Nyinika 3

1Yɔgyɔgla de Moosis jam a nya ka wa ŋachobwa Midian kaabteerɔwa Jetro piisa zuk. Wa yaa ta piisaŋa a cheŋ niŋniŋ gɔnni po a ga paari Yoreb Wen guuku. 2Dula jigini Naawen maarɔwa a yaa pai wadek a sak wa bolim ŋiak ale jam a dɛ tiib fiik po. Moosis yaa nya ayen bolim a bo tiib fiika po alege bu kan dɛ tiimu. 3Moosis yaa poli ayen, <<Mi ale ga nya wa chaŋka dɛ, jabuui ale soa ate tiimu a kan dɛ la.>>

4Naawen ale nya ayen wa cheŋ wa nya la, Wen yaa wi wa tiimu po ayen, <<Moosis! Moosis! Ate Moosis yaa siak ayen, <<Nya mi ale nna.>>

5Wen yaa weeni ayen, <<Kan cheŋ a moata, yeeri fi nuesaŋa, dii nyiŋla, fi ale za juijui la, ka tuilum tɛŋ.>> 6Wa yaa weeni ayen, <<Mi ka fi kowa Wenni, Abrayam Wenni ale Aizik Wenni ale Jekob Wenni. Moosis ale wom nna la, wa yaa suk wa nimbidiaka dii nyiŋla wa jam a chali ka yɔgsum ale wa le nya Wen la.

7Naawen yaa weeni ayen, <<M sum nya m nuruma niniga Ejipiti tɛŋka po kama. M wom ba le kasim a kaari yɔmma kpaŋŋa ale a nye diila kama. M niŋ be bo ba ninammu po kama. 8Dila la m siŋ kama ayen m vari ba Ejipiti demma nisima po a basi abe m ta ba jam tɛŋ kaai ale nala ale lagri ale tɛŋ kaai ate biisim ale siita a boro la. Keenan demma, ale Yit demma, ale Amori demma, ale Perizzi demma, ale Yivi demma, ale Jebus demma boka jigi ale la. 9Yɔgyɔgla de Izirali demma kumsaŋa a paari mu kama. M be nya Ejipiti demma ale a namsi ba diila kama. 10Dila nyiŋ yɔgyɔgla de, cheŋ. Mi a tom fu ka Faaro jigi ayen fi ta m nuruma Izirali demma a nyini Ejipiti a nyini.

11Alege Moosis a weeni Wen ayen, <<Mi ka wana, a cheŋ Faaro jigi a ta Izirali demma a nyini Ejipiti a nyini?>>

12Wen yaa weeni ayen, <<M le bo ale fu. Dii ale di sak ayen mi ale a tom fu la ale nna. Fi dan ta nuruma a nyini Ejipiti tɛŋka a nyini, ni le puusi Wen guuku de zuk>>.

13Moosis yaa weeni Wen ayen, <<Ase m nin cheŋ Izirali demma jigi a weeni ba ayen, <Ni koma Wenni ale tom mi ni jigi>, ate ba bek mu ayen, Wa yuei ale boa? M weeni ba ayen boa?>>

14Wen yaa weeni Moosis ayen, <<Mi ka Waai Ale Ka Mi la. Fi le fi weeni Izirali demma diila ale nna: <Ka M Dekka ale tom fu ni jigi.> >>

15Wen a ŋman weeni Moosis ayen, <<Weeni Izirali demma ayen, Naawen, ni koma Wenni, Abrayam Wenni ale Aizik Wenni ale Jekob Wenni ale tom mi ni jigi. Mi yuenni ale taam wuu, yuei dii ate ba ale teeri m wari a zaani gaŋ kinka a ga paari gaŋ ka choa.

16<<Cheŋ a ga tigsi Izirali niŋdeerɔma a weeni ba ayen, <Naawen, ni koma Wenni, wa waai ale ka Abrayam ale Aizik ale Jekob Wenni la pai wadek a sak mi a weeni ayen, mi nya ni kama a nya dii ate ba nye ni Ejipiti la. 17Mi be puulim kama ayen m ta ni nyini ni niniŋŋa po Ejipiti po a nyini cheŋ Keenan ale Yit ale Amori ale Perizzi ale Yivi ale Jebus demma tɛŋka ale tɛŋ kaai ate biisim ale siita a bo ka po la.>

18<<Izirali niŋdeerɔma ale wom fu. Ate fi ale niŋdeerɔma yaa cheŋ Ejipiti naawa jigi a ga weeni wa ayen, <Naawen, Yiburu demma Wenni ale tu ti. Te ti cheŋ suik da ŋata gɔnni po a nye kaabka a te Naawen ti Wenni>. 19Alege mi seba ayen Ejipiti naawa a kan te ni cheŋ se ka ni kpieŋsa a nin fɛ wa. 20Dila nyiŋ m le teeri m nisaŋa a nak Ejipiti demma ale wakinkagla ŋaai ate mi ale tom ba suŋsuŋ la. Kula ŋaaŋnyiŋ wa le te ate ni cheŋ.

21<<Mi le basi ate Ejipiti demma a lak badek a te ni ale jiirim ate ni daa basi tɛŋka abe ni kan cheŋ ale ni koruta. 22Nipok meena a bek wa le moata waai ale nipok waai ale bo wa yeri po a tuesi kpana ŋanta ale ligmɔniŋ ŋanta ale gatta ate ni pai a jo ni nidoabilisaŋa ale ni liema. Dila la ni le tuesi Ejipiti demma ŋanta ale fifiok.>>

Currently Selected:

Nyinika 3: BWU

Highlight

Compare

Copy