Nyinika 37

1Bezalel a jam pai ka siik daata a nye nɔiyeŋka dakanni ate di magsika woglimmu a paari anamagib bunu ate labsimu a chim anamagib buta ate ku juelika a paari anamagib buta. 2Wa jam pai ka cheri ligmɔniŋ a taari di ponni po ale di ŋaaŋka meena ale pai ligmɔniŋ a gebiri a gilim di noawaaŋa. 3Wa jam nyeka ligmɔniŋ baŋsa sinaansi a maŋ di gugotta tinaansiwa, baŋsa siye meena a bo ganaŋa. 4Ate wa jam yaali siik daata a pai ligmɔniŋ a taari ti zuk. 5Wa jam pai daataŋa a su baŋsaŋa ale bo dakanni ganaŋa la a magsi yik jika.

6Wa jam nye ka biem duisi basika nanlikka ale cheri ligmɔniŋ. Ka woglimmu a paari anamagib bunu ate labsimu a paari anamagib buta. 7Wa jam pai ka ligmɔniŋ a kuri mɛ ŋanta ase ŋanvuta#37:7 Piilimka 3:24 baye la nanlikka noawaaŋa. 8Wa jam nye ka javuk kunyi a basi noawanni dinyi ale nye wanyi mɛ noawari ndila nyiŋ. Noawaaŋa ŋayewa, wa jam pai ka ligmɔniŋ sandari a nye ba ale nanlikka. 9Ŋanvutaŋa a jam ta ka kinkaŋŋa ate ŋa lagri a ti wen a lik nanlikka. Ŋanvutaŋa a jam za a tuk ka chaab a nya nanlikka geŋsa.

10Wa jam pai ka siik daata a nye jazaanimu. Ku woglimmu a chim anamagib bunaansi ate labsimu a chim anamagib buye ate ku juelika a chim anamagib buta. 11Wa jam pai ka cheri ligmɔniŋ a taari ku ale pai ligmɔniŋka a gebiri gilim ku. 12Wa jam nye ka jagigiluk ate ku labsa ase nitali la a gilim ku a pai ligmɔniŋ a gebiri ku a gilim noawaaŋa. 13Wa jam nye ka ligmɔniŋ baŋsa sinaansi a magsi jazaanimu gugotta tinaansiwa juijui ate naŋsaŋa sinaansiwa jam boro la. 14Baŋsaŋa a jam moata ka noawaaŋa a yik daataŋa ate ba pai a ji jazaanimu la a tara. 15Wa jam pai ka siik daata a nye ti a pai ligmɔniŋ a taari ti, ate ba ta a yik jazaanimu. 16Wa jam pai ka cheri ligmɔniŋ a nye jazaanimu ŋantaŋa, ku taasi tanlaŋsaŋa ale chinaŋa a magsi ŋan baai nyum ale masa la, ale ku taasaŋa ale ku leŋsaŋa ate ba ta a kpiiri daam tiiritaŋa la.

17Wa jam pai cheri ligmɔniŋ a kuri nye zeuŋ jazaanimu kinni ale nyiŋka ale ŋan baai ale nye ase puuta beerisa la ale naŋsaŋa ate ba meena a bo jigi yeŋ.#37:17 Nyinika 25:11 18Zeuŋku naŋsaŋa a jam chim ka siyuebi, sita a bo kaukku kunyi, sita mɛ a bo kauk kunkula. 19Wa jam nye ka beerisa sita ale jam a niesi almond puuta#37:19-20 Almond tiib a nye ase ka kangbegi tiib la. a bo naŋ kanyi zuk, sita a bo naŋ kinkala zuk, wa jam nyeka dila dek a basi naŋsa siyuebiwa zuk meena ale tom zeuŋ jazaanimu nyiŋla. 20Wa jam nye zeuŋ jazaanimu zuk ka beerisa sinaansi ale a niesi almond puuta la. 21Puuk fiik kunyi ale jam bo naŋsa siyewa ale dɛ niŋ a teeri nyini zeuŋ jazaanimu nyiŋla, ate buyewa po, puuk fiik a bo naŋsa siyewa nyiŋ, ate butawa po, puuk fiik a bo naŋsa sitawa nyiŋ, si meena a jam ka naŋsa siyuebi. 22Puuk fiisaŋa ale naŋsaŋa meena a jam boka jigi yeŋ ale zeuŋ jazaanimu, ka cheri ligmɔniŋ ate ba jam kuri a nye ŋantaŋa de.

23Wa jam pai ka cheri ligmɔniŋ a nye zeuŋta tiyopɔi ale boom ŋangebinta ale taasi tanlaŋ kpiemaŋa. 24Ka cheri ligmɔniŋ dobrim ase boorik yeŋ la ate ba jam pai nye zeuŋ jazaanimu ale ku ŋantaŋa meena.

25Wa jam pai ka siik daata a nye kuŋkuŋ a magsi ŋan baai nyum ale masa la juka. Ku jam ka kuŋkuŋ ŋmɔgluk, ku magsika woglimmu a jam paari ka anamagib buye ate ku labsimu a paari anamagib buye, ku juelika a paari anamagib bunaansi, ku ale ku nyiilaŋa a jam boka jigi yeŋ. 26Wa jam pai ka cheri ligmɔniŋ a taari ku ŋmanni ale ku ganaŋa ale nyiilaŋa ale pai ligmɔniŋ a gebiri gilim ku. 27Wa jam nye ka ligmɔniŋ baŋsa siye a basi ba le gebiri juijui ale ligmɔniŋka la kinni po ate siye a bo gauŋ kunyi meena a yik dawoŋtaŋa ate ba yik a ji la. 28Wa jam nye ka siik dawoŋta a pai ligmɔniŋ a taari ti.

29Ba jam maa nyeka naam bobika tuilum kpaam ale cheri ŋan baai nyum ale masa la. Ka waai ale seba ŋantaŋa de nyeka la ale nye dila.

Currently Selected:

Nyinika 37: BWU

Highlight

Copy