Ezekiel 12

1Naawen a ŋman biisi wa wanni te mi a weeni ayen, 2<<Saalɔ biiga, fi bo ale ka nuru baai ale kaa zuli mi la. Ba ta nina kama alege kan nya a ta tue alege kan wom, dii nyiŋla ba ka nuru baai ale zɛri mi zula teka. 3Dila nyiŋ, saalɔ biiga, tigsi fi ŋantaŋa ase ba le yik fu ta cheŋ ka jigi la, a yaa cheŋ ase ba yik fu kama la kantueŋ ate nuruba a nya. Nyini fi jigini a cheŋ jigi yoŋ ate nuruma a nya. Ate ba ale zɛri ayen ba kan zuli mi la, da dii dai ba le miŋ ku kiri. 4Ku dan ka kantueŋ ate nuruma a nya, yeeri ŋan baai ate fi tigsi la ase ba yik fu la. Junɔi, nuruma ale a nya la basi fi jigini ase nuruba ate ba yik ba ta nyini ba tɛŋ a cheŋ la. 5Nuruma ale diem a nya fu la, keri vɔrup siaka nyiŋ a ta fi ŋantaŋa va du nyini. 6Zak ba a vi ŋmankpala ate nuruma a nya, a yaa ji ba ta nyini legini po. Lik fi ninaŋa ate fi kaa nya tɛŋka, dii nyiŋla m basi kama ayen fi nye dila a sak Izirali demma.>>

7Mi yaa nye wieŋa de a va dii ate wa weeni la. Kantueŋka mi yaa ji ŋantaŋa ate m tigsi la ase ba yik mu ta a cheŋ la. Junɔinni mi yaa keri vɔrumu siaka nyiŋ ale m nisaŋa. A ta m ŋantaŋa nyini legini po a zak vi ŋmankpala ate nuruma a nya.

8Saluiku ate Naawen biisi wa wanni te mi ayen, 9<<Saalɔ biiga, Izirali dem baai ale zɛri mi zuli ka la an bek ayen, <Ka boa ti fi a nye>? 10Weeni ba ayen, <Nyɔnɔwa Naawen ale biisi diila ale nna, Wanni de ka naawa ale bo Jerusalem la ale Izirali nuruma ale bo dula la wari.> 11Weeni ba ayen, <Mi a sak ba ka wari.> Wie ŋaai dek ate m nye la, m le nye Jerusalem nuruma ka dila dek. Ba le yik ba ta nyini ba tɛŋka a cheŋ jigi yoŋ. 12Naawa ale pai wa ŋantaŋa a vi ŋmankpala a nyini legini po a cheŋ. Nuruma ale keri vɔrup siaka po a ta wa nyini. Wa le lik wa ninaŋa ate wa kaa nya tɛŋka. 13Alege m le yuk m ŋmiaka a vi wa zuk a yik wa. M yaa le ta wa jam Babilon, Kaldiya demma tɛŋka. Wa kan nya tɛŋ kala, alege wa za wa kpi ka dula. 14Baai meena ale gilim naawa la, wa maarima ale wa tugurik tɔŋdɔma meena, m le basi ate ba waaŋ jigi meena a yaa ko ba ale m gebika. 15M dan basi ate ba waaŋ tɛŋsaŋa meena po ba le seba ayen ka Mi ale Naawen. 16Alege m le vari ba maga a basi, m kan ko ba ale gebika, yaase m basi ate kɔm ko ba, yaase m basi ate nyiŋtuila a ko ba. Ba yaa le weeni sak tɛŋ sii meena ba cheŋ la gaasa wie ŋaai meena ba nye la. Ate ba yaa seba ayen ka Mi ale Naawen.

17Naawen a ŋman biisi wa wanni a te mi ayen, 18<<Saalɔ biiga, fi daa dɛ ŋandiinta basi ate fi nyiŋka a gɔk, fi be daa nyu nyiam basi ate fi nyiŋka a gɔk ale yɔgsum. 19Abe fi yaa weeni tɛŋka demma ayen, <Nyɔnɔwa Naawen ale weeni dii a magsi chaab ale nuru baai ale bo Jerusalem, Izirali tɛŋka po la. Ba le dɛ ŋandiinta ale yɔgsum abe ba nyu nyiam ale chichama, dii nyiŋla ba tɛŋka kan ŋman ta jaaboa nuruma gaasaŋa ale nyeka tuemu nyiŋ. 20Tɛŋ sii ate nuruba a boro la ale kaasi doa. Tɛŋka ale chim tɛŋ koruk. Ate ni seba ayen ka Mi ale Naawen.> >>

21Naawen a biisi wa wanni te mi a weeni ayen, 22<<Saalɔ biiga, ka boan biik ate ni ta Izirali tɛŋka po nna: <Daaŋa jam a taam ka di alege dii ate Naawen pai sak la kan nye jaaboa>? 23Dila nyiŋ weeni ba ayen, <Nyɔnɔwa Naawen ale biisi diila ale nna, M le te ba basi nna wa weeni ka. Waai be kan bo Izirali a ŋman weeni wanni de.> Alege weeni ba ayen, <Ku moata ate dii meena m pai sak la a chim wensie. 24Venta wie nyaasim ale bi sii ale a peenti nuruba sui Izirali tɛŋka po la a kan boro. 25Alege Mi Naawen ale biisi. Mi ale a weeni diila ale nye ku kan beni. Ni zɛri mi zula teka kama ale ni daaŋa po m le biisi abe m nye. Nyɔnɔwa Naawen ale weeni.> >>

26Naawen biisi wa wanni te mi a weeni ayen, 27<<Saalɔ biiga, Izirali demma weeni kama ayen, <Ezekiel ale nya diila ka chum po wie nyiini. Wa a biisi ka chum po wie.> 28Dila be weeni ba ayen, <Nyɔnɔwa Naawen ale biisi diila ale nna, Wa wieŋa ŋa ŋaai mɛ la kan beni. M le weeni diila m le nye. Nyɔnɔwa Naawen ale weeni.> >>

Currently Selected:

Ezekiel 12: BWU

Highlight

Copy

Compare