Nyinika 6

1Naawen yaa weeni Moosis ayen, <<Yɔgyɔgla de fi le nya mi le za m nye Faaro diila. Mi ni kpieŋsaŋa nyiŋ wa le basi ate ba cheŋ. Mi ni kpieŋsaŋa nyiŋ wa le yiak ba ate ba nyini wa tɛŋka po.>>

2Wen a weeni Moosis ayen, <<Mi ale Naawen. 3Mi pai m dek a sak Abrayam ale Aizik ale Jekob kama ase Wen Dii Ale A Niak La, alege m yuenni Naawen mi an pai m dek a sak ba. 4M nye nɔiyeŋ ale ba mɛ ayen m te ba Keenan tɛŋka, juijui ate ba jam boro ase nicham la. 5Alege m be wom Izirali demma kumsaŋa kama, baai ate Ejipiti demma a tom yɔntidi la, m be teeri m nɔiyeŋka kama.

6<<Dila be weeni Izirali demma ayen, <Mi ale Naawen, m be le ta ni nyini Ejipiti demma namsika po a nyini. M le vari ni basi ate ni kan chim ba yɔm. M le teeri nisa a da tuesi ni basi abe m bo ba buusa ŋaai ale pagra la. 7M le pai ni ase m dek nuruba la, abe m chim ni Wen. Ate ni seba ayen Mi ale Naawen ni Wenni, waai ale ta ni nyini Ejipiti demma namsika po a nyini. 8M le ta ni jam tɛŋ kaai ate mi zak nisa a pɛ ayen m le pai te Abrayam ale Aizik ale Jekob la. M le pai te ni ate ni soa. Mi ale Naawen.> >>

9Moosis yaa weeni nna a sak Izirali demma, alege ba an wom wa ba le jɔk nyiŋbiiri ale ŋman bo ninammu po la nyiŋ.

10Naawen yaa weeni Moosis ayen, 11<<Cheŋ ga weeni Faaro Ejipiti naawa ayen wa basi ate Izirali demma a nyini wa tɛŋka po a nyini.>>

12Alege Moosis yaa weeni Naawen ayen, <<Izirali demma dan kaa wom mi, Faaro ale nye ka sɛ a wom mi, mi daa waai ale baga a biisi nalimnyiini la?>>

13Yɔgyɔgla de Naawen yaa biisi te Moosis ale Aaron a weeni ba Izirali demma ale Faaro Ejipiti naawa wie, ate wa yaa te suik ayen wa ta Izirali demma nyini Ejipiti tɛŋka po.

14Ba dɔkdemma ale ba koma jam ale nna. Izirali bikpagni Aruben nidoabilisaŋa jam le Yanok ale Pallu ale Ayeziron ale Karmi. Aruben diinaŋa jam le la.

15Simeyon nidoabilisaŋa jam le Jemuel ale Jamin ale Oyad ale Jakin ale Zoyar ale Sɛyaul Keenan nipowa biika. Simeyon diinaŋa jam le la.

16Livai nidoabilisaŋa yueŋa ale nna a va chaab ale ba ale ŋmarisi dii dueni a va ba nyiŋla. Gerson ale Koyat ale Merari. Livai a jam ka bena kook ale pisita ale ŋayopɔi.

17Gerson nidoabilisaŋa a va chaab ale ba diinaŋa jam le Libni ale Simei.

18Koyat nidoabilisaŋa jam le Amram ale Izyar ale Yebron ale Uzziel. Koyat jam goa ka bena kook ale pisita ale ŋata.

19Merari nidoabilisaŋa jam le Mayali ale Musi. Livai diinaŋa jam le nna a va chaab ale dii ale ŋmarisi dua la.

20Amram jam faari ka wa kowa tua Jochebed ate wa biak Aaron ale Moosis a te wa. Amram jam goa ka bena kook ale pisita ale ŋayopɔi.

21Izyar nidoabilisaŋa jam ka Koora ale Nefeg ale Zikri.

22Uzziel nidoabilisaŋa jam ka Misael ale Elzafan ale Sitri.

23Aaron jam faari ka Eliseba Amminadab lie. Wa jam ka Nayson tua. Wa jam biak ka Nadab ale Abiyu ale Eleaza ale Itamar a te wa.

24Koora nidoabilisaŋa jam ka Assir ale Elkana ale Abiasap. Koora diinaŋa jam le nna.

25Aaron nidoabinni Eleaza a jam faari ka Putiel liema wanyi ate wa biak Fineyas a te wa. Livai buuni dɔk dɔk koma jam le nna.

26Ku jam ka Aaron ale Moosis ate Naawen a jam weeni ba ayen, <<Ta Izirali demma ba beŋ, ba beŋ a nyini Ejipiti a nyini. 27Ka bala ale jam biisi ale Faaro, Ejipiti naawa a magsi chaab ale Izirali demma ta nyinika wari la. Ku jam ka Moosis ale Aaron.

28Yɔgyɔgla de Naawen ale jam biisi ale Moosis Ejipiti la, 29Wa jam weeni wa kama ayen, <<Mi ale Naawen. Weeni Faaro Ejipiti naawa dii meena ate mi a weeni fu la.

30Alege Moosis a weeni Naawen ayen, <<Mi daa waai ale baga a biisi nalimnyiini la, Faaro ale nye ka sɛ a wom mi?>>

Currently Selected:

Nyinika 6: BWU

Highlight

Copy