Nyinika 7

1Ate Naawen a weeni Moosis ayen, <<Nya m nye fu ase ka Wen la a te Faaro, abe fi suoku Aaron a chim fi biisiteerɔ. 2Se fi weeni dii meena ate mi a weeni fu la, abe fi suoku Aaron a weeni Faaro ayen wa basi ate Izirali demma a nyini wa tɛŋka po. 3Alege m le basi ate Faaro suinummu a pagra, m le poom basi ate m wakinkaglaŋa ale wakperikaliisaŋa a piisi Ejipiti po, 4alege wa kan wom fu. Ate m le pai m nisa a vi Ejipiti zuk a tom tuim kpiema ale buusa m le ta m nuruma Izirali demma ba beŋ, ba beŋ a nyini. 5M dan teeri nisa a ta chaab ale Ejipiti demma a ta Izirali demma a nyini, Ejipiti demma ale seba ayen mi ka Naawen.>> 6Moosis ale Aaron yaa nye dii dek ate Naawen a weeni ba la. 7Moosis a jam ka bena pinaanuŋ alege Aaron a ta bena pinaanuŋ ale ŋata diipo ate ba biisi ale Faaro la.

8Naawen yaa weeni Moosis ale Aaron ayen, 9<<Faaro a dan weeni ni ayen, <Nye wakinkagli,> be weeni Aaron ayen, <Pai doani a lɔnsi tɛŋ Faaro niŋ,> ate di chim waab.>>

10Moosis ale Aaron yaa cheŋ Faaro jigi a nye dii dek ate Naawen a weeni la. Aaron yaa yuk doani a lɔnsi Faaro ale wa nisɔmma niŋ, ate di chim waab. 11Faaro yaa wi yam nyam ale sampoporisa, ate Ejipiti sampoporisaŋa mɛ a nye dila dek ale ba kperisaŋa. 12Ba wanyi meena a yuk wa doari a lɔnsi tɛŋ ate di chim waab. Alege Aaron doani a nɛ ba doaŋa. 13Ku meena ŋaaŋnyiŋ Faaro suinummu a pagra kama ate wa kan wom ba ase Naawen ale poom weeni diila.

14Ate Naawen yaa weeni Moosis ayen, <<Faaro a kan siak a nyini wa suinum po. Wa zɛri kama ayen nuruma kan cheŋ. 15Cheŋ Faaro jigi saluik diipo ate wa nyini a cheŋ benni la. Limisi Nile benni nɔi ate fi tu wa. Pai fi doa dii ale tagri a chim waamu la a nyo fi nisa po. 16Weeni wa ayen, <Naawen dii ale ka Yiburu demma Wen la, ale tom mu ayen m weeni fu ayen, basi ate m nuruma a cheŋ a ga puusi mu gɔnni po. Alege fi kan wom a jam paari yɔgyɔgla de. 17Dii ate Naawen a weeni la ale nna. Kude ale basi ate fi seba ayen Mi ale Naawen. Doani ale bo m nisaŋa po la m le pai nak Nile benni nyiamu, ate bu tagri a chim ziim. 18Jumaŋa ale bo Nile benni po la ale kpi, ate benni a nyuŋ, ate Ejipiti demma a kan baga a nyu di nyiamu.> >>

19Naawen a weeni Moosis ayen, <<Weeni Aaron ayen, <Pai fi doani a teeri fi nisaŋa Ejipiti nyaataŋa zuk ale beli naŋsaŋa zuk ale nyiam vuutaŋa zuk ale beli gilimaŋa zuk ale ŋan baai meena ate ba pai nyiam a nyo du la,> ate ba tagri chim ziim. Ziim ale bo jigi meena Ejipiti tɛŋka po. Bu le maa bo daata bogtiba ale tintain liisa po.

20Moosis ale Aaron yaa nye dii dek ate Naawen a weeni la. Wa zak wa doani ka Faaro ale wa nisɔmma niŋ a nak Nile benni nyiamu, ate nyiamu meena a tagri a chim ziim. 21Jumaŋa ale bo Nile benni po la a kpi, ate benni a nyuŋ nna biokbiokwa ate Ejipiti demma an baga a nyu di nyiamu. Ziim ale jam bo jigi meena Ejipiti tɛŋka po.

22Alege Ejipiti sampoporisaŋa mɛ a nye dila dek ale ba kperisaŋa, ate Faaro suinummu a ŋmasi pagra. Wa kan wom Moosis ale Aaron ase Naawen ale poom ŋaam weeni diila. 23Wa goanti cheem kama a cheŋ jo wa yenni po ale an poom pai nyo wa suinum po. 24Ate Ejipiti demma meena a tu bulisa Nile benni nɔi ayen ba nyu nyiam, dii nyiŋla ba an jam baga a nyu benni nyiamu.

25Daa ŋayopɔi ale jam taam ate Naawen a nak Nile benni nyiamu.

Currently Selected:

Nyinika 7: BWU

Highlight

Copy