Nyinika 9

1Naawen yaa weeni Moosis ayen, <<Cheŋ Faaro jigi a weeni wa ayen, <Naawen, Yiburu demma Wenni a weeni ayen, <<Basi ate m nuruma a cheŋ a ga puusi mu.>> 2Fi dan zɛri an te ti ba cheŋ ya alege kasim peri ba tara, 3Naawen nisa ale ta nyiŋtuila a jam ni duŋsaŋa ale bo laŋsaŋa po la. Wa le ta jam ni wusumaŋa ale bonsaŋa ale laalaakomima ale niiŋa ale piisaŋa ale buaŋa zuk. 4Alege Naawen ale basi ate ku chim ku tɔga Ejipiti ale Izirali duŋsaŋa suŋsuŋ, ate Izirali demma duŋ mɛ la a kan kpi.> >>

5Naawen yaa te diipo ate wa le nye la a weeni ayen, <<Chum Naawen ale nye kude tɛŋka po.>> 6Vari ale jam veenti la Naawen yaa nye dila. Ejipiti demma duŋsaŋa meena a kpi kama, alege Izirali demma duŋ yeŋ mɛ la an kpi ya. 7Faaro yaa tom nuruma ayen ba ga kpesi nya ate ba nya ayen Izirali demma duŋ yeŋ mɛ an kpi ya. Alege wa suinummu po wa an siak a te ba, wa be kan te ti ba cheŋ.>>

8Ate Naawen yaa weeni Moosis ale Aaron ayen, <<Nye kaalim nisa nɔi a yuk basi wen Faaro niŋ. 9Bu le chim nyuŋ maŋ Ejipiti meena ate nirisa ale moari nuruba ale duŋsa tɛŋka meena po.>>

10Ba yaa nye kaalim daaniŋ a zaani Faaro niŋ. Moosis yaa yuk kaalimu a basi wen ate nirisa a moari nuruba ale duŋsa. 11Sampoporisaŋa an baga a zaani Moosis niŋŋa dii nyiŋla nirisaŋa a jam moari ba kama ale Ejipiti demma meena. 12Alege Naawen a basi ate Faaro suinummu pagra ate wa kan wom Moosis ale Aaron, ase Naawen ale weeni Moosis diila.

13Naawen yaa weeni Moosis ayen, <<Yiti saluik yokyokwa a ga tu chaab ale Faaro a weeni wa ayen, <Naawen, Yiburu demma Wenni ale weeni ayen basi ate m nuruma a cheŋ a ga puusi mu, 14dan kan daa di yɔgyɔgla de m le basi ate daanika a jam fi zuk ale fi nisɔmma ale fi nuruma, ate fi seba ayen waai a karo a nye ase mi la tɛŋka meena zuwa. 15Nna po dɛ m ti teeri ka nisa a nak fi nuruma ale nyiŋtuila ate ŋa nueri ni tɛŋka zuk. 16Alege mi zak ni a zaani kama kude nyiŋ, ayen m baga a sak ni m pagrimu ate m yuenni mɛ ba mooli ate di cheŋ tɛŋka meena. 17Alege ni diem a ta chaab ale m nuruma a kan te ti ba a cheŋ. 18Dila nyiŋ, chum nna po de m le basi ate viok ale ŋmoruk tana le bie la a jam. Viok kuui ale kan jam Ejipiti a nya la, a zaani tɛŋka piilimka a jam paari yɔgyɔgla de. 19Be te nɔi yɔgyɔgla de ate ba ta duŋsaŋa ale jaabuuri meena ate ni ta ŋa ni talimu po la a jam yeri po, dii nyiŋla ŋmoruk tanaŋa a za ŋa lo nuru meena ale duŋ sii meena ale diem bo laŋka po an jam jo yeri po la kama, ate si kpi.> >>

20Faaro nisɔm baai ale a chali Naawen wanni yɔgsum la, a nye nwuli a ta ba yɔmma ale ba duŋsaŋa a jam jo. 21Alege baai ale zɛri Naawen wanni la, a basi ba yɔmma ale ba duŋsaŋa laŋka po.

22Ate Naawen yaa weeni Moosis ayen, <<Zak fi nisa a tuk wen ate ŋmoruk tana a siŋ Ejipiti zuk ale nuruba ale duŋsa ale ŋan baai meena ale a chim Ejipiti laŋsaŋa po la. 23Moosis ale zak wa doani a tuk wen la, Naawen yaa basi ate nanpansa ale ŋmoruk tana ale nyaksika a siŋ tɛŋka. Naawen a basi ate ŋmoruk tana a siŋ Ejipiti tɛŋka zuk. 24Ŋmoruk tanaŋa ale nyaksika a siŋ ate ku a nyaksi niŋ ale ŋaaŋ. Kula ale va pagrik a bie Ejipiti tɛŋka meena po a nyini diipo ate ka chim tɛŋ la. 25Ejipiti tɛŋka meena ŋmoruk tanaŋa a fɔbi jaab meena laŋsaŋa po ka tɛŋ ale nuruba ale duŋsa meena. A fɔbi jaab meena ale a chim laŋsaŋa po ale ŋasi tiisaŋa meena. 26Kauk kuui nyiini ate ku an fɔbi la, ale Gosen tɛŋka juijui ate Izirali demma a boro la.

27Faaro yaa wi Moosis ale Aaron a weeni ba ayen, <<Yɔgyɔgla de mi tom kaasi kama. Naawen nye magsi kama, ka mi ale m nuruma ale kaasi. 28Puusi a te Naawen nanpansaŋa ale ŋmoruk tanaŋa ale siŋ ti zuk la a magsi kama. M le basi ate ni cheŋ. Ni kan ni ŋman boro.>>

29Moosis yaa tulisi ayen. <<M dan nyini tɛŋka po a nyini m le zak nisa a puusi a te Naawen. Nanpansaŋa ale basi, ŋmoruk tana a kan ŋman boro, ate fi seba ayen tɛŋka ka Naawen ale soa. 30Alege mi seba ayen fi ale fi nisɔmma an diem a chali Naawen, dii ale ka Wen la yɔgsummoa.>>

31Ŋankpaantaŋa ŋaai ale bɛ yaase ŋaai ale jam boro a biak la a jam kaasi kama, 32alege ŋankpaan tii ale wari ŋaaŋ la an jam a kaasi ya.

33Moosis yaa basi Faaro ale nyini tɛŋka po a nyini. Wa zak nisa tuk Naawen nyiŋ, ate nanpansa ale ŋmoruk tanaŋa a basi, ate ŋmoruk an ŋman chuiri tɛŋka zuwa. 34Faaro ale nya ale ŋmoruk tana ale nanpansaŋa a basi la, wa ŋman nye kaasi. Wa le wa nisɔmma a basi ate ba suiniimaŋa a pagra. 35Faaro suinummu yaa jam pagra ate wa kan te ate Izirali demma a cheŋ ase Naawen ale biisi va Moosis zuk diila.

Currently Selected:

Nyinika 9: BWU

Highlight

Copy