Nyinika 34

1Naawen yaa weeni Moosis ayen, <<Peesi tintain paglaksa siye ase ŋaai ate fi liŋ ta la, ate m le ŋmarisi wie ŋaai ate m daam ŋmarisi ate fi mobi ŋa la. 2Gomsi saluik a jueli jam Sinai Guuku zuk. Ta fidek a jam mi jigi guuku zuk. 3Waai a kan va fu a jam yaase m nya waai guuku zuk kauk kuui ya. Ni duŋsaŋa a poom kan dɛ guuku zuwa.>>

4Moosis yaa peesi tintain paglaksa siye ase nŋala la, a jueli Sinai Guuku zuk saluik yokyokwa, ase Naawen ale jam weeni wa diila. Ate wa yaa ta tintain paglaksa siyewa wa nisa po. 5Ate Naawen yaa siŋ jam chiŋmanni po a za ale wa a mooli wa yuenni ayen Naawen. 6Wa yaa va Moosis niŋ a taam ale a mooli ayen, <<Naawen, Naawen, jiirim ale yaalika Wen. Waai sui ale kan kpabi a puuri, wa ŋmanteka ale wa wensieŋa mɛ a zuak a tom nalimnyiini ale 7diem ta ŋmanteka ale tusa, a vɔŋ a te gaasa ale tukpari ale biem nyam. Alege wa kan basi baai ale kaasi la tue darika. Wa le dari bisa ale ba mɛ ale biak baai la tue ba koma biemu nyiŋ a ta ga paari ŋaaŋbisa buta ale bunaansiwa po.>>

8Moosis yaa jam koori tɛŋ a puusi ale weeni ayen, 9<<Nyɔnɔ, ase m dan ta ŋmantiik fi nina po basi ate Nyɔnɔwa a va ti a cheŋ. Nuruma de ka tukpari nyam, vɔŋ ti gaasaŋa ale ti biemu a te ti, abe fi ta ti ase fi nitalim la.>>

10Ate Naawen ayen, <<Mi a nyeka nɔiyeŋ ale fu. Fi nuruma meena niŋ mi ale nye ka wakinkagla ŋaai ale kan nye tɛŋ kaai po tɛŋzuk de a nya la. Nuru baai po ate fi bo la ale nya tuin dii ate mi, Naawen ale nye a te fu la. 11Ni nye tuewomma a te dii ate mi a weeni ni jinla de la. Mi ale yiak Amori ale Keenan ale Yit ale Perizzi ale Yivi ale Jebus demma a basi a te ni. 12Ni be kpesi nidek ate ni kan nye nɔiyeŋ ale baai ale bo tɛŋ kaai po ate ni a cheŋ ka po la, ni dan nye dila ba le chim baruk a bo ni po. 13Ni kpiti ba kuŋkuŋtaŋa a ŋɔriŋ ba tintain weleŋsaŋa a che ba Asera dawoŋtaŋa a lɔnsi. 14Ni kan puusi wen yona ale Naawen, waai yuei ale ka a Anyuri la, ka nyuri dɛka Wen.

15<<Ni kpesi nidek ate ni kan nye nɔiyeŋ ale baai ale bo tɛŋka po la, diila ba dan pai badek a te ba wenaŋa ase taabuksa la, a kaab ŋa, ba le wi ni ate ni dɛ ba kaabka ŋandiintaŋa. 16Ase nama a dan lueri ba liema gela ase pooba la a te ni nidoabilisaŋa ate ba lie bala a pai badek a te ba wenaŋa ase taabuksa la, ba le sak ni nidoabilisaŋa ka dila degadega.

17<<Ni kan nyaliŋ ŋanta a mɛ bɔgta a te ni dega.

18<<Ni a ŋɔbi Boroborok Kuui Ate Dabinta Ka Ku Po La Tigini. Daa ŋayopɔi ni a dɛ boroborok kuui ale kan ta dabinta la ase mi ale weeni ni diila. Ni nye kude diipo ate mi a dak Abib chiika po la ale ka chiik kala ate ni basi Ejipiti tɛŋka.

19<<Ba le dɛ niŋ a biak baai meena la ka mi ale soa a gum chaab ale duŋsaŋa ale dɛ niŋ a biak ŋandoa tiila, ŋa dan poom chim niiga yaase piisa. 20Pai pabiik a da tuesi boniŋ ale liŋ biak kaai la, alege fi dan kan da tuesi ka, wɛ ka ŋinni. Ni da tuesi biik kaai meena ate ba liŋ biak ni bisaŋa po la. Ni waai a kan jam mi jigi ale nisim koruta.

21<<Daa ŋayuebi ni pai a tom tuima, alege daa ŋayopɔiwa danni ni vuusi. Ku dan poom ka kpari wen yaase cheka wen ku a fɛ ate ni vuusi.

22<<Ni dɛ Bakoa Tigini ale ŋandiin tii ale dɛ niŋ ka a bɛ la ale Tigsi Tajoka Tigini benni kpeglimka po. 23Buta meena benni po ni nidoama a magsi ba jam Nyɔnɔwa waai ale ka Naawen niŋ, dii ale ka Izirali Wenni la. 24Mi ale yiak tɛŋsa a basi te ni abe m basi ate ni tɛŋka a lagri, ate waai a kan vari ni tɛŋka ase nama a nin jueli buta meena benni po Naawen ni Wenni niŋ.

25<<Fi kan pai zi buui ate fi pai nye kaabka la a gum chaab ale jabuui ate dabinta a boro la a te mi, abe fi kan basi ate Gaambasika Tigini kaabka ŋantaŋa a tali paari saluiwa.

26<<Ta ŋandiin tii ale dɛ niŋ a bɛ fi kaduksaŋa po la a jam Naawen fi Wenni yenni po. Be kan dik bu poali ku ma biisim po.>>

27Ate Naawen a weeni Moosis ayen, <<Ŋmarisi wieŋa de, a ta va wieŋa de zuk mi nyeka nɔiyeŋ ale fi ale Izirali demma.>> 28Moosis a jam boka dula ale Naawen a paari daa pisinaansi ale yokta pisinaansi wa an dɛ ŋandiinta wa abe nyu nyiamoa. Wa yaa jam ŋmarisi tintain paglaksaŋa zuk nɔiyeŋka wieŋa, Wie Piika.

29Ase Moosis ale nyini Sinai Guuku zuk a siŋ ale tintain paglaksa siyewa wa nisaŋa po la, wa jam zɛ ayen wa nimbidiaka a jam a nyaksi wa ale jam biisi ale Naawen la nyiŋŋa. 30Ase Aaron ale Izirali demma meena ale jam nya ale Moosis nimbidiaka a nyaksi la, ba yaa yɔgsa ale ba le ba cheŋ a moata wa. 31Alege Moosis yaa wi ba, ate Aaron ale Izirali naakuuni niŋdeerɔma meena a jam wa jigi ate wa biisi ale ba. 32Dila ŋaaŋnyiŋ Izirali demma meena yaa jam moata wa, ate wa yaa te ba wieŋa meena ate Naawen a jam te wa Sinai Guuku zuk la.

33Ase Moosis ale ga biisi ale ba a nueri la, wa yaa pai garuk a lik wa nimbidiaka. 34Alege diipo ate wa jo Naawen niŋ ayen wa biisi ale wa la, wa nyiem a lagri garukku kama ate ku paari diipo ate wa nyini peelim la. Ase wa le nyini peelim a weeni Izirali demma wa ale weeni diila, 35ba jam nya ale wa nimbidiaka a nyaksi kama. Ate Moosis a ŋman pai garukku a lik wa nimbidiaka ate ku paari diipo ate wa a jo wa biisi ale Naawen la.

Currently Selected:

Nyinika 34: BWU

Highlight

Copy