Ezekiel 2

1Naawen yaa weeni mi ayen, <<Saalɔ biiga, yiti zaani fi naŋsa zuk ate m biisi ale fu.>> 2Wa le a biisi ale mi la, Wen Chiika a yaa jo mi a zak mi zaani mi naŋsa zuk. Ate mi yaa wom ale Naawen a biisi ale mi. 3Wa yaa weeni ayen, <<Saalɔ biiga, maa tom fu ka Izirali demma jigi. Ba zɛri mi kama ale basi mu. Ba le ba kokpieŋsaŋa a tom kaasi mi kama a jam paari jinla danni. 4Maa tom fu ka nuru baai tue ale kpari ale kan zuli mɛ la jigi. Fi le weeni ba ayen, <Nyɔnɔwa Naawen ale biisi diila ale nna.> 5Dai di dai ba le wom yaa ba poom kan wom, ba tɔlim ka tukpari nuruba. Alege ba le seba ayen biisiteerɔ a bo ba suŋsuŋ. 6Saalɔ biiga, kan chali nuruma yaase ba le a biisi diila. Ba za ba a nye nya ase ka munsa ale ŋan maŋta la a gilim fu ate ku a nye fi jigi mɛ nna ase fi bo ka nuenta suŋsuŋ la, kan chali yɔgsum. Kan chali yɔgsum ale ba biika yaase ba nyaasimu, dii nyiŋla ba ka nuru baai ale basi mi. 7Alege biisi m wieŋa a te ba. Ba le wom yaa ba kan wom diila ba basi mu kama. 8Alege fi saalɔ biiga wom mi le a weeni fu diila. Kan basi mu ase nuruma de ale basi mu diila. Lak fi nɔnni a dɛ jabuui ate m pai a te fu la.>>

9Mi yaa nya nisa ale teeri a tuk mi nyiŋ, ate gbaŋ a bo si po. 10Wa yaa a lak gbaŋka mi niŋ. Kuuna yiila, ale niniga ŋmarisika, ale daanika wie a ŋmarisi doa ka niŋ ale ka ŋaaŋ.

Currently Selected:

Ezekiel 2: BWU

Highlight

Copy

Compare