Nyinika 5

1Dila ŋaaŋnyiŋ Moosis ale Aaron yaa cheŋ Faaro jigi a weeni wa ayen, <<Naawen, waai ale ka Izirali Wen la a weeni kama ayen, <Basi ate m nuruma a cheŋ a ga nye tigi a te mu gɔnni po.> >>

2Faaro yaa weeni ayen, <<Ka wana ale Naawen ate mi ale ta tuewomma a te wa a basi ate Izirali demma a cheŋ? Mi zɛ Naawen ate m le basi ate Izirali demma a cheŋ.>>

3Ate ba yaa weeni ayen, <<Yiburu demma Wenni a tu ti kama. Yɔgyɔgla de basi ate ti cheŋ suik daa ŋata gɔnni po a nye kaabka a te Naawen ti Wenni, dan kan daa di wa le te nyiŋtuila yik ti yaase wa ko ti ale gebik.

4Alege Ejipiti naawa a weeni ayen, <<Moosis ale Aaron ka boa ale soa ate fi ta nuruma a cheŋ ale a ge ba tuimaŋa? Ni ŋman cheŋ ni tuimaŋa jigi.>> 5Faaro yaa weeni ayen, <<Nya, tɛŋka nuruma yaa piisi kama, ate fi a kasi ba tomka.>>

6Da dila danni Faaro yaa weeni baai ale a fɛ yɔmma ate ba a tom la, ale kpaŋŋa ale a nya nuruma zuk la ayen. 7<<Ni kan ŋman te nuruma wukosa a magsi peela nakka, ni basi ate ba ga yaali badek wukosa. 8Alege ni basi ate ba nak peelaŋa a soa se ba le liŋ a nak diila, ni kan yeeri ŋa nɔi basi. Ba ka nyiŋwotta nyam, dila ale soa ate ba a kaari ayen, <Basi ate ti ga nye kaabka a te ti Wenni la.> 9Ni basi ate tuimaŋa a pagra a te nuruma a gaam ku le poom ka diila ate ba kasim a tom abe ni kaa wom venta.>>

10Baai ale a fɛ yɔmma ate ba a tom la ale kpaŋŋa yaa cheŋ ga weeni nuruma ayen, <<Faaro ale weeni diila ale nna. <M kan ŋmaa te wukosa. 11Ni cheŋ ga yaali nidek wukosa juijui meena ate ni a nya la, alege ni tuimaŋa kan yeeri a basi.> >> 12Nuruma yaa waaŋ Ejipiti tɛŋka meena ayen ba tigsi wukosa. 13Baai ale a fɛ yɔmma la a kasim a fɛ ba a weeni ayen, <<Ni nueri tuim ŋaai ate ba a yaali ayen ni tom dai yeŋ la a magsi diipo ate ni jam ta wukosa la. 14Faaro nuru baai ale a fɛ yɔmma la ale lueri Izirali kpaga ŋaai la, ba kasim a nak ba kama ale a bek ba ayen, <<Ka boa ale soa ate ni an nak peela jinla ale deemwa a soa ase ni nyiem ale a nak diila?>>

15Ate Izirali kpaŋŋa yaa cheŋ ga bek Faaro ayen, <<Ka boa ale soa ate fi a nye fi tomteerɔma nna? 16Ba an te fi tomteerɔma wukosa, alege a weeni ti ayen, <Ni nak peela> Ate ba a nak fi tomteerɔma, alege ka fidek nuruma ale nye kaasi.>>

17Faaro yaa weeni ayen, <<Nyiŋwotta nyam, ni le ka diila ale la, nyiŋwotta nyam. Dila ale soa ate ni kasim a weeni ayen, basi ate ti cheŋ a ga nye kaabka a te Naawen la.> 18Yɔgyɔgla de ni cheŋ tuima. Ba kan te ni wukosa, alege se ni nak peelaŋa a paari ŋa nɔnni.>>

19Izirali kpaŋŋa yaa nya ayen ba bo ka daanika po wa le weeni ba ayen, <<Ni le magsi ni nak peela dai yeŋ meena diila, ni an magsi ayen ni yeeri ku po kauk a basi.>> 20Ba le basi Faaro la ba yaa nya Moosis ale Aaron a limisi ayen ba tu ba. 21Ba yaa weeni Moosis ale Aaron ayen, <<Naawen abe nya abe wa bo ni buusa. Ni basi kama ate ti a nyuŋ Faaro ale wa kpaŋŋa nyue po ale pai gebika nyo ba nisa po ayen ba ko ti.>>

22Moosis yaa ŋman cheŋ Naawen jigi ayen, <<M Nyɔnɔ, ka boa ate fi ta daanika a jam nuruma de zuwa? Ka dii nyiŋ ate fi tom mi la ale la? 23Mi ni din cheŋ Faaro jigi ayen m biisi fi yuenni nyiŋla, wa ta ka daanika a jam nuruma zuk, ate fi an bola vari fi nuruma a basi ya.>>

Currently Selected:

Nyinika 5: BWU

Highlight

Copy