Ezekiel 13

1Naawen a ŋman biisi wa wanni a te mi a weeni ayen, 2<<Saalɔ biiga, mooli a kaam Izirali biisiteerɔma. Weeni baai ale poli a weeni badek wie la ayen ba wom Naawen wanni. 3Nyɔnɔwa Naawen ale biisi diila ale nna, Ku le bie te biisiteerɔ bettaŋa ale a va badek popola alege an nya wari mi jigi la. 4Izirali demma, ni biisiteerɔma a nye ase ka gɔi baasa ale a gisi ŋanta ayen si ko abe si dɛ yie luema po la. 5Izirali a nye ase ka yeri ale lo kaasi diila, alege ni an ga tebi kab tii ale wie lo la yaase ni tebi saasaŋa. Dila la Izirali ale nye ka sɛ a tu chaab ale dachaasaŋa kpaliŋka po Naawen danni? 6Ni biisiteerɔma a nya ka venta wie ale a biisi venta mɛ. Ba a weeni kama ayen, <<Naawen wari ale nna,>> alege Naawen an poom tom ba. Alege ba a poli ayen ba le weeni diila ale chim wensie. 7Ni nyiem weeni kama ayen, <<Naawen wari ale nna,>> alege ka venta wie ni nya. Ni wieŋa ka venta, dii nyiŋla mi an biisi wari ya.

8<< <Dila la Nyɔnɔwa Naawen ale biisi diila ale nna, dii nyiŋla nama biisiteerɔma biisi ka venta wie ale nya wie ŋaai ale kaa chim wensie. Mi ta ka chaab ale ni. Mi Nyɔnɔwa Naawen ale weeni. 9Mi ale namsi biisiteerɔ baai ale a nya venta wie ale a velim wie la. Ba kan jigi mi nuruma po. Ba yue kan maa ŋmarisi bo Izirali demma wieŋa po, ba be kan jo Izirali tɛŋka. Dila ni le seba ayen ka Mi ale Nyɔnɔwa Naawen la. 10Dii ate mi a nye dila la ba te ti m nuruma a cheŋ a bɛ ale a weeni ayen, <<Suiyɔgni a boro.>> alege suiyɔgni a ka. Nuruma a dan se parik kaai ale kan pagra biisiteerɔma a sa siaka ale peeluk ase parik pagrik la. 11Dila nyiŋ weeni baai ale pai peeluk a sa parik kaai ale kan pagra la ayen, ŋmoruk ale ni yega ate viok ale tana a lo ate va pagrik a wɛ siaka. 12Siaka a dan lo nuruba ale bek fu ayen, <<Peelukku ate fi pai sa siaka la a bo be?>>

13<< <Dila la Nyɔnɔwa Naawen ale biisi diila ale nna, M le wɛ siaka ale va pagrik. M suinni ale a puuri la nyiŋ m le basi ate ŋmoruk a ni yega abe tintain tuila a kaasi parika. 14M le kabri parik kaai ate ni nye ka peelukku la. Ka le paari tɛŋ ate nuruba nya ka nyubini. Parisaŋa a dan lo, nama dek ale kpi si kiri la. Ate ni seba ayen ka Mi ale Naawen. 15M sui le puuri ale parika ale baai ale pai peelukku a sa ka la. Abe m weeni ni ayen, parika a cheŋ ale baai ale pai peelukku a sa ka la. 16Izirali biisiteerɔma ale mooli a te Jerusalem la ale baai ale nya ayen suiyɔgni a bo tɛŋka po alege suiyɔgni a ka la ale taam meena. Nyɔnɔwa Naawen ale weeni.>> >

17<<Yɔgyɔgla de, Saalɔ biiga nya nipooma ale bo nuruma po la a poli badek wieŋa a weeni la. Biisi te ba. 18Weeni ayen, <Nyɔnɔwa Naawen ale biisi diila ale nna, Ku le bie a te nipok baai ale a baali ŋan kperisa a su ba nisa ale a nye ŋan nyaara a pai vi ba zuima ayen ba bari yik nuruba la. Ni kaasi mi nuruma nyuvooŋa kama ale ayen ni vari nidek nyuvooŋa. 19<Barli> nisa nɔi ale boroborok maga nyiŋ ate ni an zuli mi m nuruma suŋsuŋŋa. Ni velim te mi nuru baai ale a wom venta la. Ni ko baai ale kan magsi ba kpi ale basi baai ale magsi ba kpi la.

20<< <Dila la Nyɔnɔwa Naawen ale biisi diila ale nna, wa kan yaali kperisa wie ŋaai ate ba nye a bari a yik nuruba ase nuinsa la. Ayen wa le gebi kperisa ŋantaŋa ba nisaŋa po a vari baai ate ba bari yik ase nuinsa la a basi. 21M le cheeri ba ŋan nyaaraŋa abe m vari m nuruma ni nisa po. Ni kan ŋman bari yik ba ale ni pagrimu. Ate ni seba ayen ka Mi ale Naawen. 22Ba a nye ka wie ate mi a kan nye ŋa. Ba velim kama a te nuru maŋsa ale a te ba nyiŋbiiri ate ba nye a kaasi, ale a paasi wabaata nyama ate ba kasim a nye biem a kaasi ba nyuvooŋa. 23Mi kan basi ate ba ŋman nya venta wie abe ba porisi, ate m vari m nuruma ba nisa po a basi. Ate ba seba ayen, Mi Naawen ale nye wieŋa de.> >>

Currently Selected:

Ezekiel 13: BWU

Highlight

Copy

Compare