Nyinika 33

1Naawen yaa weeni Moosis ayen, <<Basi dela jigini, fi ale nuruma ate fi ta ba nyini Ejipiti po a nyini la, abe ni cheŋ tɛŋ kaai ate mi a puulim a te Abrayam ale Aizik ale Jekob ayen, <M le pai ka a te ni ŋaaŋbisaŋa la.> 2Mi ale tom Wen maarɔ ate wade ni niŋ a yiak Keenan ale Amori ale Yit ale Perizzi ale Yivi ale Jebus demma a basi te ni. 3Ni cheŋ tɛŋ kaai ate biisim ale siita a sueri ka po la. Alege mi Naawen a kan va ni a cheŋ, dii nyiŋla ni ka tukpari nyam. Dai dii dai m le ko ni suiku po.>>

4Ase nuruma ale jam wom daanika wieŋa de la, ba yaa piilim a kum ba wanyi mɛ la an jam su nifelima ale baŋsa. 5Dii nyiŋla Naawen a weeni Moosis kama ayen, <<Weeni Izirali demma ayen, <Ni ka tukpari nyam. Mi a dan poom va ni a cheŋ magdega, m te ko ni kama. Yɔgyɔgla de ni yeeri ni nifelimaŋa ale baŋsaŋa ate m poli m le a yaali ayen nye ni diila.> >> 6Dila Izirali demma yaa yeeri ba nifelimaŋa ale baŋsaŋa Yoreb Guuku zuk.

7Moosis nyiem ta viuku a nyini ba boka jigini kama a ga nakpiak a ga ti ate ku yalima, a wi ku ayen, <<tuka viuk.>> Waai a dan ta wari a yaa wa miŋ di a nyini Naawen jigi, wa a basi ba boka jigini kama ale a cheŋ tuka viuku po. 8Diipo meena Moosis a dan cheŋ jo viuku po, nuruma meena nyiem jam yiti za kama ba viitaŋa nansuiŋtaŋa noa a nya Moosis ate wa ga jo viuku po. 9Ase Moosis ale ga jo viuku po la chiŋmanni ale jam bo ku nansuiŋku nɔi alege ate Naawen a biisi ale Moosis. 10Diipo meena ate nuruma a nya ale chiŋmanni ale di za viuku nansuiŋku nɔi, ba meena nyiem yiti zaani kama a puusi, waai meena a jam boka wa viuk nɔi. 11Naawen a jam a biisi ale Moosis ase ka nuru ale a biisi ale wa doa diila. Ate Moosis nyiem yaa ŋman pilim cheŋ nuruma ale bo juijui la. Alege wa maarɔ paalika Nun nidoabinni Josua an jam basi viuku.

12Moosis yaa weeni Naawen ayen, <<Fi kasim a weeni mi kama ayen, <Dɛ nuruma de niŋ,> alege fi an basi ate m seba waai ate fi tom ayen wa cheŋ ale mi la. Fi weeni ayen, <Mi seba fi yue kama ale ta ŋmanteka ale fu.> 13Fi sui a dan peenti ale mu, sak mu fi suitaŋa ate dila ale basi ate m seba fu abe m diem gum du a nya ŋmanteka a nyini fi jigi. Teeri ayen tɛŋka de demma ka fi nuruba.>> 14Ate Naawen a tulisi ayen, <<Mi ale cheŋ ale fu, abe m basi ate fi vuusi.>>

15Ate Moosis a weeni wa ayen, <<Fi a dan kan va ti a cheŋ, kan basi ate ti nyini dela. 16Nuru yoŋ ale nye ka sɛ a seba ayen fi sui a yɔk ale mi ale fi nuruma ase fi nin kan va ti cheŋ yaa? Ka boa ale ku a sak ayen mi ale fi nuruma ka ti tɔga ale nuru mbala meena tɛŋzuk de?>>

17Ate Naawen a weeni Moosis ayen, <<Mi ale nye wanni de dek ate fi a bek la, dii nyiŋla mi sui a yɔk ale fu kama ate m seba fi yuei.>>

18Moosis ayen, <<Yɔgyɔgla de be sak mu fi zulaŋa.>>

19Ate Naawen ayen, <<Mi ale nye ate m wamaŋsaŋa meena a va fi niŋ a taam, abe m mooli m yuenni, Naawen fi niŋ. Mi ale ta jiirim ale waai ate m le ta jiirim la, abe waai niniga ale jo mu la m le nya wa niniŋŋa zuk.>> 20Wa weeni ayen, <<Alege, fi a kan nya m nimbidiaka, nuru a kan nya mi ale a boro.>>

21Naawen ayen, <<Jigi ale boro a moata mi juijui ate fi ale zaani piuŋ zuk. 22Ase mi zulaŋa a daa taam, m le pai fu a nyo piuŋ muulik po a lik fu ale m nisaŋa ate m ga taam nueri. 23Mi yaa le yeeri m nisaŋa ate fi nya m ŋaaŋka, alege mi nimbidiaka ku a fɛ ate fi kan nya.>>

Currently Selected:

Nyinika 33: BWU

Highlight

Copy