Nyinika 38

1Wa jam pai ka siik daata a nye juka kuŋkuŋ ate ku juelika magsika a chim anamagib buyuebi, ku jam ka kuŋkuŋ ŋmɔgluk ate ku woglimmu magsika a chim anamagib pi, ate ku labsimu magsika mɛ a chim anamagib pi. 2Wa jam nyeka nyiila a basi gugotta tinaansiwa meena po, ate nyiilaŋa ale kuŋkuŋku a chim bunyi, wa jam pai ka kutuk mɔnuŋ a taari kuŋkuŋku. 3Wa jam pai ka kutuk mɔnuŋ a nye ku ŋantaŋa de, ku samɔnsaŋa ale saabulutaŋa ale chin ŋaai ate wa ta a misi la ale duisuk nyinaŋa ate ba ta a yeeri lam la ale bolim chinaŋa. 4Wa jam pai ka kutuk mɔnuŋ a nye jaab ase ŋoari a magsi kuŋkuŋku, kutuk mɔnuŋ ŋanta ale jam bo yeliŋka tɛŋ, kuŋkuŋku suŋsuŋsa po. 5Wa jam nyeka baŋsa ate si yik daataŋa ale bo gugotta tinaansiwa po juijui ate kutuk mɔnuŋ voanaŋa a boro la. 6Wa jam nye ka siik dawoŋta yaa pai kutuk mɔnuŋ a taari ti. 7Wa jam pai dawoŋtaŋa a su ka baŋsaŋa po ate si bo kuŋkuŋku gana a magsi yik jika. Wa jam pai ka tapaga a nye ku ate ku lak.

8Nipok baai ale jam bo Tuka Viuku nansuiŋku nɔi a tom la, nyaasuŋta ate ba jam pai nye ku kutuk mɔnuŋ chin kpienni ale ku kutuk mɔnuŋ jazaanimu.

9Ate wa jam nye dabiaka ale ka garuk palaŋa. Yeseoku geŋka woglimmu magsika a jam ka anamagib kobsiye ale gattiak peelik kaai diak ale pagra 10ale zaŋŋa pisiye ale kutuk mɔnuŋ gola pisiye ale kpana ŋanyiŋta a su yik zaŋŋa nyiŋ. 11Wiilukku geŋsaŋa wa jam nye ka garuk pala ate woglimmu magsika a chim anamagib kobsiye ale ta zaŋŋa pisiye ale kutuk mɔnuŋ gola pisiye ale kpana ŋanyiŋta.

12Yeniŋka geŋsa wa jam nye ka garuk pala ate labsimu magsika a chim anamagib kook, a ta garuk pala ale zaŋŋa pi ale kutuk mɔnuŋ gola pi ale kpana ŋanyiŋta a su yik zaŋŋa nyiŋ. 13Kori geŋka wa jam nye dabiaka labsimu magsika ate ku chim ka anamagib kook. 14Garuk palaŋa magsika woglimmu jam ka anamagib pisita a bo nansuiŋku kauk yeŋ ale zaŋŋa ŋata ale kutuk mɔnuŋ gola ŋata 15ate garuk pala magsika woglimmu ale paari anamagib pisita la mɛ a jam bo kauk kunkula ale a jo dabiaka la po ale zaŋŋa ŋata ale kutuk mɔnuŋ gola ŋata. 16Garuk palaŋa meena ale jam gilim dabiaka la diak a jam pagra kama. 17Golaŋa ale zaŋŋa jam ka kutuk mɔnuŋ. Ŋanyiŋtaŋa ale ŋan bobintaŋa ale bo zaŋŋa nyiŋla jam ka kpana, ate ba pai kpana a taari ŋa zuk. Zaŋŋa meena ale jam bo dabiaka po la, jam ta ka kpana ŋan bobinta.

18Garuk panni ale jam bo dabiaka nansuiŋku la, jam ka garuk miik sobluk ale garuk miik ŋmiŋmiruk ale garuk miik mɔnuŋ ale gattiak naliŋ ate waai ale seba nisa tuima la a yɔk. Di magsika woglimmu jam paarika anamagib pisinaansi, ase dabiaka garuk palaŋa la, ŋala juelika magsika jam ka anamagib pi 19ale zaŋŋa ŋanaansi ale kutuk mɔnuŋ gola ŋanaansi. Ŋa ŋanyiŋtaŋa ale ŋan bobintaŋa jam ka kpana ate ba pai kpanaŋa a taari ŋa zuk. 20Viuku kpaasaŋa meena ale dabiaka gilagilawa jam ka kutuk mɔnuŋ ate ba pai nye.

21Ŋantaŋa de ate ba jam pai nye tuka viuku, Pumpuulima Viuku, wie ŋaai ate Moosis a jam weeni ate Itamar Aaron biika, kaabteerɔwa a basi ate Livaima a ŋmarisi la. 22Bezalel Uri biika ate Yur a chim wa ko kpieŋ a nyini Juda dɔkku la a jam nye dii meena ate Naawen a jam weeni Moosis la kama. 23Waai ale jam gum wa po la ale Oyoliab Ayisamak biika ale nyini Dan dɔkku a peesi ale a ŋmirisi ŋanta ale garuk miik sobluk ale garuk miik ŋmiŋmiruk ale garuk miik mɔnuŋ ale gattiak naliŋ. 24Ligmɔniŋka meena ale nyini zak sakka tiirimu po a magsi Wen yenni tuini meena la jam ka boorisa pisiye ale neok dobrim ale ligbie dobrim kobsa pisiyopɔi ale pisita, magsi chaab ale Wen yenni ale ka diila.

25Kpanaŋa ate ba jam nya nyini baai ale bo naakuuŋa po ate ba jam chiini ba la ka boorisa kook dobrim ale ligbie tusidi ale kobsiyopɔi ale pisiyopɔi ale ŋanu (1,775) dobrim a magsi chaab ale Naawen yenni magsika ale ka diila. 26Nuru yeŋ a te ka ligbie geli dobrim a magsi chaab ale Naawen yenni ale ka diila, a nyini waai meena ale gaam taam gum baai ate ba chiini la po, ate ba bena a paari pisiye yaase ŋa gaam dila la. Ate ba meena nɔi a chim tusa kobsiyuebi ale ŋata ale kobsinu ale pisinu la (603,550). 27Kpana dobrim ase boorisa kook la ate ba jam pai nye kpana gola a magsi Wen dɔkku ale garuk panni, kpana gola kook ale nyini boorisa kook dobrim po, bunyi a magsi goluk kunyi. 28Ba jam pai ligbie tusidi ale kobsiyopɔi ale pisiyopɔi ale ŋanu (1,775) dobrim ayen ba nye ŋanyiŋta ale zaŋŋa ale taari ŋa ŋmanni.

29Kutuk mɔnuŋku ale nyini zak sakka tiirimu po la jam ka boorisa pisiyopɔi dobrim ale ligbie tusa ŋaye ale kobsinaansi (2,400) dobrim. 30Ba jam pai ŋa a nye ka kutuk mɔnuŋ gola tuka viuku nansuiŋku ale kutuk mɔnuŋ kuŋkuŋku ale ku kutuk mɔnuŋ ŋantaŋa meena, 31golaŋa ale bo dabiaka gilagilawa la ale ŋaai ale bo ku nansuiŋku la ale viuku kpaasaŋa ŋaai ale bo ku nansuiŋku la ale viuku kpaasaŋa meena ale ŋaai ale bo dabiaka gilagilawa la.

Currently Selected:

Nyinika 38: BWU

Highlight

Copy