Ezekiel 45

1Ni daa gebi tɛŋka ase nitalim la, ni gebi ka kauk a te Naawen ase tuilum tɛŋ la. Ka woglimmu a chim anamagib tusa pisiyopɔi ale bunu (75,000), labsimu a chim anamagib tusa pisiyuebi (60,000). Tɛŋka meena ale ta tuilum kama. 2Mi jigini ni gebi tɛŋ ate kabta bunaansiwa kauk meena a chim anamagib tusidi ale kobsinu (1,500) abe anamagib kook ale pisinu peelim a gilim jigini ate peelim a boro. 3Tuilum tɛŋka ate ni gebi a te mi la ni magsi woglimmu anamagib tusa pisiyopɔi ale bunu (75,000) abe labsimu anamagib tusa pisita (30,000). Bu po ale mi jigini, Jigi Dii Ale Ŋmasi Ta Tuilum La. 4Dula ale ku chim tɛŋka tuilum jigi a magsi kaabteerɔma, baai ale a tom mi boka jigini ale forisi a moata a tom Naawen niŋ la. Ku le chim ka juijui ale magsi ba yeeŋa ale tuilum jigi a magsi mi jigini. 5Peelim buui ale a chim anamagib tusa pisiyopɔi ale bunu (75,000) woglim ate anamagib tusa pisita (30,000) a chim labsim la, Livaima ale a tom yenni po la ale soa ase nitalim la, a chim ba tɛŋsa ate ba a boro.

6Magsi tɛŋka labsimu anamagib tusa pi ale bunu (15,000) abe woglimmu anamagib tusa pisiyopɔi ale bunu (75,000) ate ka maŋ tuilum tɛŋka. Izirali yenni meena ale soa tɛŋ kala.

7Nabiika ale soa ka tɛŋ kaai ale nye bain ale tuilum tɛŋka ale tɛŋka dek ale soa tɛŋ kaai la. A zaani yeniŋ ka dari kama a cheŋ yeniŋ geŋka, a zaani konni ka dari kama a cheŋ kori geŋka. Ate ka woglim nyiŋ ka zaani yeniŋ geŋ a cheŋ kori geŋ a magsi chaab ale yezuimaŋa dinyi tɛŋka. 8Tɛŋka de wa soa ka jigi ale la Izirali po. Ate mi nabisaŋa a kan ŋman namsi mi nuruma alege ba le basi ate Izirali yenni soa tɛŋka a va chaab ale yezuimaŋa.

9Nyɔnɔwa Naawen ale biisi diila ale nna. Ni cheŋ niŋ ka yega, Izirali nabisa. Ni pa ni wɔkwɔkka ale ni namsika a basi abe ni a nye dii ale ka wensie ale magsi la. Ni basi m nuruma taka. Mi Nyɔnɔwa Naawen ale weeni. 10Ni pa ŋanmagsin maŋsa, taasi kpien maŋ ale samɔniŋ maŋ. 11Taasi kpienni ale samɔniŋka a magsi ba chim ka bunyi. Taasi kpienni a soa se ka kuruba kpioŋ la ate samɔniŋka a soa se kuruba kpioŋ, kuruba kpioŋku ale chim ja magsim a te buyewa. 12Ligbie dobrim a magsi ku chim ka magsika dobrim pisiye. Ligbie dobrim pisiye a gum ligbie dobrim pisiye ale bunu a gum ligbie pi ale bunu a chim ka boorik.

13Tiirim buui ale potim magsi ni a te la ale nna. Taasi kpienni po ku poorika buyuebi bunyi a nyini wiiti kuruba kpioŋku po abe samɔniŋ po ku poorika buyuebi bunyi a nyini barli kuruba kpioŋ po. 14Wa le te kpaamu magsaŋa la, ate ba pa samɔniŋ a magsi la, ka samɔniŋka piika po a nyini kuruba ba pi meena po. Ku meena a nye ase ka samɔniŋsa pi a magsi chaab ale kuruba ba pi la. 15Pa yeoŋ a yeeri piisa kobsiye meena po, ŋaai ale a dɛ Izirali wuuk kuui ale zaŋti nalimnyiini la. Ba le pa ŋade a magsi ŋandiinta tiirimu, ale juka tiirimu ale suiyɔgni tiirita a nye biem duisi basika a te nuruma. Nyɔnɔwa Naawen ale weeni. 16Izirali demma meena ale nye tiirimu de a magsi Izirali nabisaŋa nyeka. 17Ku ka nabisaŋa tuini ayen ba te juka tiiritaŋa ale ŋandiinta tiiritaŋa ale daam tiiritaŋa tiŋŋa jigini. Chi Paalika ale Vuusum Daaŋa tiŋŋa, Izirali yenni tiga ŋaai meena ate wa lueri la. Wa le te biem tiirimu, ŋandiinta tiirimu, juka tiirimu ale suiyɔgni tiirita a nye biem duisi basika a te Izirali yenni.

18Nyɔnɔwa Naawen ale biisi diila ale nna. Chi kaai ale a piilim la ka dai yeŋ dai ni pa lalik paalik kaai ale kan ta jomi ya a sugri mi boka jigini. 19Kaabteerɔwa a pa biem tiirimu ziimu gela a nyo yenni tuataŋa nyiŋ ale kuŋkuŋku ŋmazuk noawanni gugotta tinaansiwa ale ponni po dabiaka tuataŋa nyiŋ. 20Se fi nye dila dek daa ŋayopɔiwa danni chiika po a te waai ale kan potim tom kaasi ya yaase wa zɛ ale tom kaasi. Se fi nye biem duisi basika a te yenni.

21Piilimka chiika ka daa pi ale ŋanaansi dai ni kpesi Gaambasika Tigini, tigi dii ale di dɛ daa ŋayopɔi, diipo ate ni le ŋɔbi boroborok kuui ale kan ta dabinta la. 22Dai dila danni nabiika a yaali lalik ase biem tiirim la a magsi wadek ale tɛŋka nuruma meena. 23Dai meena Tigini daa ŋayopɔiwa po wa yaali lalisa siyopɔi ale padaasa siyopɔi ale kan ta jomi ya ase juka tiirim la a te Naawen ale buduk ase biem tiirim la. 24Wa magsi wa yaali ŋandiinta tiirim, taasi kpien nɔi a magsi lalik meena ale taasi kpien nɔi a magsi padiak meena, ale kpaam kolini nɔi a magsi taasi kpien.

25Tigini daa ŋayopɔiwa po, dii ale a piilim chiisa siyopɔiwa po ka daa pi ale ŋanu danni la, wa gomsi yaali dila degadega a magsi biem tiiritaŋa, juka tiiritaŋa, ŋandiinta tiiritaŋa ale kpaam.

Currently Selected:

Ezekiel 45: BWU

Highlight

Copy

Compare