Nyinika 36

1<<Bezalel ale Oyoliab ale nuru waai meena ate Naawen a te wa nisa tuima ale bag nyeka ate wa seba wa le wa tom dii a ta va Wen yenni sɛka la, a magsi ba tom tuini ase ka Naawen ale weeni diila.>>

2Ate Moosis yaa wi Bezalel ale Oyoliab ale waai meena ale seba nisa tuima ate Naawen a te wa bag nyeka ale waai ale a yaali wa jam tom tuini la. 3Ba yaa tuesi tiiritaŋa meena ate Izirali demma a ta jam magsi Naawen yenni tuini la a ta nyini Moosis jigi. Nuruma a jam diem cheesi ka yaalika tiirita saluik meena a ta jam. 4Dila nyiŋla nuru baai ale seba tuima la, baai ale jam a tom Naawen yenni tuini meena la yaa basi ba tuini 5ale weeni Moosis ayen, <<Nuruma a ta jam a gaam tuini ate Naawen a weeni ayen ba nye la kama.>>

6Ate Moosis yaa tom weeni tigsuŋku meena ayen, <<Nidoa yaase nipok a kan ŋman nye wari ase cheesika la a magsi Naawen yenni.>> Ate dila a nye ate nuruma an ŋman ta jaab a jam ya, 7dii nyiŋla ba le poom ta ŋanti baai la a piisi gaam tuini meena tomka kama.

8Baai meena ale seba nisa tuima a bo nuru baai ale tom viuku tuimaŋa ale garuk palaŋa, ale gattiak peelik kaai diak ale pagra la ale garuk miik sobluk ale garuk miik ŋmiŋmiruk ale garuk miik mɔnuŋ ale yɔk ŋanta ase ŋanvuta la a nyo garukku nyiŋ. 9Garuk palaŋa meena a jam soa ase ka chaab la ate ŋa magsika woglimmu a paari anamagib pisinu ale buyuebi ate ŋa labsimu a paari anamagib naaniŋ. 10Wa jam pai ka garuk pala ŋanu a baali a maŋ chaab ale nye nŋala ŋanuwa mɛ dila. 11Wa jam pai garuk pali sobluk a nye ŋanyiŋta garuk panni kpeglimka, dila degadega ate wa jam nye ndila mɛ. 12Wa jam nyeka ŋanyiŋta pisinu garuk yeŋ nyiŋ ale ŋman nye ŋanyiŋta pisinu a basi ndila kpeglimka ate ŋanyiŋtaŋa a tuk chaab. 13Wa jam nyeka ligmɔniŋ ŋanta pisinu a kpi garuk pala buyewa a maŋ chaab ate viuku a chim bunyi.

14Wa jam pai ka buuk kɔbta a nye garuk pala pi ale dinyi a lik viuku. 15Garuk pala pi ale dinyiwa meena a jam a soa ase ka chaab la. Ŋa magsika woglimmu a jam paari ka anamagib pisiyuebi, ate ŋa labsimu a paari naaniŋ. 16Wa jam pai ka garuk pala ŋanu a maŋ chaab ale pai nŋala ŋayuebiwa mɛ a maŋ chaab. 17Wa jam nyeka ŋanyiŋta pisinu a kpi garuk palaŋa kpeglimka ale nye ndila kpeglimka mɛ dila. 18Wa jam nyeka kutuk mɔnuŋ ŋanyiŋta pisinu a tuiri kpi garuk palaŋa kpeglimka a maŋ chaab. 19Wa jam pai ka padiak gbana a mun si a lik viuku ale pai gbaŋ maŋsa a lik ŋmani.

20Wa jam pai ka siik zaŋŋa ŋaai ale teenti la a magsi viuku. 21Zaŋŋi dinyi meena woglimmu a jam paari ka anamagib pisiye ate labsimu a paari anamagib buta 22ale kpaasa ŋaye meena a feri ŋa ate ŋa kan tu chaaba. Wa jam nye viuku zaŋŋa meena ka wayeŋ. 23Wa jam nyeka zaŋŋa pisiye a zaani viuku yeseoku geŋsa 24ale nye kpana gola pisinaansi a chɔgsi ŋa, kpaasa ŋaye meena a magsi zaŋi yeŋ, dinyi a bo goluk yeŋ po. 25Kauk kunkula viuku wiilukku geŋsaŋa wa jam zaani ka zaŋŋa pisiye 26ale kpana gola pisinaansi ate gola ŋaye meena a magsi zaŋi yeŋ. 27Wa jam nye ka zaŋŋa ŋayuebi a zaani viuku yeniŋ geŋsa, 28ale yaali zaŋŋa ŋaye a zaani viuku kpeglimka gugotta tiyewa po. 29Gugotta tiyewa de po, zaŋŋa a jam ka ŋaye a nyini tɛŋ a jueli a paari ŋmani a jo voan yeŋ po. Zaŋŋa buyewa mɛ a jam ka dila. 30Ŋa meena jam ka zaŋŋa naaniŋ ale kpana gola pi ale ŋayuebi ate zaŋi yeŋ a soa gola ŋaye.

31Wa ŋman jam yaali ka siik chibsa. Sinu meena a magsi viuku kauk kunyi zaŋŋa, 32sinu mɛ a bo kauk kunkula, sinu mɛ a vi zaŋŋa ale bo viuku yeniŋka kpeglimka la. 33Wa jam basi ate suŋsuŋka chimmu a vi zaŋŋa zuk a nyini ka kpeglimka a ga paari kpegli kinkala. 34Wa jam pai ka ligmɔniŋ a taari zaŋŋa zuk ale nye ligmɔniŋ baŋsa a su zaŋŋa ate si yik chibsaŋa a ta. Ba ŋman jam pai ka ligmɔniŋ a taari chibsaŋa zuk.

35Ba jam yɔk garuk panni ale ka garuk miik sobluk ale garuk miik ŋmiŋmiruk ale garuk miik mɔnuŋ ale gattiak naliŋ. Ate nuru a yɔk ŋanta ase ŋanvuta #36:35 Piilimka 3:24 la a kali garuk panni nyiŋ. 36Ba jam nye ka siik daata tinaansi a magsi garuk panni ale pai ligmɔniŋ a taari ti. Ba jam nye ka ligmɔniŋ ŋanyiŋta a magsi ti ale nye kpana gola ŋanaansi. 37Nansuiŋku ale a jo viuku po la, wa jam yɔk ka garuk pali ale garuk miik sobluk ale garuk miik ŋmiŋmiruk ale garuk miik mɔnuŋ ale gattiak peelik ate ka diak a pagra la, ate nuru a yɔk garuk panni nyiŋ. 38Ba jam maa nye ka daata tinu ale ŋanyiŋta. Ba jam taari daataŋa ale ŋan bobintaŋa ale ka ligmɔniŋ ale nye gola ŋanuwa ale kutuk mɔnuŋ.

Currently Selected:

Nyinika 36: BWU

Highlight

Copy