Nyinika 35

1Ate Moosis a jam tigsi Izirali naakuuni meena a weeni ba ayen, <<Wieŋa de ate Naawen ayen ni nye. 2Daa ŋayuebi tuima a tom, alege daa ŋayopɔiwa danni a chim dai dii ale ta tuilum, Vuusum dai a te Naawen. Nuru waai a dan tom tuini ku a fɛ ate ba ko wa. 3Ni kan cheem bolim ni boka jiŋŋa Vuusumu danni.>>

4Moosis yaa weeni Izirali naakuuni meena ayen, <<Dii ate Naawen a weeni la ale nna. 5A nyini ŋan baai ate ni ta la po, ni te Naawen. A nyini waai meena suinum po wa abe te Naawen tiiritaŋa de, ligmɔniŋ ale kpana ale kutuk mɔnuŋ ale 6garuk miik sobluk ale garuk miik ŋmiŋmiruk ale garuk miik mɔnuŋ ale gattiak peelik kaai diak ale pagra ate ba nye ale buuk kɔbta la. 7Ale padiak gbana ŋaai ate ba tak ale muni ŋa la ale gbaŋ maŋsa ale siik daata 8ale kpaam a magsi bolimu ale tinaŋsa a magsi naam bobika kpaamu ale ŋanti baai nyum ale masa la. 9Ale tintain ŋaai ale gamisi ale tintain yona ŋaai ale a nyaksi a pai ŋa a maŋ garuk genni ale kuui ale a lik suinummu la nyiŋ.

10<<Baai meena ale seba tuima a bo ni po la a jam nye dii meena ate Naawen a weeni la. 11Viuku ale ku ŋan pilintaŋa ale ŋanyiŋta ale zaŋŋa ale chibsa ale kpana gola. 12Dakanni ale di daataŋa ale biem duisi basika nanlikka ale garuk panni ale a lik di la. 13Jazaanimu ale ku daataŋa ale ku ŋantaŋa meena ale Wen niŋ boroboroku. 14Zeuŋ jazaanimu ale a magsi bolim tɔtika la ale ku ŋantaŋa ale zeuŋku ale kpaam a magsi bolim. 15Kuŋkuŋku ate ba a ju ŋan baai nyum ale masa la du ale ku daataŋa ale naam bobika kpaamu ale ŋan baai nyum ale masa la ale garuk panni ale a yik viuku nansuiŋku tuoku nyiŋla. 16Ale kuŋkuŋku ate ba nye juka tiirim du la ale ku kutuk mɔnuŋ ŋoari ale ku daataŋa ale ku jaab meena ate ba ta a tom la ale kutuk mɔnuŋ chin kpienni ale di le a zaani jabuui zuk la. 17Ale dabiaka garuk panni ale daataŋa ale kpana gola ale garuk pali a magsi dabiaka nansuiŋku. 18Ale viuku kpaasaŋa a magsi viuku ale dabiaka ale miisaŋa 19Ale garuk tii ate ba yɔk a magsi ayen ba jo a tom jigi dii ale ta tuilum la, tuilum gattaŋa a magsi Aaron waai ale ka kaabteerɔ la ale garuk tii ale magsi wa nidoabilisaŋa ase ba nin jam a tom ase kaabteerɔba la.>>

20Izirali naakuuni meena yaa ŋmani ale basi Moosis, 21ate waai meena ale a yaali la ale baai ate ku tiri ba suiniima la a yaa jam ta tiirim a jam te Naawen a magsi Tuka Viuku tuimaŋa ale ku tuimaŋa meena tomka ale tuilum gattaŋa. 22Baai meena ale jam a yaali la, nidoaba ale nipooba meena a jam ta ka ligmɔniŋ buuri meena a jam. Ba le jam maa ta ŋan ti baai a jam la ale nna, ŋan baai ate ba a kpi gatta nyiŋ ale tukpana ale nifelima ale baŋsa, ase zak sakka tiirim la a te Naawen. 23Waai meena ale jam ta garuk miik sobluk yaase garuk miik ŋmiŋmiruk yaase garuk miik mɔnuŋ yaase gattiak peelik yaase buuk kɔbta yaase padiak gbana ate ba muni si la yaase gbaŋ maŋsa, ba jam ta ŋa a jam kama. 24Baai ale jam ta kpana yaase kutuk mɔnuŋ a jam la, ba jam pai te ka Naawen ase tiirim la, ate waai mɛ ale jam ta siik daata a magsi tuini la a pai ti a te. 25Nipok meena nisa ale ta tuima la yaa ta wa nisa ale yɔk jabuui la a jam kama. Ŋan bala ale garuk miik sobluk ale garuk miik ŋmiŋmiruk ale garuk miik mɔnuŋ ale gattiak naliŋ. 26Ate nipooma meena baai ale jam a yaali la a seba tuima la a yaa yɔk buuk kɔbta. 27Niŋdeerɔma yaa ta tintain ŋaai ale gamisi ale ŋanta ba chaab jam ayen ba maŋ garuk genni ale suinum jaligimmu nyiŋ. 28Ba jam maa ta ka ŋan baai nyum ale masa ale kpaam a magsi bolim toatika ale naam bobika kpaam ale nyum masik ŋanta juka. 29Izirali nipooma ale nidoama meena baai ale jam a yaali la a yaa ta yaalika tiirita a te Naawen a magsi tuini meena ate Naawen a jam ta va Moosis zuk a weeni ba ayen ba nye la.

30Moosis a jam weeni Izirali demma ayen, <<Nya de, Naawen lueri ka Bezalel Uri biika ate Yur a chim wa ko kpieŋ a nyini Juda dɔkku la 31ale sueri wa ale Wen Chiika ale tuima sebika ale wie miŋka yam a bo nisa tuima meena po la. 32Ate wa baga a pai ligmɔniŋ ale kpana ale kutuk mɔnuŋ a ŋmirisi ŋa a magsi tuima meena po 33wa baga a gebi tintana, wa ale baga a tom daata tuima ale nisa tuima meena. 34Wa jam te ka ba nɔi bayema, wa ale Oyoliab Ayisamak nidoabinni ale nyini Dan dɔkku la ka nyiŋ pagra ayen wa sak nuruba ba chaab. 35Wa jam sueri ba ale ka sebika ayen ba baga a nye nisa tuima meena, a ŋmirisi ŋanta abe ba baali ŋanta ale garuk miik sobluk ale garuk miik ŋmiŋmirita ale garuk miik mɔnuŋ ale garuk pali naliŋ la ale yɔgdɔba, ba meena jam ka baai ale ŋmasi seba nisa ale ŋmirisika tuima nna yegayega.

Currently Selected:

Nyinika 35: BWU

Highlight

Copy