk kori la a lagri te wa. Wa te wa juka tiirimu yaase suiyɔgni tiiritaŋa ase wa le a nye dii Vuusum danni la. Wa yaa nyini. Wa dan nyini ŋaaŋnyiŋ ku lik.

13Daa meena se fi te bein yeŋ pabiik kaai ale kan ta jomi ya a magsi juka tiirim a te Naawen. Saluik meena se fi te ka. 14Se saluik meena fi te pabiika ale ŋandiinta tiirim, taasi kpien nɔi a nin poori buyuebi, ku bunyi ale kpaam kolini a nin poori buta, ku bunyi fi te ale pabiika a dam zommu. Ŋan bieŋa de Naawen teka ka ŋmarisi kaai ale ka beni. 15Dila pabiika ale ŋandiinta tiirimu ale kpaamu a te ka saluik meena a magsi daa meena ju teka.

16Nyɔnɔwa Naawen ale biisi diila ale nna. Nabiika a dan pa tiirim wa nitalimu po a te wa nidoabilisaŋa, ka wa ŋaaŋbisaŋa mɛ ale soa. Ka ba nitalim ŋanta ate ba soa. 17Wa be dan pa tiirim wa nitalimu po a te wa tomteerɔ wanyi, tomteerɔwa a baga a ta kama a ga paari varibasika benni, ate tiirimu a ŋman cheŋ nabiika jigi. Wa nitalimu ka wa nidoabilisaŋa ale soa. Ka ba ŋanta. 18Nabiika kan pa nuruma nitalimu jaajaaboa a yiak ba alege ba nitalimu. Wa te wa nidoabilisaŋa ba nitalimu a nyini wadek ŋantaŋa po, ate mi nuruma waai a kan poori wadek wa ŋanta po.

19Nuruwa yaa ta mi va vajoka jigini ale bo nansuiŋku geŋka ale tuak tuilum diinaŋa ale tuk wiiluk geŋka ate kaabteerɔma a soa la a jo, a sak mi jigi ale bo yeniŋ geŋka kpeglimka. 20Wa weeni mi ayen, <<Juijui ate kaabteerɔma a za ba a dik nyemagsika tiirimu ale biem tiirimu abe ba a sɛ ŋandiinta tiirimu, ate ku kan te ba jo peelim dabiaka po a gaari nuruma a te Naawen ya.

21Wa yaa ta mi nyini peelim dabiaka po a ta mi gilim gugotta tinaansiwa, ate mi nya gugoruk meena po dabiak ka choa. 22Peelim dabiaka gugottaŋa tinaansiwa po, gugotta ale ŋman bo popo, ate woglim a chim anamagib kook ale pisiye ate labsimu a chim anamagib pineok. Gugoruk meena ale bo gugotta tinaansiwa po a soa ase ka chaab la. 23Dabaasa sinaansiwa kanyi meena ponni po a gilim kinni ka tintain ate bolim jiga a sɛ gilim kinni tɛŋka. 24Wa yaa weeni mi ayen, gbanlontaŋa ale nna ate baai ale a tom yenni po la a dik nuruma kaabka tiiritaŋa.

Currently Selected:

Ezekiel 46: BWU

Highlight

Copy

Compare