Ezekiel 44

1Nuruwa yaa ta mi ŋman jam puusika jigini peelim tuoku, kuui ale a tuk kori geŋka la ate ku lik. 2Naawen yaa weeni mi ayen, <<Tuokku de abe kasim lik. Ku kan lagri, waai a kan va ku a jo. Ku kasim lik dii nyiŋla Naawen, Izirali Wenni a va ka kula a jo. 3Ka nabiika dek wa nyiini ale waai ale wa kali ponni po nansuiŋku nɔi a de Naawen niŋ. Wa va nansuiŋku vataamka vuuku a jo a va dula dek a nyini.

4Nuruwa yaa ta mi a va wiiluk geŋka nansuiŋku a jo jam Naawen yenni niŋka. Mi yaa nya Naawen zulaŋa a sueri Naawen yenni ate mi a lo poi nyiŋ.

5Naawen a weeni mi ayen, Saalɔ biiga, kpesi nya, chiib wom abe fi popola a bo ŋmarisika meena po ate mi a weeni fu a va chaab ale Naawen yenni la a magsi chaab ale di sinsaŋŋa meena. Pa fi popola a basi yenni nansuiŋku ale puusika jigini va nyinika jiŋŋa zuk. 6Weeni tuikpari Izirali yenni ayen, Nyɔnɔwa Naawen ale biisi diila ale nna. Izirali yeri ya ni nye kaai ate mi a kisi la a zuak kama. 7A gum ni wa yonaŋa nyeka ate mi a kisi la ale ni ta ka nicham ate ba suiniima ale ba nyiŋlam po ba an gebi ba yua ate ba jo mi puusika jigini a taŋ mi yenni alege pa ŋandiinta ale kpaam ale ziim a te mi ale kaasi mi nɔiyeŋka. 8Ni le magsi ayen ni tom ni tuimaŋa a va mi tuilum ŋantaŋa la, ni basi ate ka nuru yonta a nya mi boka jigini. 9Nyɔnɔwa Naawen ale biisi diila ale nna. Nichaanɔ waai ale kan gebi wa yoari wa suinum ale wa nyiŋ lam po la a kan jo mi jigini daa nicham baai ale poom bo Izirali demma suŋsuŋ la mɛ.

10Livaima ale basi mi a cheŋ niŋ diipo ate Izirali a cheŋ bɛ la, baai ale basi mi ale cheŋ bɛ a va ba bɔgtaŋa la ale nam ba wabaataŋa nyiŋ. 11Ba baga a tom mi boka jigini kama, a nya yenni nansuiŋtaŋa zuk abe ba a tom di po. Ba baga a tɔgri juka tiiritaŋa kama ale kaabka tiirita a te nuruma abe ba zaani a te nuruma a tom a te ba. 12Alege ba le tom te ba ba bɔgta niŋ la a basi ate Izirali yenni a lo biem po la, dila nyiŋ mi zak ka nisa wen a pɛ ayen ba le nam ba wabaataŋa nyiŋ. Nyɔnɔwa Naawen ale weeni. 13Ba kan jam moata ayen ba tom a te mi ase kaabteerɔba la, yaase ba jam moata mi tuilum ŋantaŋa, yaase mi tiiritaŋa ale ŋmasi ta tuilum la. Ku a fɛ ate ba ta wie ŋaai ate mi kisa ate ba nye la chivieŋa. 14Alege mi le basi ate ba a nya yenni tuimaŋa ale tuim ŋaai meena ate ba le tom la.

15Alege kaabteerɔma, baai ale ka Livaiba a chim Zadok ŋaaŋbisa a jam tom mi boka jigini tuimaŋa ale siaka diipo ate Izirali demma basi mi niŋ. Ba zaani mi niŋ a pa kpaam ale ziim a kaab te mi. Nyɔnɔwa Naawen ale weeni. 16Ba nyiini ale a jo mi boka jigini. Ba nyiini mɛ ale jam a moata mi jazaanimu a tom mi niŋ ale a tom m tuimaŋa.

17Ba daa jo ponni po dabiaka nansuiŋtaŋa, ba jo garuk naliŋsa, ba kan jo kɔbta gatta ase ba nin boro a tom ponni po dabiaka nansuiŋtaŋa yaase yenni ponni po. 18Ba pa garuk naluŋ zutɔksa a vuk ba zuimaŋa abe tɛŋ garuk naliŋsa a bobi ba chaasaŋa. Ba kan jo jabuui ale basi ate wulum a nyini ba. 19Ba dan nyini peelim dabiaka po juijui ate nuruma a boro la, ba yeeri ba garuk tii ate ba jo a tom la a basi ti tuilum diinaŋa po, abe ba jo garuk yonta, ate ba kan gaari nuruma a te ase tuilum nyam la ale ba gattaŋa.

20Ba kan chiiri ba zuimaŋa yaase ba basi ate ba zuisaŋa a chim woŋŋa alege ba kasim a zamsi zuisaŋa ba zuimaŋa po. 21Kaabteerɔ waai a kan nyu daam a jo ponni dabiaka po. 22Ba kan faari pukɔga yaase nipok baai ale ba chorɔba ale basi chaaba. Ba baga a faari ka baai ale kan seba nidoaba ale nyini Izirali buuni po nyiini yaase kaabteerɔba pukɔga. 23Ba sak mi nuruma ate ba seba tuilum ŋanta ale ŋankoa a gaari abe ba sak ba ate ba a gaari ŋan naliŋsa ale ŋan daŋtisa.

24Nuruba a dan ta chaab, kaabteerɔma a tom ase boteerɔba la a abe ba poli ku zuk a va chaab ale mi buusaŋa. Se ba ta mi sinsaŋŋa ale mi ŋmarisika a magsi mi tiŋŋa ate mi a lueri la. Abe ba ta m Vuusum Daaŋa ate ŋa welema.

25Kaabteerɔ a kan cheŋ a moata kpio ate wa taŋ wa dega, alege waai ale kpi la a dan ka wa ko yaase wa ma, wa nidoabili yaase lie, suok yaase tua waai ale kan yali ya, wa baga a taŋ wadek kama. 26Ku ŋaaŋnyiŋ wa dan sugri wadek ku a fɛ ate wa limisi daa ŋayopɔi. 27Dai dii dai ate wa a jo mi boka jigini ponni po dabiaka ayen wa tom la, wa te biem tiirim a magsi wadek. Nyɔnɔwa Naawen ale weeni.

28Mi nyiini ale kaabteerɔma nitalim. Ni kan pa jaab Izirali a te ba ate ba ta. Mi le chim waai ate ba ta la. 29Ba a dɛ ŋandiinta tiirimu ale biem tiirimu ale nyemagsika tiirimu ale jaab meena ate Izirali a pa a te Naawen la ba le soa. 30Yɔn maŋ sii meena ale a dɛ niŋ la ale tiirim yonta ka kaabteerɔma ale soa. Ni tɛŋka ale dɛ niŋ a bɛ ŋan baai la ni pa te ba ate niauŋ a jam ni yenni zuk. 31Kaabteerɔma kan ŋɔbi jaaboa, nuim yaase duŋŋa ale ka kpi doa yaase gɔi duŋsa a ko ka.

Currently Selected:

Ezekiel 44: BWU

Highlight

Copy

Compare