Nyinika 39

1Ka garuk miik sobluk ale garuk miik ŋmiŋmiruk ale garuk miik mɔnuŋ ate ba pai yɔk garuk woŋ a magsi jigi dii ale ta tuilum la po tomka. Ba jam maa nyeka tuilum gatta a te Aaron, ase Naawen ale jam weeni Moosis diila.

2Ligmɔniŋ ate ba jam pai nye garuk geli ale garuk miik sobluk ale garuk miik ŋmiŋmiruk ale garuk miik mɔnuŋ ale gattiak peelik kaai diak ale pagra la. 3Ba jam pai ka ligmɔniŋ a kuri a nye garuk miik a yaa pai ka a yɔk ale garuk miik sobluk ale garuk miik ŋmiŋmiruk ale garuk miik mɔnuŋ ale gattiak peelik kaai diak ale pagra la, waai ale seba nisa tuima la ale nye dila. 4Ba jam nyeka ŋmankpala ŋaye a te garuk genni ate ŋa maŋ di gugottaŋa tiyewa nyiŋ ate dila ale basi ate di yik wa a magsi. 5Ku chiak gbainni ate ba yɔk di nalimnyiini a magsi ku la a nye ase ka garuk ŋmankpali pasaŋa dek la, a bo garuk ŋmankpali pasaŋa nyiŋ, ba jam yɔk di ale ka ligmɔniŋ ale garuk miik sobluk ale garuk miik ŋmiŋmiruk ale garuk miik mɔnuŋ ale gattiak naliŋ, ase Naawen ale jam weeni Moosis diila.

6Ba jam pai ka tintain ŋaai ale gamisi a maŋ du a ŋmarisi Izirali nidoabilisaŋa yue ŋa nyiŋ. 7Wa yaa jam pai ŋa a maŋ garuk genni nyiŋ ase tintain ŋaai ale ŋa chim teerika a te Izirali nidoabilisaŋa meena, ase Naawen ale jam weeni Moosis diila.

8Wa jam nye ka jabuui ale a lik suinum la, ka waai ale seba yɔkka la ale jam pai ligmɔniŋ ale garuk miik sobluk ale garuk miik ŋmiŋmiruk ale garuk miik mɔnuŋ ale gattiak peelik kaai diak ale pagra la a nye suinum jaligimmu ase garuk genni dek la. 9Suinum jaligimmu jam ka nna ŋmɔgluk ŋmɔglukwa ate ku magsika woglimmu a paari anamagib buye ate ku labsimu a chim anamagib buye a kpamsi buye. 10Ba jam pai ka tintana a dueni vuuta tinaansi ku nyiŋ. Vuuk kuui ale dɛ niŋka la tanaŋa jam ka tintain munta ale tintain ŋaai ale a nye ase dubuulim la ale tintain paata. 11Kuui ale paasaŋ la, ka tintain ŋmiŋmirita ale tintain sobta ale tintain ŋaai ale a nye ase gunungoona la. 12Vuuta titawa po jam ka tintain bibituk ale tintain paasa ale tintain ŋaai ale a nye ase busumbooŋ. 13Vuuk kuui ale saari tinaansiwa la po, jam ka tintain salima ale tintain ŋaai ale gamisi ale tintain mɔnta. Ba jam pai ka ligmɔniŋ a nye a pai ŋa a su. 14Ŋa jam ka tintana pi ale ŋaye, dinyi meena zuk jam ka Izirali nidoabilisaŋa wanyi wanyi meena yuei ale jam ŋmarisi du, dinyi meena zuk ba jam ŋmarisi ka Izirali buuni wanyi wanyi yuei a dueni du.

15Suinum jaligimmu ba jam pai ka cheri ligmɔniŋ a nye chɔrima ase miik la. 16Ba jam nye ka ligmɔniŋ miisa siye ale ligmɔniŋ baŋsa siye a tuiri maŋ suinum jaligimmu ŋmankpalaŋa. 17Ba jam pai ka ligmɔniŋ chɔrima ŋayewa a tuiri baŋsaŋa ale bo suinummu jaligimmu gugottaŋa po la. 18Ba jam basi ate chɔrimaŋa ŋayewa kpeglimka ale a su vie ŋayewa po la, a maŋ chaab garuk genni ŋmankpalaŋa niŋka. 19Ba jam nye ka ligmɔniŋ baŋsa siye a maŋ nsila siyema ale bo suinum jaligimmu gugottaŋa po a moata garuk genni la. 20Ba jam ŋman nye ka ligmɔniŋ baŋsa siye a pai si a maŋ suinummu jaligimmu tɛŋka garuk genni niŋka, a moata vuurisa siyewa ale tu chaab a bo garuk genni chiak gbainni ŋmai la. 21Ba jam bobi suinum jaligimmu baŋsaŋa a maŋ ka garuk genni baŋsaŋa ale miik sobluk, a tom chaab ale chiak gbainni, ayen suinum jaligimmu a kan cheŋ nyini peelim abe ku ge garuk genni, ase Naawen ale jam weeni Moosis diila.

22Ba nye garuk genni garuk woŋku ale ka garuk pali sobluk. 23Wa jam nyeka voan garuk woŋku suŋsuŋka ate viok a jo ale yɔk ku ŋinni ate ku kan cheeri. 24Ba jam pai ka garuk miik sobluk ale garuk miik ŋmiŋmiruk ale garuk miik mɔnuŋ ale gattiak kaai diak ale pagra a yɔk ŋangilima ase yɔna la a gilim garuk woŋku ate ba yɔk la. 25Ba jam pai ka cheri ligmɔniŋ lɔŋŋa ale ŋan baai ale a nye ase yɔn gigiluta la, a baali yik garukku tɛŋka noawaaŋa. Lɔŋŋa ale jam bo yɔnaŋa suŋsuŋ. 26Lɔŋŋa ale ŋantaŋa ale a nye ase yɔn gigiluta ate ba yɔk a gilim garukku la ba le jo ku a tom kama, ase Naawen ale jam weeni Moosis diila.

27Aaron ale wa nidoabilisaŋa ka baai ale seba ŋanta yɔkka la ale jam pai gattiak kaai diak ale pagra la a yɔk garuk woŋ peelita. 28Ba pai gattiak kaai diak ale pagra la a nye zutɔk ale ka noaŋa garuk panni ale tɛŋ gattaŋa. 29Ba jam pai ka gattiak kaai diak ale pagra la ale garuk miik sobluk ale garuk miik ŋmiŋmiruk ale garuk miik mɔnuŋ, a nye garuk pali dii ale a bobi chiaka la. Waai ale seba yɔkka la ale nye dila, ase Naawen ale jam weeni Moosis diila.

30Ba jam pai ka cheri ligmɔniŋ a nye jatanlaŋ, tuilum zutɔk ate ba ŋmarisi ka zuk ayen, <<Ta tuilum a te Naawen.>> 31Ate ba yaa pai miik sobluk a bobi jatanlaŋka a maŋ zutɔkka, ase Naawen ale jam weeni Moosis diila.

32Ba jam tom viuku ale Tuka Viuku tuimaŋa meena a nueri. Izirali demma a jam nye wari meena kama ase dii dek ate Naawen a jam weeni Moosis la. 33Ba jam ta viuku a jam te Moosis. Viuku ale ku jaab meena ŋanyiŋtaŋa ale zaŋŋa ale chibsaŋa ale golaŋa 34ale padiak gbana ate ba mun si la ale gbaŋ maŋsa ale garuk pali dii ale a lik ŋmani la. 35Nɔiyeŋka dakanni ale di dawoŋta ale biem duisi basika nanlikka 36ale jazaanimu ale ku ŋantaŋa meena ale boroboroku ate ba ta a jam Naawen niŋ la. 37Cheri ligmɔniŋ jazaanimu ale zeuŋtaŋa ale ku ŋantaŋa meena ale kpaamu a magsi bolimu tɔtika la 38ale ligmɔniŋ kuŋkuŋku ale naam bobika kpaamu ale ŋan baai nyum ale masa la a magsi juka ale garuk panni ale a lik viuku nansuiŋku nɔi la, 39ale kutuk mɔnuŋ kuŋkuŋku ale kutuk mɔnuŋ kuui ale yik yeliŋka la ale ku dawoŋtaŋa ale ku ŋan baai meena ate ba ta a tom ku tuimaŋa la ale chin kpienni ale di jazaanimu 40ale garuk palaŋa ale a lik dabiaka po la ale zaŋŋa ale kutuk mɔnuŋ golaŋa ale garuk panni ale a lik dabiaka nansuiŋku la. Dabiaka miisaŋa ale kpaasaŋa ale ŋan baai meena ate ba ta a tom tuima viuku ale Tuka Viuku po la. 41Ale garuk tii ate ba yɔk a magsi ayen ba jo a tom jigi dii ale ta tuilum la, tuilum gattaŋa a magsi Aaron waai ale ka kaabteerɔ la ale garuk tii ale magsi wa nidoabilisaŋa ase ba nin jam a tom ase kaabteerɔba la.

42Izirali demma a jam tom tuini meena ka dii dek ate Naawen a jam weeni Moosis la. 43Moosis yaa jam kpesi nya tuini ate ba tom la, ku jam ka dii dek ate Naawen a jam weeni la. Dila nyiŋ Moosis a yaa niak ba.

Currently Selected:

Nyinika 39: BWU

Highlight

Copy

Compare