Ezekiel 14

1Izirali niŋdeerɔ kpagsaŋa gela yaa jam kali mi niŋ. 2Naawen yaa biisi ale mi a weeni ayen, 3<<Saalɔ biiga, nuruma de a yaali ayen ba kaab ka bɔgta. Ba ta ka biem wie ŋaai ale nye ate nuruba a tom biem la. M be te ba suik ate ba bek maarika? 4Dila nyiŋ, biisi weeni ba ayen, <Nyɔnɔwa Naawen ale biisi diila ale nna, Izirali nuruma baai ale a yaali ba kaab bɔgta abe ba ta biem wie ŋaai ale nye ate nuruba a nye biem alege a jam biisiteerɔwa jigi la, Mi, Naawen dek ale tulisi ba ba bɔgtaŋa kaabka nyiŋ. 5Ate m ŋman nya m nuruma Izirali demma, baai ale basi mu ba bɔgtaŋa nyiŋla.>

6<<Dila nyiŋ weeni Izirali demma ayen, <Nyɔnɔwa Naawen ale biisi diila ale nna, Ni tagri ni nyeka ale ni suiniimaŋa abe ni basi bɔgta kaabka. Ni basi wie ŋaai meena ate mi kisi la nyeka.

7<< <Izirali demma baai ale nichamma baai ale bo Izirali tɛŋka po la a daa yaali ba poori badek mi jigi a kaab bɔgta abe ba ta, nye kaai ale a basi ate nuruba a nye biem la. Ba yaa dan jam biisiteerɔwa jigi ayen ba bek mu bega, Mi Naawen ale tulisi ba m dek. 8M le zɛri ba, M le yeeri ba m nuruma po ate ba a nya ba. Dila ni le seba ayen Mi ale Naawen.

9<< <Alege, ba dan paasi biisiteerɔwa ate wa biisi wari ka mi Naawen ale paasi wa ate wa biisi. Dila mi yaa le pai m pagrimu a kaasi wa Izirali demma suŋsuŋ. 10Biisiteerɔwa ale nye bɛ kama ase waai ale bek a yaali maarika la. Ba nɔi bayewa ale nam ba biemu nyiŋ. 11Ate Izirali tɛŋka kan ŋman basi mi yaase ba daŋ badek ale ba wabaataŋa. Ba le chim m nuruba ate mi mɛ a chim ba Wen. Nyɔnɔwa Naawen ale weeni.> >>

12Naawen yaa biisi ale mi a weeni ayen, 13<<Saalɔ biiga, tɛŋ kaai nuruba a dan tom kaasi mi a kan zuli mi, m le tu chaab ale ba ale pagrim. M le kaasi ŋandiintaŋa abe m basi ate kɔm jam ate nuruba ale duŋsa meena a kpi. 14Nuruma de batawa Nowa ale Daniel ale Job a dan poom bo tɛŋ kala po ba tuim maŋsaŋa ale vari ka badek ba nyiini a basi. Nyɔnɔwa Naawen la ale weeni.

15<<Yaase m basi ate gɔi duŋsa a jo tɛŋka po ate tɛŋka a doa koruk, biik a kan boro. Ate nuru a kan va ka po a taamu duŋsaŋa nyiŋ. 16Nyɔnɔwa Naawen ale a weeni ayen, Mi le ka waai ale vua la, Nowa ale Daniel ale Job a dan poom bo tɛŋka po ba kan baga a vari badek bisa ale ba lieba a basi, ba le vari ka badek a basi. Ba le vari ka badek a basi alege tɛŋ kala ale doa koruk.

17<<Yaase m ta kpaliŋ jam tɛŋka po. Da dii dai m le weeni ayen, <Kpaliŋ siti tɛŋka po,> a ko nuruma ale duŋsaŋa. 18Mi Nyɔnɔwa Naawen ale a weeni ayen, Mi ale vua la, nuru bala batawa a dan poom bo tɛŋ kala po ba kan baga a vari ba bisa ale ba lieba a basi. Ba le vari ka badek a basi.

19<<Yaase m basi ate tuem a waaŋ tɛŋka meena. M sui ale puuri nna yegayega ale ba ate m kaasi abe m ko nuruma ale duŋsa. 20Mi Nyɔnɔwa Naawen ale weeni ayen mi ale sum vua la, Nowa ale Daniel ale Job a dan poom bo tɛŋka po ba kan baga vari ba biik yaa ba lie a basi. Ba te vari ka badek a basi ba wamaŋsaŋa nyiŋ.

21<<Nyɔnɔwa Naawen ale biisi diila ale nna, Ayen m le zɔk dii a magsi Jerusalem la a bie ka yega. M le te ninam tɔgatɔga bunaansi jam ba jigi. Kpaliŋ, kɔm, gɔi duŋsa ale tuem. A ko nuruma ale duŋsaŋa. 22Alege nuruba gela ale nyin du nyin, bisa ale lieba ale nyini. Ba le nyini jam ni jigi ate ni nya ba nyeka ate sui yaa yɔk ale mi ale ta kaasuŋ kuui a jam Jerusalem la. 23Ni dan nya ba nyeka ni sue le yɔk ate ni seba ayen mi an nye basi du alege ka wari nyiŋ. Ka Mi Nyɔnɔwa Naawen ale weeni.

Currently Selected:

Ezekiel 14: BWU

Highlight

Copy

Compare