Ezekiel 3

1Wen yaa weeni mi ayen, <<Saalɔ biiga, dɛ fi le nya jabuui la, gobi gbaŋka de. A yaa cheŋ ga biisi te Izirali demma.>> 2Mi yaa lak m nɔnni ate wa te mu gbaŋka ayen m ŋɔbi. 3Wa yaa weeni mi ayen, <<Saalɔ biiga, ŋɔbi gbaŋka de ate m pai a te fu la a sueri fi ponni.>> Ate mi ya ŋɔbi ate ka masa nna se siita la mi nɔnni po.

4Wa yaa weeni mi ayen, <<Saalɔ biiga, cheŋ Izirali demma jigi a ga biisi m wieŋa a te ba. 5M kan tom fu ka baai biik ate fi kan miŋ la, yaase ka pagra la jigi ya. M tom fu ka Izirali demma jigi. 6M kan tom fu ka tɛŋ sii biik ate fi kan wom yaase ka pagra ate fi kan miŋ wieŋa la jigi ya. M dan tom fu ka ba de jigi ba le wom fu. 7Alege Izirali demma a kan siak wom fu dii nyiŋla ba an poom a yaali ayen ba wom mi. Mm Izirali demma meena tue kpari kama a kan wom mi nɔi ya. 8Nya, yɔgyɔgla m basi kama ate fi tuiri kpari ale pagra ase ba la. 9M le nye ate fi pagra ase kutuk la, a pagra a gaam tain. Kan chali yɔgsummoa yaase fi nyiŋ a gɔk ale ba, diila ba ka baai ale basi mi.>> 10Wa yaa ŋman weeni mi ayen, <<Saalɔ biiga, ta siaka ale wie ŋaai meena ate m biisi a te fu la abe fi kpesi wom ŋa. 11Abe fi cheŋ ligrɔma jigi fidek nuruma a weeni ba ayen, <Nyɔnɔwa Naawen ale biisi diila ale nna.> Ba le wom yoo ba kan wom yoo tin weeni ba.>>

12Wen Chiika yaa zak mi ŋmai, ate mi wom lueluk kpioŋ a girinti mi ŋaaŋ a weeni ayen, pak Naawen ale bo wenŋmazuk la wa nalimu ale wa zulaŋa nyiŋ. 13Mi ya wom ŋanvutaŋa kiŋkaŋŋa ale ŋa a tiri chaab ale wiilima mɛ ale bo ganaŋa la nuemka. Nuemka kasim a girinti kama. 14Wen Chiika yaa zak mi ŋmai a ta mi cheŋ. M sui jam a puuri di an peenti ya. Ate mi nya Naawen pagrim kpiemu. 15Mi yaa jam ligrɔma Juda demma jigi. Ba jam bo ka Chebar Benni nɔi ale bo Tel Abib la. Nuruma de ale bo kauk kuui la mi kali dula ka daa ŋayopɔi ate ku cha mu nna yegayega.

16Daa ŋayopɔi ale taam la Naawen ŋman biisi te mi ayen, 17<<Saalɔ biiga, m yaa basi ate fi chim ka Izirali limisidɔ. Diipo meena fi dan ga wom wari m jigi kaam ba a te mu. 18M dan weeni wabaata nyɔnɔ ayen wa le sum kpi, se fi kaam wa ate wa kan kpi. Fi dan kan biisi a kaam waba nyeerika ate wa basi wa biemu, wa le kpi ale ka wa biemu. Alege m yaa le ta fi nuru wala kummu nyiŋ. 19Fi be dan kaam waba nyeerika ate wa an basi wa biemu wa le kpi wa wabaataŋa nyiŋ. Ale fi poom vari fidek a basi kama. 20Baai ale nye wayɔrisima la a dan basi wayɔrisima nyeka ale ŋman jo biemu po ate m basi ate biem paari ba, ba a kpi kama. Dii nyiŋla fi le kan kaam ba la ba le kpi ale ba wabaataŋa, ate ba le tom yɔrisim ŋaai la m kan teeri ŋa. Alege m le ta ka fi ba kummu nyiŋ. 21Alege fi dan kaam nuru maŋsaŋa ayen ba kan tom kaasi, ate ba an tom kaasi ya, ba kan kpi diila ba siak kaamka kama. Ale fi mɛ poom vari fidek a basi kama.>>

22Mi yaa nya Naawen pagrimu dula jigini. Wa yaa weeni mi ayen, <<Yiti nyini a cheŋ peelim kpiemu niŋ. Dula jigini m le biisi ale fu.>> 23Dila mi yaa yiti a cheŋ peelim kpiemu niŋ. Mi yaa nya Naawen nalimu ale wa zulaŋa dula ase m le poom liŋ nya Chebar Benni nɔi diila ate mi deri lɔ poi liŋ. 24Wen Chiika yaa jo mu a zak mu zaani m naŋsa zuk. Wa yaa biisi ni mu ayen, <<Cheŋ a ga lik fidek a basi dɔk po. 25Fi Saalɔbiika tɔga fi nuruma ale bobi fu ale miisa ate fi kan baga a nyini ba po. 26M le basi ate fi giŋgeluŋku a maŋ fi laŋtika ate fi nye diki. Fi kan baga a nak nanpaga ale nuruma, ale ba le zɛri mu la meena. 27Alege m dan biisi ale fu, m le lak fi nɔnni ate fi weeni ba ayen, Nyɔnɔwa Naawen ale biisi diila ale nna.> Baai ale a wom la, ba wom. Baai ale a zɛri la, ba zɛri diila ba ka nuru baai ale zɛri mi.

Currently Selected:

Ezekiel 3: BWU

Highlight

Copy

Compare