Nyinika 10

1Naawen yaa weeni Moosis ayen, <<Cheŋ Faaro jigi ale mi basi ate wa ale wa nisɔmma suiniima a pagra kama ate m baga a tom m wakinkaglaŋa ba suŋsuŋ. 2Ate ni weeni ni bisaŋa ale ni ŋaaŋbisaŋa mi ale nye dii tuotuok ale Ejipiti demma la, ale mi ale tom wakinkagla dii ba suŋsuŋ la, ate ni seba ayen Mi ale Naawen.>>

3Moosis ale Aaron yaa cheŋ Faaro jigi a weeni wa ayen, <<Naawen, Yiburu demma Wenni a weeni ayen, <Fi tin kan siak fi zaab fidek mi niŋ a paari ka dimpo? Basi ate m nuruma a cheŋ a ga puusi mu. 4Fi dan zɛri an te ba cheŋ ya, m le ta tintue a jam fi tɛŋka po chum. 5Ŋa le lik tɛŋka meena ate waai a kan nya tɛŋka. Ŋa le dɛ ŋan baai magadek kaai ale tali ŋmoruk tanaŋa ŋaaŋ nyiŋla, a maa dɛ tiib meena ale diem a chim laŋsaŋa po la. 6Ŋa le sueri ni yeeŋa ale ni nisɔmma yeeŋa ale Ejipiti demma meena yeeŋa. Wa dii ate ni koma yaase ni kokpieŋsaŋa an maa nya a zaani diipo ate ba piilim kali tɛŋka de la a jam paari yɔgyɔgla de la.> >> Ate Moosis a cheem cheŋ ale basi Faaro.

7Faaro nisɔmma yaa weeni Faaro ayen, <<Nuruwa de ale chim baruk a te tama a paari ka dimpo? Basi ate nuruma a ga puusi Naawen, ba Wenni. Fi an diem miŋ ayen Ejipiti tɛŋka a kaasi ya?>>

8Ate ba ta Moosis ale Aaron a jam Faaro jigi. Faaro yaa weeni ayen, <<Ni ga puusi Naawen, ni Wenni, alege ka bana ate fi ale ta ba cheŋ?>>

9Moosis yaa tulisi ayen, <<Ti le cheŋ ale bimbaan paaluk ale ŋankpagsa ale nidoabilisa ale lieba ale piisa ale duŋsa, dii nyiŋla ti a yaali ayen ti nye ka tigi a te Naawen.>>

10Faaro a weeni ayen, <<Naawen a bo ale ni. M dan te ni cheŋ ale ni nipooma ale ni bisaŋa, ku kan nna jassi ayen ni ta ka biem popola. 11Aaya, ni te nidoama nyiini a cheŋ a ga puusi Naawen, ni poom kasim a bek ka dila.>> Ba yaa yiak Moosis ale Aaron ate ba nyini Faaro jigi a nyini.

12Ate Naawen a weeni Moosis ayen, <<Zak nisa Ejipiti zuk ate tintue a jam lik tɛŋka a dɛ jaab meena ale a chim laŋsaŋa po la, jaab meena ale tali ŋmoruk tanaŋa ŋaaŋ nyiŋla.>>

13Moosis yaa zak wa doani Ejipiti zuk, ate Naawen a basi ate kori viok a fuk tɛŋka meena dai dila danni ale yok kula meena. Ate ku le ga paari saluik la ate vioku a ta tintueŋa a jam. 14Ŋa tuesi Ejipiti tɛŋka meena a yaa bo jigi meena tɛŋka po nna yegayega. Tintue daani kala an maa jam tɛŋka po a nya ya, ŋa be kan maa jam dila ŋmana. 15Ŋa lik tɛŋka meena ate tɛŋka sob nna timtim. Ŋa jam dɛ ka jaab meena ale tali ŋmoruk tanaŋa ŋaaŋ nyiŋla. Jaab meena ale a chim laŋsaŋa po la ale yɔnaŋa ale bo tiisaŋa zuk la. Viok mɛ la an tali tiib zuk yaase jaab zuwa Ejipiti tɛŋka po.

16Faaro yaa nye nwuli a wi Moosis ale Aaron a weeni ba ayen, <<Mi tom kaasi Naawen, ni Wenni ale nama kama. 17Yɔgyɔgla ni ŋman vɔŋ m kaasuŋku a te mu abe ni puusi a te Naawen, ni Wenni ate wa yeeri daani bioku de m jigi.>>

18Moosis yaa basi Faaro ale ga puusi a te Naawen. 19Ate Naawen a tagri vioku ate ku chim yeniŋ va pagrik, ate ku fuk a ji tintueŋa a ta ga basi Nyakpiem Mɔnuŋku po. Tintuiri mɛ la an tali Ejipiti tɛŋka po. 20Alege Naawen a basi ate Faaro suinummu a pagra, ate wa kan basi ate Izirali demma a cheŋ.

21Ate Naawen a weeni Moosis ayen, <<Zak fi nisaŋa a tuk wen ate legi a jam lik Ejipiti tɛŋka. Legi dii ale di jo nuruma nyiŋ.>> 22Moosis yaa zak nisa a tuk wen ate legi nna kpitɔ a lik Ejipiti a paari daa ŋata. 23Nuru waai an jam nya wa choa yaase wa basi wa jigi a paari daa ŋata. Alege Izirali demma ale bo juijui meena la ku a nya.

24Faaro yaa wi Moosis a weeni wa ayen, <<Ni cheŋ a ga puusi Naawen. Ni nipooma ale ni bisaŋa a baga a cheŋ ale ni kama. Ka ni tin basi ni piisaŋa ale ni duŋsaŋa ŋaaŋ.>>

25Alege Moosis a weeni wa ayen, <<Ku a fɛ ate fi basi ate ti ta ti duŋsaŋa ale juka tiiritaŋa ate ti pai te Naawen, ti Wenni. 26Ku a fɛ ate ti duŋsaŋa a cheŋ ale ti. Ti kan basi naŋsabi mɛ la ŋaaŋŋa. Ti le pai ba gela a nye puusa a te Naawen ti Wenni. Ti be dan kan paari dula ti kan seba ti le ti pai jabuui a nye puusa a te Naawen.>>

27Alege Naawen a basi ate Faaro suinummu a pagra, ate wa kan yaali ayen ba cheŋ. 28Faaro yaa weeni Moosis ayen, <<Cheŋ du mi niŋ. Seba ate fi kan ŋman jam mi niŋŋa. Dai dii dai ate fi a nya mi nina la fi le kpi.>>

29Moosis yaa tulisi ayen, <<Ase fi le weeni diila, m kan ŋman jam fi niŋ diipo diipo.

Currently Selected:

Nyinika 10: BWU

Highlight

Copy