Nyinika 4

1Moosis yaa tulisi ayen, <<Alege ba nin kan ta siaka ale mu yaase ba nin kan wom mi, ale weeni ayen, <Naawen an pai wadek a sak fu?> >>

2Naawen yaa weeni ayen, <<Ka boan ni la a bo fi nisaŋa po?>> Wa yaa tulisi wa ayen, <<Ka doari.>>

3Naawen yaa weeni ayen, <<Pai lɔnsi tɛŋ.>> Moosis yaa pai lɔnsi tɛŋ ate di chim waab, ate wa chali ale ge bu. 4Naawen yaa weeni wa ayen, <<Laari fi nisaŋa a yik bu juiku a pai.>> Moosis yaa laari a pai waamu ate bu tagri a chim doari wa nisaŋa po. 5Naawen yaa weeni ayen, <<Kude ate ba le ta siaka ayen Naawen, ba koma Wenni, wa waai ale Abrayam ale Aizik ale Jekob Wen la ale pai wadek a sak fu.>>

6Naawen yaa ŋman weeni ayen, <<Pai fi nisaŋa a su fi garukku po>> Moosis yaa pai wa nisaŋa a su wa garukku po. Wa le yeeri si la, si deri peenti nna tektek a chim gami.

7Wa ŋman weeni wa ayen, <<Yɔgyɔgla de ŋman pai su garukku po. Dila Moosis yaa pai wa nisaŋa su wa garukku po. Wa le yeeri si la si ŋman nye si denni, ase wa nyiŋka kab tintila ale ka diila.

8Naawen yaa weeni ayen, <<Ba dan kan ta siaka ale fu yaase ba popola a ka wakinkagli dii ale dɛ niŋka la jigiya, ba le ta siaka ale dii ale pa a saŋ la. 9Alege ba dan kan ta siaka ale wakinkagla ŋayewa yaase ba an wom fu, nye Nile benni nyiamu a kpiiri basi tɛŋ kosikka zuk. Nyiamu ate fi nye benni po la ale chim ziim tɛŋka zuk.>>

10Moosis yaa weeni Naawen ayen, <<M Nyɔnɔ, mi an maa baga a kpabi a biisi, a nyini ku le nyini ya, yaase diipo ate fi a biisi ale fi yɔmawa la. Mi an baga a kpabi a biisi, m giŋgeluŋku mɛ a dobra kama.>>

11Naawen yaa weeni ayen, <<Ka wana ale te nuru wa giŋgeluŋŋoa? Ka wana ale basi ate wa chim gauŋŋoa? Ka wana ale basi ate wa a nya ale basi ate wa a yi? Daa mi, Naawen ya? 12Yɔgyɔgla de cheŋ, M le maari fu ate fi biisi abe m sak fu dii ate fi le weeni la.>>

13Alege Moosis weeni ayen, <<M Nyɔnɔ, mi a saalim tom nuru yoŋ ate wa ga nye dila.>>

14Naawen sui yaa dɛ nna pɔkpɔk ale Moosis ate wa yaa weeni wa ayen, <<Alege fi suoku Aaron Livaiwa? Mi seba wa a biisi kama nalimnyiini. Wa poom deri bo ka suik a cheena ayen wa tu fu, wa sui ale peenti ase wa nin nya fu. 15Fi ale biisi a te wa abe fi a pai wie a nyo wa nɔi po, m le maari ni nɔi niyewa ate ni biisi abe m sak ni ni le ni nye diila. 16Wa le biisi a te nuruma a te fu ate ku nye ase ka fi ale a biisi la, ate ku a nye ase fi ka Wen a te wa la. 17Alege pai doani de a ta fi nisa po ate fi a tom wakinkagla ale di.>>

18Moosis yaa ŋman cheŋ Jetro wa ŋachobwa jigi a weeni wa ayen, <<Basi ate m ŋmani a cheŋ m dek nuruma jigi Ejipiti a ga nya ase ba waai a diem vua ya>>.

19Yɔgyɔgla de Naawen a poom weeni Moosis Midian tɛŋka po kama ayen, <<Ŋman cheŋ Ejipiti ale nuru baai meena ale a yaali ayen ba ko fu la a kpi kama.>> 20Moosis yaa pai wa powa ale wa nidoabilisaŋa a kali boniŋ zuk a piilim Ejipiti chelim. Wa jam pai Wen doani a ta ka wa nisa po.

21Naawen a weeni Moosis ayen, <<Fi dan ŋmani Ejipiti, nya ti fi tom Faaro niŋ wakinkagla ŋaai meena ate m te fu pagrim ayen fi tom la. Alege m le basi ate wa suinummu a pagra ate wa kan basi ate nuruma a cheŋ. 22Fi yaa weeni Faaro ayen, <Naawen ale weeni diila ale nna. Izirali ka nidoabi dii ate mi liŋ biak, 23ate mi weeni fu, <<Basi ate m nidoabinni a cheŋ, ate wa baga a ga puusi mu>> Alege fi zɛri kama an te ate wa cheŋ ya, dila nyiŋ m be le ko fi nidoabi dii ate fi liŋ biak la.> >>

24Naawen yaa tu Moosis goom jigi suiku po ate wa jam boro a yaali ayen wa ko wa. 25Alege Zippora yaa pai gebi fiik a gebi wa biika yoanni gbauŋku a pai tiri Moosis naŋsaŋa. Wa yaa weeni ayen, <<Wensie fi ka ziim nipok fiak chora a te mi>>. 26Naawen yaa basi wa. Dila po wa weeni ayen, <<Ziim nipok fiak chora, a sak ka yoari gebika.

27Naawen yaa weeni Aaron ayen, <<Cheŋ jo gɔnni po a tu Moosis.>> Wa yaa tu Moosis Wen guuku jigini a gbaari wa. 28Moosis yaa weeni Aaron dii meena ate Naawen a tom wa ayen wa weeni la, ale wakinkaglaŋa ate wa weeni wa ayen wa nye la.

29Moosis ale Aaron yaa ta Izirali niŋdeerɔma meena a jam jigi yeŋ, 30ate Aaron a weeni ba dii meena ate Naawen a weeni Moosis la. Wa jam tom wakinkaglaŋa mɛ nuruma niŋ, 31ate ba ta siaka. Ba be le wom ayen Naawen niŋ bo ale ba ale nya ba niniŋŋa la, ba yaa koori tɛŋ a puusi wa.

Currently Selected:

Nyinika 4: BWU

Highlight

Compare

Copy