Nyinika 32

1Ase nuruma ale nya ale Moosis a beni ale guuku zuk siŋka la, ba yaa tigsi gilim Aaron ayen, <<Jam nye wen a te ti dii ale di de ti niŋ la. Dan ka Moosiswa de, waai ale ta ti nyini Ejipiti po a nyini la, ti zɛ jabuui ale nye wa.>>

2Aaron yaa tulisi ba ayen, <<Ni yeeri ligmɔniŋ tukpanaŋa ate ni pooma ale ni nidoabilisaŋa ale ni liema a su la a ta jam te mu.>> 3Dila nyiŋla, nuruma meena a yaa jam yeeri ba tukpanaŋa a ta jam te Aaron. 4Wa yaa jam tuesi ŋan baai ate ba te wa la a nye bɔgluk ase naabiik la, a salisi ku. Ate ba yaa weeni ayen, <<Ŋade ale ni wenaŋa Izirali demma, dii ale ta ni nyini Ejipiti po a nyini la.>>

5Ase Aaron ale jam nya kude la, wa yaa sɛ kuŋkuŋ naabiika niŋ ale mooli ayen, <<Chum tigi ale boro a te Naawen.>> 6Daa ŋayewa danni nuruma yaa daŋsi yiti a nye juka tiirita kaabka ale suiyɔgni tiirita. Dila ŋaaŋnyiŋ ba yaa kali dɛ ale nyu ale yiti boro a gɔk.

7Ate Naawen yaa weeni Moosis ayen, <<Siŋ tɛŋ dii nyiŋla, fi nuruma baai ate fi ta a nyini Ejipiti po a nyini la a taŋ kama. 8Ba nye ka nwuli a basi dii ate mi a weeni ba la ale nye bɔgluk ase naabiik la a te badek. Ba koori ka tɛŋ a te ku ale a kaabi a te ku ale weeni ayen, <Ŋade ale ni wenaŋa Izirali demma waai ale ta ni a nyini Ejipiti po a nyini la.>

9Naawen weeni Moosis ayen, <<Mi nya nuruma de kama ba ka tukpari nyam. 10Yɔgyɔgla de basi mi m dek m nyiini ate m sui a puuri ale ba ate m kaasi ba. Mi ale basi ate fi chim tɛŋ kpieŋ.>>

11Alege Moosis yaa saalim Naawen wa Wenni ayen, <<M Naawen yaa, ka boa ate fi sui a puuri ale fi nuruma baai ate fi ta nyini Ejipiti po a nyini ale pagrim kpiem ale ni kpieŋsaŋa la? 12Ejipiti demma ale weeni ayen, <Ka popoli baata nyiŋ ate wa ta ba a nyini ayen wa ko ba guutaŋa po abe wa nueri ale ba tɛŋzuk de?> Basi fi suipuurumu yegayega, poli di zuk abe fi kan ta kaasuŋ a jam fi nuruma zuwa. 13Teeri fi tomteerɔma Abrayam ale Aizik ale Izirali wie, baai nyiŋ ate fi jam pɛ fidek nyiŋ ayen, <Mi ale nye ate ni ŋaaŋ bisaŋa a piisi ase chiŋmarisaŋa ale bo chiŋmaaŋa po la, abe m te ni ŋaaŋ bisaŋa meena tɛŋ kaai ate m puulim ale ba la ate ka chim ba nitalim taam wuu.> >> 14Ate Naawen yaa poli di zuk an ta kaasuŋ a jam wa nuruma jigi ya ase wa le jam poli wa nye diila.

15Moosis ŋman nyini guuku zuk a siŋ ale tintain paglaksa siyewa ate Naawen wanni a ŋmarisi ŋa zuk a bo wa nisaŋa po la. Ba jam ŋmarisi kabtaŋa meena kama, niŋ ale ŋaaŋ meena. 16Tintain paglaksaŋa jam ka Wen ale nye. Ŋmarisika jam ka Wen ŋmarisika a maŋ tintain paglaksaŋa nyiŋ.

17Ase Josua ale jam wom nuruma nuemka la, wa yaa weeni Moosis ayen, <<Ku a nye ase ka kpaliŋ nuemka ale bo nuruma boka jigini la.>>

18Ate Moosis a tulisi ayen, <<Ku kan nuem ase nak dɛka la, ku daa nak yiaka nuemka. Ku a nuem ase ka yiila lennika mi jigi la.>>

19Ase Moosis ale forisi moata nuruma boka jigini la, wa yaa nya naabiika ale gɔgta, ate wa sui yaa puuri ate wa yuk tintain paglaksaŋa wa nisaŋa po a basi ate ŋa mobi yisayisa guuku chiak. 20Wa jam pai naabiika ate ba nye la a ju ka ale bolim, a num ka nna lɔklɔk ase zom la a yulum nyiam zuk a basi ate Izirali demma a nyu bu.

21Wa weeni Aaron ayen, <<Nuruma de a nye fu ka sɛ ate fi de ba niŋ ate ba nye biem kpiemu de?>>

22Aaron yaa tulisi ayen, <<Kan te ate fi sui a puuri m nyɔnɔ, fi seba nuruma de ale a yaali biem nyeka diila kama. 23Ba weeni mi kama ayen, <Nye wena te ti ŋaai ale ŋa de ti niŋ, ti zɛ jabuui ale nye Moosis waai ale ta ti nyini Ejipiti la.> 24Dila ate mi yaa weeni ba ayen, <Nuru waai meena ale ta ligmɔniŋ tukpan la wa yeeri.> Ate ba yaa te mi ligmɔniŋka ate mi pai nyo bolim po, ate naabiika a nyini du a nyini.>>

25Moosis nya kama ayen nuruma nyiŋsa a toariŋ kama ate Aaron a basi ate ba ŋman ka yikka a yaa chim laata a te ba dachaasaŋa. 26Dila nyiŋ Moosis yaa zaani ba boka jigini nansuiŋku nɔi ayen, <<Baai ale va Naawen la a jam mi jigi,>> Ate Livaima meena a cheŋ wa jigi.

27Wa yaa weeni ba ayen, <<Naawen, Izirali Wenni ale weeni diila ale nna, <Nidoa meena a su gebik wa gauŋ. A cheŋ ŋaaŋ ale niŋ nuruma viuku po a nyini kpeglimka kanyi a ga paari m kala, waai meena a ko wa suok ale wa doa ale wa somoa.> >> 28Livai ma a jam nye dii ate Moosis a weeni ba la kama, dai dila danni nuruba ale paari ase tusa ŋata (3,000) la ale jam kpi. 29Ate Moosis ayen, <<Nama a gaari ka ni tɔga a te Naawen jinla ale ni ale nye ka kpaliŋ ale nidek bisa ale ni suata ate wa niak ni jinla danni.>>

30Daa ŋayewa danni Moosis yaa weeni nuruma ayen, <<Ni nye ka biem kpiem. Alege yɔgyɔgla de mi ale jueli Naawen jigi. Dai dii dai m le nye biem duisi basika a te ni, ni biemu nyiŋ.>>

31Dila nyiŋ Moosis yaa ŋman cheŋ Naawen jigi ayen, <<Biem kpiem ale nna ate nuruma de a nye! Ba nye ka ligmɔniŋ wena a te badek. 32Alege yɔgyɔgla de mi a saalim ayen fi vɔŋ ba biemu a te ba alege fi be dan kan vɔŋ a te ba, be yeeri m yuenni gbaŋka ate fi ŋmarisi la po a basi.>>

33Ate Naawen yaa tulisi Moosis ayen, <<Waai ale nye biem a kaasi mi la yuenni ale mi a yeeri a nyini m gbaŋka po a basi. 34Yɔgyɔgla de cheŋ ga de nuruma niŋ a ta ba cheŋ juijui ate mi a biisi ku wie la, m maarɔwa ale de fi niŋ. Alege danni a dan paari ayen m namsi ba, m le namsi ba, ba biemu nyiŋ.>>

35Naawen yaa basi ate nyiŋtuila a yik nuruma ba le nye dii ale naabiika ate Aaron a nye te ba la nyiŋ.

Currently Selected:

Nyinika 32: BWU

Highlight

Copy