Nyinika 8

1Naawen yaa weeni Moosis ayen, <<Cheŋ Faaro jigi a ga weeni wa ayen, <Naawen ale weeni ayen, basi ate m nuruma a cheŋ a ga puusi mu. 2Fi dan zɛri an te ate ba cheŋ ya, m le namsi fi tɛŋka meena ale baŋuuna. 3Nile benni ale sueri ale baŋuuna. Ŋa le jueli a jam jo fi yenni po ale dɔk kuui ate fi a goa la ale fi gaduokku zuk ale fi nisɔmma yeeŋa po ale fi nuruma zuk ale fi borobottaŋa se ka jiŋŋa ale ba le a bilisi borobottaŋa ŋan baai zuk la. 4Baŋuunaŋa ale jueli fi ale fi nuruma ale fi nisɔmma zuk.> >>

5Ate Naawen yaa weeni Moosis ayen, <<Weeni Aaron ayen, <Teeri fi nisaŋa ale doani beli naŋsaŋa zuk ale nyiam vuutaŋa zuk ale beli gilimaŋa zuk a nye ate baŋuuna a jam Ejipiti tɛŋka zuk.> >>

6Aaron yaa teeri wa nisaŋa Ejipiti nyaataŋa zuk ate baŋuunaŋa a jueli a lik tɛŋka. 7Alege sampoporisaŋa mɛ a nye dila dek ale ba kperisaŋa. Ba mɛ nye ate baŋuuna a jueli jam Ejipiti tɛŋka.

8Faaro yaa wi Moosis ale Aaron a weeni ba ayen, <<Puusi a te Naawen ate wa yeeri baŋuunaŋa a ta cheŋ abe wa ge mi ale m nuruma ate m te ate ni nuruma a ga nye kaabka a te Naawen.

9Moosis yaa weeni Faaro ayen, <<Mi pai zula a te fi ayen fi dak diipo ale magsi ayen m puusi a te fi ale fi nisɔmma ale fi nuruma ate baŋuunaŋa basi nama ale ni yeeŋa, abe ŋa tali ŋaai ale bo Nile benni po la nyiini.>>

10Faaro yaa weeni ayen, <<Chum.>> Moosis yaa weeni ayen, <<Ku le nye ase ka fi le weeni diila ate fi miŋ ayen waai karo a nye ase Naawen ti Wenni la. 11Baŋuunaŋa ale basi fu ale ni yeeŋa ale fi nisɔmma ale fi nuruma. Ŋa le tali bo ka Nile benni po nyiini.>>

12Moosis ale Aaron ale basi Faaro la ŋaaŋnyiŋ, Moosis yaa kaari weeni Naawen baŋuunaŋa ate wa ta jam Faaro zuk la wari. 13Ate Naawen a nye dii ate Moosis a bek la. Baŋuunaŋa a kpi yeeŋa po ale dabaasaŋa po ale laŋsaŋa po. 14Ba yaa tigsi ŋa dueni nna berr, berr, ate tɛŋka a nyuŋ ale ŋa. 15Alege Faaro ale nya ayen wa vuusi ale baŋuunaŋa la, wa ŋman basi ate wa suinummu a pagra a kan wom Moosis ale Aaron ase Naawen ale poom liŋ a weeni la.

16Ate Naawen yaa weeni Moosis ayen, <<Weeni Aaron ayen, <Teeri doani a nak tɛŋka tantaŋa,> ate Ejipiti tɛŋka meena tantaŋa a chim bunbuma.>> 17Ba le nye nna ate Aaron a teeri wa nisaŋa ale doani a nak tɛŋka tantaŋa la, bunbuma a deri jam nuruba ale duŋsa nyiŋsa. Ejipiti tɛŋka tantaŋa meena a chim ka bunbuma. 18Alege sampoporisaŋa ale yen ba a nye bunbuma ale ba kperisaŋa la ba an baga nye ya. Ate bunbuma a bo nuruba ale duŋsa nyiŋsa.

19Sampoporisaŋa a weeni Faaro ayen, <<Ka Wen nisa ale nna.>> Alege Faaro suinummu a pagra wa kan wom ase Naawen ale poom liŋ a weeni la.

20Naawen yaa weeni Moosis ayen, <<Yiti saluik yokyokwa a tu Faaro diipo ate wa cheŋ nyiamu jigini la a weeni wa ayen, <Naawen ale weeni diila ale nna. Basi ate m nuruma a cheŋ a ga puusi mu. 21Fi dan kan basi ate m nuruma a cheŋ ya, m le basi ate nanjuŋsa a jam si beŋ fi jigi ale fi nisɔmma jigi ale fi nuruma jigi ale ni yeeŋa po. Nanjuŋsaŋa ale sueri Ejipiti demma yeeŋa ale ba le bo juijui la tɛŋka meena.

22<< <Alege da dila danni mi le nye Gosen tɛŋka ka ku tɔga juijui ate m nuruma a boro la. Nanjuŋsa a kan bo dula ate fi seba ayen mi Naawen a bo tɛŋka de. 23M le basi ate ku chim ku tɔga mi nuruma ale fi nuruma suŋsuŋ. Wakinkagni de ale nye chum.> >>

24Ate Naawen yaa nye nna. Nanjuŋsa si beŋ, si beŋ a jam jo Faaro yenni ale wa nisɔmma yeeŋa ale Ejipiti tɛŋka meena nanjuŋsaŋa a jam kaasi kama.

25Faaro yaa wi Moosis ale Aaron a weeni ayen, <<Ni cheŋ a ga nye kaabka a te ni Wenni tɛŋka po dela.>>

26Alege Moosis a weeni ayen, <<Kula kan magsi. Kaab kaai ate tama a nye a te Naawen ti Wenni Ejipiti demma a kan yaali. Ti be dan nye kaab kaai ate ba kan yaali la ba nina po, ba kan yuk ti ale tana? 27Ti le cheŋ suik daa ŋata a jo gɔnni po a nye kaabka a te Naawen ti Wenni ase wa le weeni ti diila.>>

28Faaro yaa weeni ayen, <<M le te ni cheŋ a ga nye kaabka a te Naawen ni Wenni gɔnni po, alege ni kan cheŋ niŋniŋŋa. Ni abe puusi a te mu yɔgyɔgla.>>

29Moosis yaa tulisi ayen, <<M dan ga basi fu, m le puusi a te Naawen, ate chum nanjuŋsaŋa a basi Faaro ale wa nisɔmma ale wa nuruma. Be seba ate fi kan paasi ti ate fi nye ate nuruma kan baga a ga nye kaabka a te Naawen.>>

30Ate Moosis yaa basi Faaro ale puusi a te Naawen, 31ate Naawen a nye Moosis ale bek diila. Ate nanjuŋsaŋa a basi Faaro ale wa nisɔmma ale wa nuruma, nanjuŋ yeŋ mɛ la an tali ya. 32Alege yɔgyɔgla de mɛ Faaro a basi ate wa suinummu a pagra ate wa kan te nuruma a cheŋ.

Currently Selected:

Nyinika 8: BWU

Highlight

Copy